Multikulti, “utterly failed” – Angela Merkel ~ Hau Za Cin

Multikulti, “utterly failed” – Angela Merkel ~ Hau Za Cin

German Chancellor, Angela Merkel in, “Pemthakte in German pau a siam sawm ding uh hi (immigrants should learn to speak German),” ci hi. “Germany ah multicultural society bawl sawm pen piangthei vetlo hi (“multikulti” “utterly failed”). Minam tuamtuam lungnuam kithutuak taka ten khop liliai cih pen Germany ah piang thei vetlo hi. Tua ahih manin pemthak peuhmah in German ngeina sungah a lut ding uh a kisam hi…”

Hih Potsdam ah a thugenna pen hun sawtpi politicians te leh mipi lungsim ah pemthak a deihlohna uh a omsa hong puakkham hi ciin kingaihsun hi. German mi za-ah-sawmthum in Germany pen gamdang mite in tuancil khinta uh hi cih upna nei uh hi. Pemthak mihing 16 millions te in hamphatna (social benefits) leh nasep (employment) deihman beka Germany ah hong pem uh hi ciin um uh hi.

Mrs. Merkel in amau party Christian Democratic Union (CDU) te mai ah Saturday nitak a thugenna ah, “1960 kum panin i gam ah gamdang mi nasem dingin hong pai uh a, tuni dong tamsuak lai uh hi. I sap laiin i lungsim ah, “‘Ah! sawt om ut kei unteh, a nasep uh a bei ciang ciah kik lel unteh’ i ci a, ahi zongin tuni dong a ciah nawn kei uh hi. Ahi zongin lungnuam taka tengkhawm ding cih i lunggulh piang theilo hi. Tua manin a tengsuak nuamte in German pau leh ngeina a zuih uh kisam hi. A kisin uh kisam hi,” ci hi.

German President Christian Wulff in, “Islam pen Christianity leh Judaism te mah banga German mite biakna khat mah hi,” acih pen mipi ngaihsutna tawh kituak mello hi. Chancellor nu in zong tua siksan in a genkikna ah, “pemthakte in German pau beek a siam sawm ding uh hi,” cih uang gen semsem hi. “Ahi zongin gamdang mite in ‘Germany ah i ten theihna dingin amau pau leh ngeina i zuih teitei kisam hi’ ci-a hong telkhialhloh ding uh zong kisam hi,” ci hi. “Tua banga hong ngaihsut khak uh leh bel gam minsiatna lianpi hi ding hi.” German Chancellor zong pemthak thu (immigrant) kitheihmawhbawl thei nawnlo, a gam sungah zong pemthak hunkhop omta cih kilangsak hi.

Europe gam tuamtuam ah tu laiteng tua bang buaipihna thu hong om kiukiu hi.

Germany ah Turkish mi 2.5 millions bang om dingin kituat a, tuate leh Arab pan hong pem te in German ngeina te zuih ding hamsa sa diak uh hi, ciin Horst Seehofer, CSU party makaipa in gen hi. Ama genna lian ah, “Multikulti” is dead” (minam tuamtuam kithutuak takin tengkhawm cih pen a omlo hizaw) a ci hi. Thilo Sarrazin, German Central Bank officer khat in, “pemthak teng laklak ah biakna zui namkhat te zaha hamphatna bek deih leh gamsung buaina a piangsak minam dang omlo hi,” ci hi. A gennop mipi in tel lel hi. Ahi zongin tua a gen manin kumpi in a nasepna pan tawpsak pah hi. Racist.

Tua banga gamdang mi deihlohna leh huatna hong khanna pen a gamsungah nasep neilo, unemployment a khan man hi, ci uh hi. Nekzonna hoih semsem napi nasep ngahlo zong kibehlap veve ahih manin ‘gamdang mite in nasep ding teng hong laksak hi’ cih ngaihsutna lian semsem hi. Tua manin nidanga kampau kilawmlo a kingaihsun minam kikona te kitam zak deuhdeuhta hi.

BBC News analyst Stephen Evans in a genna ah, “Chancellor Angela Merkel in immigrant thu a gending pen haksa sa mahmah hi, ahi zongin a genloh phamawh hisi,” ci hi. “A diakdiak in “utterly failed” cih pen namdangte zak dinga kampau khauhlua ahih manin a gamsungah ‘skilled labour’ hong paite zong a genkha tawh kibang hi.

Ahi zongin a genloh lah hitheilo hi. Gamsung kitelna hong nai semsem ah amah zong a cin kikna ding a kithawi kul hi. Tua manin thugen dan a kilawm, a hoih, mipi deihdan a gelsiam kisam hi. A gennop penpen bel, “Germany in pemthak kisam hi. A diakdiak in skilled labour kisam hi. Ahi zongin Germany ah tengsuak taktak ding acih uh leh amau zong German pau leh ngeina a zuih ngap uh kisam hi,” a ci nuam ahi hi.

Hau Za Cin
Phuitong Liim