Muhkholhna Limci Neite Thupi ~ Hau Za Cin

Muhkholhna Limci Neite Thupi ~ Hau Za Cin

Makai thupi i cih kuate hiam? A sum tam neite leh a haute makai hoih leh thupi hi kei. Degree sangpi leh tampi neite leh sanginn hoih pan kipattahte zong hikei. A minthang leh a vangneite zong hikhin tuan kei. Nungzui a haute makai hoih hilel hi.

Makai dinmun ah na din limlim leh na tupna mual ah na suahpih ding vai honpi khat na tonpih kul hi. Na tonpih mite adingin tua mualsuak ciangin “aw, himah ei, kal thak kisuan mah ei, gualzawhna thak kinei mah ei, hunthak ah kitungto mah ei” a cih theih ding uh kisam hi. Mun thak, vai thak, hun thak ah na mualsuahpih kei leh makai limci leh makai gina na hihna lian mahmahlo cihna hiding hi.

Tua ahih manin na tonpih mite a thupi penpen ahi uh hi. Na makaih mite thupi a, na seppih mite thupi a, na langpang leh nang hong nungthuap khollote zong thupi sem hi. Aw, hibang na hizaw mah ei. Hibang na himah ei. Hibang ding himawk mah ei a cih theih ding uh mualthak ah na dakpih, na tunpih, na mualsuahpih ding kisam hi.

Tua banga mite na mualsuahpih theihna dingin na theihding honpi khat om hi. Mimal kamsiamna bek leh sum leh pai neih leh lam hang hi masalo in muhkholhna leh gelsiamna, sepngamna leh phutngamna, thuakngamna leh thuakzawhna zong nakpi in kisam hi. Tua dingin thu pawlkhat ngaihsun khawm ni.

1. Hunthak Muhdan Siam in: Makai thak khat na hih nak leh ‘hunthak’ ah a ding na hipah hi. Makai denden na hih leh nanga dingin hunthak hi khollo a, vaithak hikhollo hi. Ahi zongin makai dinmun a sem ngeilo khat na hih a, makai dinmun ah hong kikoih leh, makai hong kisepsak leh hunthak a tung, vaithak a nei, muhna thak a kisam na hipah hi. Tua ahih manin na sansiam kisam pah a, na sanngam kisam pah a, na pom pah lel zong cidamzaw hi. Ahi zongin tua bang hunthak leh vaithak pen a mawkna in a sang, a pom, a len, a sik hilo hiteh cih na kitheih ding hi.

A paisa hunte pen hunlui hita a, mite in vaithak deih uh hi cih kitel hi. Mite in nang tungah vaithak hawm ding, hunthak nawk ding, mazapna thak nei dingin hong lunggulh uh, hong lamen uh, hong deih uh hi cihna hipah hi. Sep ngeisa teng a sem ding, a zom ding na hi zongin a sep dan, a pai dan kibang thei nawnlo ding ci cih na telpah ding ahi hi. Sepzia a thak leh sepdan a thak na neih kul, na laih kul bek hilo in a siamin na siam kul cihna hi. Na siamnai kei leh zong na kisin ngam kul cihna hi. Na kim na pam ah hun kikhel in mite kalsuanzia zong kikhel a, nang sep ding dan zong mite hong lametna zong kidangta hi cihna theihsiampah ding kisam hi.

A sem siamzaw ding zong hong piangtoto lai dinga, mite sepzia zong a hoihzaw om thei hi. Ahi zongin na nung hong zui leh na tonpih na lawmte in nang hong muangpen, nang hong um pen, nang gina hong sa pen ahih manin nang tungah upna leh muanna hong nga hi cih na theih a, tua muanna na guaksuaksak hetloh ding na tavuan, na mawhpuak ahi hi. Tua muanna om hi cih na mangngilhloh ding ahi hi. Tua ahih manin hunthak nawk dingin na kisin, na kithawi, na kipat kul cihna hi. Cinglo hi ing, siamlo hi ing, hih ngeilo hi ing, sem theilo ding hi ing a ci thei na hi nawnkei hi; nang liangko tungah hong kingata ahih manin.

2. A Sem Siamte Na Zat Ngam Kisam Hi: Nang hong kimuangpen ahih hangin nang a siampen na hipah kei thei hi. Nangsanga siamzaw ding, semngam zaw ding, semtheizaw ding om thei hi. Nang sepna hong tawsawn ding leh hong thuap thei ding zong mi om thei hi; zong om ding hi. Nang a siampen leh a semthei pen na hih hangin nang bek in sem lecin na gim dinga, na zo kei ding hi. Sep khit theihloh hun om ding hi. Mihing na hih manin cina, luna, vaikhat peuh in hong nawngkaisak cih bang om thei hi. Tua ahih manin nang dinmun ah a ding thei ding mite na huaisiam a, na zotsiam a, na zat ngam a, na muan a, na sepsak ngam zong kisam pha mahmah hi.

Makai pawlkhat in amau bek kimuang in amau bek mah in sem siam in zong sem zo takpi uh a, ahi zongin a sawtna ciangin gimlua in bah lawh thei uh hi. Tua ahih manin na nungthuap ding, nang dinmun ah a ding thei ding mi muanhuai tampi na sek, na pattah, na lapsang, na khankhiatsak kisam hi. A kul leh zong a siamte thaman pia in, a kilapsangna ding uh hunpha bawlsak in, vaithupi gelsak in mun pia ngam ding hiteh. Tua hileh nang makaih siamna leh na makaih ginatna hong kilang semsem ding hi. Na khutsung hong tun pan na khutsung pan na piakkhiat kik ciang makaihzia, hunthak vaipaizia a hoihzaw, a gina zaw, a limci zaw in na khektoh, na lapsang ding a kilawm ahi hi.

Tua mah bangin na sepna hong phungvuhlo leh hong thuaplo, na lamet bangin a hong thapialo leh hong tawsawnlo, hong nawngkaisak thei a om leh na heikhiat ngam ding zong kisam hi. Hangsan takin a hoihzaw ding ngaihsutna leh gelna tawh na kalsuan ngam zong kisam ahi hi. A hoih tampi a siaksak ding ngaihsutna hoihlote dal ngam in nang ngam in na hepkhiat ngam ding ahi hi. Hih bang cih ciang huham tak leh ginalo taka heikhia hilo zaw in a khangcing thei ding, a kilamto thei dingte mun piak zawk ding cihna hi. Mi tampi pen a sem theilo hilo in amau septheihna mun ah a omloh manun a manphat ding zahin manphalo hilel a, vai dang, mun dang khat ah koih leng nakpi takin phatuam mahmah leuleu bilbel uh hi. Tua manin amau septheih zawkna lam sem ding hanthawn kawmin amau septheihna zaw ciat ah nasep na guat theih, na guatsiam kisam ding hi.

3. Thuthak A Om Hiam Ciin Bil Dawh Gige In: A hoihzaw khatpeuh a om thei lai hiam ci a ngaihsutna navaksak den ding a kisam pha mahmah ahi hi. Sepdan thak a hoih teei hangin a hoihzaw dang zong na om thei lai a, a kicingzaw a sepdan zong na om thei lai hi. Tua manin ka sepdan, ka zatdan kicing lel, hoih lel cih tawh hunsak lo in sepzia a hoihzaw a om lai hiam ciin biltungsak, bil liansak in khuadak den kisam hi.

Na nuaia te holimna pan, na kim na kianga thugente kamdawn pan, nang hong langpangte hong gensiatna leh hong hawmthawhna uh pan na kisin theih, na lak theih a om hiam ciin na ngaihsutna na hei kawikawi ding ahi hi. Nang hong itte kamgen khum mahmah den a, zong a hoih a theih khempeuh uh hong gen ding uh hi. Khatveivei amau theihna bek zong na kicing nailo thei a, nang hong mudahte muhna zong a manpha tampi na om thei hi. Ngaihsutna hoih a hih nak leh na lawmte hi in na galte a hita leh a hoih a zat ding hilel ahi hi. Tua ahih manin a lianpen tawh kikhawl inla, a neu pen tawh zong kikhawl thei in. Tua hileh na theihna, na siamna, na ngaihsutzia tampi hong khang in hong kibehlap ding hi.

4. Na Sep Peuhpeuh Nuamsa Mahmah Lel In: Makai khat na hih manin nangma nasepte cimtak kha het kei in. Nuam na sak theihtheih dingin sem in kalsuan in. Na tonpih na lawmte, na makaih mipite adingin zong a nuam theithei dingin ngaihsutpih in. A hoih a nuam ding ngaihsun cih hangin a hoihna, a nopna bek hilo in a thupina, a manphatna te khiam ding cihna hilo hi. A haksa om nawnlo ding cihna hilo hi. Thuak a kul leh haksa taka kalsuan hun zong a om ding kigingsa a om ding ahi hi. Ahi zongin nuamsalo pipi a kalsuanna khat pen tua mah zuihzuih, tua mah zopzop ding hilo a, a nuamzaw a hei dan ding ngaihsut ding ahi hi.

Makai picing, makai lawhcing i cihte pen a sep peuhpeuh uh nuamsa tak, lawptak, lungluttak a semte ahi hi uh hi. Lawp mahmah a sepna in gim leh tawl zong phawksak lo a, gim in tawl taleh sepsep pen nuamsa mai uh hi. Nuamsa lua in nak sep luain gimlua in a pumpi in thuak, a pumpi in lel cih zong om thei hi. Tua pumpi lelh liang ding zong kidop, kiven kisam leuleu hi. Mi tampite kiphawklo in om thei ahih manin amau naihpih a lawm, a innkuanpih, a veng a pam leh a seppihte in a telsiampih uh a, tawlngak hun, khawl hun, tawldam hun a vaihawmpih siam uh zong kisam mahmah hi. Nuamsa tah ciin ban sepsep leng mihing ihih manin i pumpi leh thatangin zong zo khin denlo thei a, kum tampi a sem thei ding kimlai kum tawmcik bek sema maban zoplah theih ahi hi.

Tua ahih manin makai lawhcing leh makai gina ahi thei ding khat pen a sep dan nuamsa thei ding, a sepna tungtawna lungdamna leh lungnopna zong ngah ding, mite hauzacinpahtak leh mite lungkimna dinga zong sem siam ding, a kisap sum leh pai leh hun nuamte zong a kicinga ngah siam ding, a sem to den zo dinga zong tha leh ngal sit siam ding, zong lawp tak leh lungnuam taka sep zom zel dan ding gelkholhna leh muhkholhna gina tak nei ding. Tua hileh a sep peuh nuamsa dinga, gim taleh lungkim in a lungnuam dinga, gimpih, tawlpih tak sa dinga, tha leh hun leh sum leh pilna siamna sitlo in semsuah ngam ding hi.

Ahi zongin a phawk gige dinga hoih khat pen – Makai hoih leh gina kici te in lawm leh gual bek hau hilo a, amah a deihlo leh amah a langpang, a lehtat nuam honpi khat zong om hamtang hi cih a theih ding ahi hi. Leitung ngeina ah tua pen pelh theih hilo a, ahi zongin a tawpna ah thudik leh thuman bek mah in gualzo hi cih zong a mangngilh loh ding ahi hi. Tua manin makai gina leh muanhuai i cihte pen a taktak in thudik leh thuman a gum tinten a, a tamzawte phattuamna ding a hangsan taka nasem a mainawt ngamte zong na hi pah uh hi. Hau Za Cin