Murlen Platinum Jubilee ah thukigen pawlkhat (behlapna) ~ Hau Za Cin

Murlen Platinum Jubilee ah thukigen pawlkhat (behlapna) ~ Hau Za Cin

Christian Suak Thu: Tedim gam Thalmual, Keizang, Muizawl, Suangzang leh Mualnuam pan 1920 kiim a Murlen khua lut Zomi te Murlen khua Hausapa Pu Saithuama Sailo leh a zi Pi Ngai Kang leh mi phatuamngai pawlkhat hanciamna tawh 1942 kumin a nungta Pasian biakna Biakinn phuankhia uh hi. Tua kum pen Mizogam ah Christianity a lut zawh kum 48 a phakna hi. Gospel puak masate in Haam ah Lai Siangtho hawm uh hi.

Haam 3 oma, Pu Thual Ngin inn, Pu Sing Dai inn leh Pu Sawl Vai inn hi. Haam ah giak tangvalte in Lai Siangtho sim thei tam nailo ahih manin Ni Sagih Lai sin uh a, tua tawh LS sim thei uh hi. Tua hun laiin Leisanzo Khua pan Pasian thugena vialvak khat Pu Son Lang kici Murlen khua ah hong vaklut kha a, amah leh Hausapa hanciamna tawh Christian a kisuak hi.

Christian Suak Masa te

1940 kum in innkuana Christian suak masa Pu Son Khaw Hau hi a; mimala suak Lut Ngin, Thang Gen, Vai Za Dal, leh Go Khaw Nang hi [Murlen Vengpi Silver Jubilee laibu, January 1967]. (Pu Go Khaw Nang in Platinum Jubilee ah a thugenna ah 1938/39 in Christian kisuak in, Chuanhnuai, Lusei veng ah Biakinn ka zuat uh pen 1940 hi ding, tua sanah Sunday School ah ka min uh hong khumsak uh hi, ci in gen.

A Christian suak lian uh leh SS ah amin uh a kikhum pen a kum kibanglo hih tuak hi. Silver Jubilee laibu ah SS ah min khum kum kigelh hi ding hi a, Christian a suah kum uh kigelhlo hizaw kha ding hi.) A kumthak 1941 ciangin innkuana suak inn 7 (Pu Vial Kho Zam, Pu Lal Zam, Pu Khai Kho Gin, Pu Kam Kho Zam, Pu Cin Khual, Pu Sian Zam, Pu Bel Za Gin) leh mimala suak mi 6 pha hi (Thuam Za Gin, Thang Za Do, En Kho Lang, Dim Man, Khai Lang, Ngaih Kho Lang).

Biakinn neilo

Christian suak masate biakinn neilo ahih manun Vengnuai ah kikhawm uh a, lusei pau lah theilo uh ahih manin kikhopna ah nawngkaina tampi tuak uh hi. Ni khat bang Pu Son Kho Hau leh a lawmte kikhawm dingin a pai uh leh Ninoni na hikha a, kikhawm lo in ciahkik uh hi.

Biakinn neita

Hausapa Saithuam Sailo hanciamna tawh ama inn lui teng sutuah in Biakinn khat 1942 kumin lamsak a, March 1942 in Pastor Thang Khum, Tualcheng in hong hi. Inn 8 leh mimal 12 khawng bek hinapi Sialtal khat tawh Biakinn honna pawi bawl uh hi. Vengnuai te in meivak khat tawh inntuan uh hi.

Tui Kiphum Masa Pen te

Biakinn hon ni in mi 4, Pu Vial Kho Zam te nupa leh Pu Khai Kho Gin te nupa tui kiphum a, Murlen pawlpi pan tui kiphum masa pente hi.

Makai Masa te

Biakinn hon zawh ciangin Lal Zam, Khai Kho Gin, Vial Kho Zam leh Thuam Za Gin te makai sem a, makai masa pente ahi uh hi.

Pawlpi Ngeina Tawh Kiteng Masa te

Mizogambup Gospel Golden Jubilee kum, 1944 kumin Pu Vial Kho Zam te nupa leh Pu Thuam Za Gin te nupa Tapidaw Pawlpi ngeina tawh kiteng a, Murlen khua pawlpi pan Tapidaw Pawlpi ngeina tawh a kiteng masa pente hi.

To Tuam Nei

Christian suak masa te pen tulai hun mah bangin tua hun laia Lawki ngeina Zu leh Sa tawh a kizol kik ciangin puk theizel uh ahih manin Tapidaw a suak peuhmah Lawkite ngeina u-sa, nau-sa, sung-sa, pu-sa cihte kisangtuah nawnlo ding ciin Pawlpi in khentatna a neih ciangin Pawlpi in kalsuan kik thei hi. Lawki in To Tuam nei, Tapidaw in To tuam nei ciin kisang hi. Lawki leh Tapidaw in Hakkol khat pua khawm thei lo uh hi.

Lawpna Hong Tung

1948 kum in Kha Siangtho ah lawpna lamna hong tunga, naupang lam pan hong kipan a, Suan Kho Lang leh Thawng Kho Lang in ngah masa uh hi. A kithei ngeilo tua bang lawpna hong tun ciangin Pawlpi kilingsak a, kithutuahlohna hong tungin Pu Lal Zam leh mi pawlkhat in UPC kici Tapidaw Pawlpi khat zui uh hi. Tua kiim in mi pawlkhat Lamka lamah tai in, mi kiam in, pawlpi bah mahmah hi. Pasian in thupha pia kik in Lawki pan Tapidaw suak innkuan hong kibehlap kik hi.

Pawlpi Upa Kip Masa pen

1950 Saitual Presbytery khoppi ah Pu Thuam Za Gin akip Pawlpi Upa leh Presbytery Member dingin kikipsak a, Upa masa pen leh Presbytery Member masa pen ahi hi. [Amah Rev. Dr. JM Ngul Khan Pau, Fuller Theological Seminary, USA pianna Pa hi. – HZC].

1958 ciangin Pu Neng Kho Lian (Suante Drugs Store, Aizawl neite pa, mah ahi na?) zong Upa kip leh Presbytery Member dingin kikipsak hi. Ahi zongin amau a kumkik 1959 ciangin Lamka lamah pemsan uh a, pawlpi mi kiam leuleu hi. Pasian in taisan lo in Pawlpi mi ding pia kik zel a, 1960 ciangin a kip Upa dingin Pu Go Khaw Nang (Rev. Dr. G.K. Nang u pa) leh Pu Awn Za Suan(amah pen Kawlpi a om pen hiam tel lian keng…a theite in hong behlap sak un), 1964 kum in Pu Khai Lian Nang (Dr. S. Neng Ngaih Lian nupi pa) kisang hi.

Kum 18 a phak pan Tualsung Upa a sem, kum 28 a phak pan Upa kip a sem Pu Go Khaw Nang (Rev. Dr. G.K. Nang u pa) pen tuni tannin a tenna Kawlpi ah Upa kip sem suak lai hi. Amah cidama, Murlen kum 75 cinna ah zong kum 80 phata mah leh hong kihel in thugenna limci tak hong nei thei hi. Thu dot taak leh thu ciamteh denpa ahih manin A’ na a sepsak Topa in a khan kumte hong sausak in cidamna hoih hong piaksak denta hen.

Naupang Nipi Sang Sia Masa

Pu Thuam Pau in naupangte a mawk om uh hoihsa lo in khawm a, la, lai, tangthu leh LS thu khawng hilh in pattah a, Naupang Nipi Sangsia masa pen ahi hi. Ama hanciamna tawh 1951 kum in Nipi Sanginn a tuamin kilamzo hi.

Pu Suan Khan Thang (Rev. S. Neng Za Khup pianna pa) pen galkap sung pan hong tawp ciangin Nipi Sang ah Superintendent sem a, a masa pen ahi hi. Ama makaihna tawh Nipi Sangsia Pu Thuam Pau, Pu Zen Kho Lang, Pu En Kho Lang leh Pu Lang Gin (Baptist Pastor Pension zo) te in sem uh hi.

Pu Suan Khan Thang in Nipi Sang ukpi sem bek hilo in naupang sangkah utlote, lai sim nuamlote zol in, ama sum tawh muamkhum khawng leisak, laibu khawng leisak cih bangin pattah a, ama hanciamna hang tawh Suan Za Go leh Khup Za Go (Rev. Khup Za Go, ZONET ah Carey Suante, Delhi ah Vaphual News nei pen pianna pa) in 1951 kumin tan 3 zo thei uh a, laisiam pahtawina sum (scholarship) zong ngah uh hi. 1954 ciangin Khup Za Go in tan 6 zo a, Murlen khua leh a kiim ah a masa pen ahi hi.

Numei Kikhop

Numeite zong omkhong tuanlo a, Nipikhawvak nitak in kikhop pan uh a, Nu Vial Khan Cing (Pu Sing Za Gin zi) leh Nu Niang Za Go (Upa Thuam Za Gin zi, Rev. Dr. JM Ngul Khan Pau pianna nu) in makaih uh hi. Pasal lam pan Upa Khai Lian Nang (Dr. S. Neng Ngaih Lian nu’pi pa) in hanciampih hi (advisor).

Numei makaite gel khat Kawl ah, khat Lamka ah a pem uh ciang kizomzoloa, June 1961 ciang in Upa Go Khaw Nang mah imakaihna tawh nupi bek hilo , nungak honkhat hanciam khawm in Numei kikhopna kizomki zo pan hi. Kikhop bek hilo in Numei kipawlna in Pawlpi ading na tampi semkhia uh a, Pawlpi kisap van tampi zong leisakzo uh hi. [Tuni tan in Numei Kipawlna in Pawlpi sung phungvuh den lai hi. –HZC].

Nungak Tangval Kipawlna

Mizogambup ah nungak tangval kipawlna YMA kici 1935 a kiphuat ciangin Go Khaw Nang Rev.Dr. G.K. Nang u’ pa), Thang Sian Gin (Rev. Suan Khan Thang, Executive Secretary, Zomi Baptist Churches Mizoram pa neute khat), Gin Za Khual (Dr. S. Neng Ngaih Lian pa’pi) te makai masa ahi uh hi. YMA nasep te – Khuakhal meikang ding veng, Misih ciang Kuul to, Tuahsia liam leh bai omte huh, Khualkhua pan cina leh misi a om leh pua, gammang a om leh zong, khuasung tagah meigongte huh, etc cih bang hi. Khuasung in noptuampih hi ding, tutanin “YMA khan lai pawh” ciin nupi papi in gennop sa mahmah uh hi.

Khangno Tapidaw Kipawlna

Christian Endeavour kici pen Khangno Tapidaw Kipawlna ciin kiminvawh a, makai masa Go Kho Nang, Neng Kho Lian leh nungak tangval pawlkhat hi. Vengnuai ah Kristian Thralai Pawl kici hi.

Tapidaw Khangno Kipawlna ah makai leh a hanciam den sanggamte pawlkhat in hong nusia baihlua ahih manin a gikzaw sem sep ding tavuan hong guan uh tawh kibang hi. Amau te: Gin Zam (1952), Vial Za Niang (1957), Vum Kho Zen (1958), Awi Nem (1964), Dim Kho Don (1964), leh Upa Neng Kho Lian (1965) ahi uh hi. A kha uh khamuangin Topa kiangah tawldam henla, a maban uh a zom ding Top amah in hong pia zel ta hen.

Thukhupna

Hih Murlen Vengpi Silver Jubilee laibu sung pan Murlen Pawlpi pen Kha Siangtho lamlahna tawh a kalsuan ngitnget ahihna kilang hi. Tua banga makaih Kha Siangtho ompihna hang tawh 1967 kum in Lungdam Puakna Pawi ciin Silver Jubilee Mualsuang zong naphut uh hi.

NB: Murlen Platinum Jubilee tawh kitonin tuma kum 50 val paita hunin Christian suahna hang tawh Murlen khua leh a khua mite tangthu tawm kong gelh khiat pak hi. Dr. Hau Za Cin Laibu ette : Murlen Vengpi Silver Jubilee laibu, 1967, etc.