Misisate’ kivuina KHAN leh HAN (kei’ theihna ciang)

Misisate’ kivuina KHAN leh HAN (kei’ theihna ciang)

KHAN:
Pasian thu hongtun’ma Dawibia(Lawki) hunlai in, misi vuina Khan pen, khuanawl khuapaam khuagal mualah kibawl ahihmanin, Khanmual kici hi.

Kei neulai ciangciangin zong omlai a, abeh behin, guahtui atukloh nading hi in um ing. Buk kilam a siluang tampi aki sial theiding singkuang golpi khat aki khaangsa in buk sungah kikoih hi. Adiakdiakin gamui te in, siluang nethei uh ahihmanin, asaangah akuang kikhaanga, limphatakin asiin tawh kisiin hi.

Ahi zongin beh sungah misi kizom mawk leh, akuangsung dimleet ahihmanin hoihtak in kisiinkik thei nawnlo theizel a, siluang kidawk lelathei hi. Amuatsiangkhin siluangte’ alu aguhte kilakhia zela, khankuangnuai leibeeltak sungte ah kikoih hi.

Ko’ khua bangah Samte beh te in misi guh koih nading atuamin leikhuuk bawl uha, ka neulai in Samte te’ luguh endingin kapai zel a, luguh hawm tampi in zong hong nuihsan ngeiingaii danin ka ngaihsun hi.

Leilak pana akikhaangkuang acihna hidingin ka um a, akuang zong ”Khankuang” kici a, amun zong ”Khan” kici hi. Atamzaw mualbawktung hi a, ”Khanmual” kici pah hi.

HAN:

Ko’ khua Tuithang bangah, kapa Pu Zel Khua Kai in hausa( Circle Chairman) hongsep ciangin, amahpen Tuiphum (ABM) biakna pawlpimi ahihmanin, siluang leisunga kiphum’ hong pankhia ahi hi.

Apualam leitungah kikhaang nawnlo a, leisungah iki phumcianga Khan kici nawnlo a Han(Hankuang) akici hidingin ka ngaihsun hi.

Kei’ ngaihsutna hi.
Ka lungdam, Munkhai’pa