Murlen Platinum Jubilee ~ Hau Za Cin

Murlen Platinum Jubilee ~ Hau Za Cin

1934 kuma kisat Murlen Khua kum 75 cinna Platinum Jubilee March 4-5, 2010 sung Murlen khua ah nopci tak, thupi leh manpha takin kizang hi. Mizogam kumpi pan Minister Pu H. Rohlun leh MLA Pu TT Zothansanga te leh Officer sawm val in hih hun uap in hong zatpih uh hi. Mikhual khempeuh 382 pha a, Sial – 2, Bawng – 1, Vok – 5, Kel – 1 kigo hi. Ganpi sa nelo te ading Aksa leh Ngasa kibawlsak hi. Murlen khua tulaitakin inn 85 pha a, mihing 554 om hi. Murlen vanglai a cih uh kum 1950 kiim in Chuanchung (Zomi veng) inn 120 pha in, Chuanhnuai (Lusei veng) inn 50 pha a, a vekpi in inn 170 khawng pha uh hi.

Kum 100 tung lam dam mi thum bang pha a, tu laitakin kum 75 tungsiah damlai zong mi 17 pha hi. Pawi sim upa pen Upa Gin Za Kap kum 90 hi a, kum 75 tungsiah pawi sim mi 13 pha hi. Murlen khua pan Pastor 18 khangkhia a, Doctorate Degree nei mi 5, Medical Doctor mi 3, First Class Officer mi 7, Army Officer mi 12, B.A. tungsiah zosa mi 147 leh Biakna Pawlpi Upa Ordination ngahsa mi 47 pha hi.

Hihzahta a khua thupha ngah ahihna a gen uh ciang Hausapa in Pasian a phawk man hi ding cih hih Jubilee ah kilimgen pen a, pawi kikhop hun simin mipi in Pasian tungah Lungdamkoh Thungetkhopna kinei den hi. Tua pen a lamdang diakna leh a tuam mahmahna, mipi pawi himah leh pawi dang tawh akibat hetlohna leh khua mipi khempeuh a angtang diakna hi. A vaisaite zong siam sa a, Topa ompihna leh lamlahna zong hi dingin ki-ummawh ciat hi. A kigen theilo Kha Siangtho kithuahpihna kitang hi. Mizogam bup leh Murlen ah zong Kha Siangtho hong tun 1947-1948 pawla pen in tu hun in zong Murlen khua mite hong ompih lailai hiding ciin kiciamteh hi. A kicingzaw in genlai ni.

1947 kiim pan in Kha Siangtho hong tungin lamna, dianna leh Pasian thu ah khanlawhna lianpi a tun ciangin Pu Lal Zam, Pu Ngin Khaw Hau, Pu Thang Sian Ngin leh Pu Saihlei, Pu Thang Kung, Pu Dar Hnun, etc cihte in limna leh lawpna tawh Kha nasepna tang uh a, lungdam in lamlam uh hi. Thunget hahkat in Biakinn leh Pasian thu kin bawl in, kikhop pelh ngeilo uh hi kici hi.

Amau tangthu tuamtuam nei a, Pasian leh Kha Siangtho nasepna (kei bang) ka theih ngeiloh tampi piang mawk hi. Pu Saihlei bang kum 90 a phak tan in zong kikhop pelh nawnlo hi kici hi. Tua bek hilo in Christian min khumna ah a min uh gelh ding in ut uh hi. Tua hun laiin Christian suah ding pen innkuanpihte leh meltheih u leh nau tawh kikhenna ahih manin mi tampi in haksa sa uh hihtuak hi.

Hih Kha Siangtho tanga lawpna nei mite Murlen Hlimsang kici a, Mizogam khua tuamtuam pan mite hong pai in amau kiang panin Kha Siangtho dawh, ahih kei leh Kha Siangtho puktaw ciin hong pai ziahziah uh a, mi tampi lungdamna leh Kha Siangtho tangin ciahkik uh hi, ci hi. Amau Hlimsang te zong khua dang ah zinkhia in Kha Siangtho kikholhpihna va tangko kawikawi uh a, apaina peuh vuah mite in na lawppih, na metpih, tha ngahpih mahmah uh hi ciin gen uh hi.

Hih pen a lamdang ka theih ngeiloh thu hi. Murlen pan Kha Siangtho tang om cih a kigen ka zak ngei hangin hih Murlen Platinum Jubilee ah a kicingzaw a Upa kum 80 tunglamte gen ka bil mahmah tawh ka zak khatveina hi. Amaute hih thupiang a taktaka mit tawh a mute hi a, amau genna kician mahmah hi. Topa nasep lamdang hi.

Hausa Pu Saithuam pen Jan 15, 1894 kumin Kawihthuanghmun ah pianga, October 2, 1956 kumin Champhai ah si a, Murlen ah kivui hi. A zi Pi Ngai Kang pen Thawmte beh hi kici a, Zokam (Tedim pau) a zang ahih manin a khuapihte uh Lusei pau theilo te kiangah Gospel puak dingin amah kizang hi. Lai Siangtho sunga Esther bang hong phawksak hi.

Amau deihsak takin Christian a suak nailo a khuapihte uh Pasian thu hilh in Cope Topa hong teisak Lai Siangtho pen tawi in Pasian thu va hilh zel a, Tapidaw suah ding hi cih va gen zel hi. Christian suak masate a kikhop ding uh ciang a kikhop ding dan uh theilo uh ahih manin Leisenzo pan hong pai Pu Son Lang, Evangelist in kikhopdan sinpih in makaih thei zel hi kici hi. A lamdang takin Pasian thu hong theih uh ciangin khantohna tampi hong piang hi kici hi.

Hih Jubilee ah Hausapa Christian ahih mana a khua mite in Thupha a ngahte leh a khua mipite Topa in a lapsangzelna thute kilim gen pen a, nek leh dawn leh neih leh lama khantohnate kitam genlo zaw hi. Thungetna leh Pasian thu tamzaw tawh hun khempeuh kizanga, a thupi veva lua ahih loh hangin lungnop, lungkimna leh lungdamna lianpi ciat tawh hih hun kizo thei hi.

A kigen a lamdang kasak pawlkhat:

1. Murlen ah mi cidama, kum 100 tungsiah dam zong om den hi kici hi.

2. Murlen mite a ci a sa uh hoih in, Hnahlan Doctor pa bangin, “Murlen tangval leh Hnahlan tangval pen a ban uh lawng bek leng zong kikhenthei” ci hi.

3. Murlen khua pen numei pasal thu ah siangtho in khuadangte zahtak khua hi ciin kiciamteh hi.

4. Murlen khua in a gam uh meikangsak ngeilo, gam hoihtak kem a, a sunga singgah theipuam leh mehding omte limtaka kem, singkung mawkphuklote hi kici hi. [Tua man hi diam, tun Murlen National Park cih min puasak in India kumpi in limtak kemcing hi].

5. Hausapa leh a zi Pi Ngai Kang in a khua mite Christian a suahna dinga a panlakna uh kilim penpen hi.

6. Mizogam ah Hausa kibeisak a Democratic System zanga kitelna a om ciangin zong Murlen hausapa pen a khua mipite in it in, kuamah in bangmah cihlo in amah zong khua ah teeng suak a, a teek sih ciangin zong khua mipi in it tak deihsak takin vui hi, kici hi. [Khua dang pawlkhat Hausate pen hausa a kibeisak ciangin amau khua ah om ngam nawnlo in taimang, pemmang uh hi].

7. Tangvalte cidam thahat uh ahih manin khuadang tawh misi kisuh ciangin khuadangte in kihta in sawtpi kisuhpih ngeilo kici hi.

Nidanga pupa huna kikhawl ngeilo minam tuamtuam kithutuak taka tenkhopna Murlen pen kua theihkhak ahihloh hangin Pasian Thupha saang, khua nuamsa khat ahi hi. Pasian min suanga kisat khua ahih manin mailam ah zong Thupha tamzaw sem hong luanglai ding hi cih upna lianpi kinei hi. Because it’s like: “In God We Trust”. Dr. Hau Za Cin

Sailo Lal Saithuama Khua
Murlen Platinum Jubilee
March 4-5, 2010