Mipil ih cih in

Mipil ih cih in

1. Tanglai mipil (Kumpi Solomon, Daniel, Aristotle, Socrates, Plato, Philo, etc) sang kahkah in degree sangpi tung cih nam ahikei uh hi. Amau theihna nam ah tangtakin, thukpi takin, zaitakin, nung leh ma tawh amau theihtawp in kankhia uh a, mipil kammal zang in, pil gamtat uh hi. Amau tangthu a kisutsut ciangin tulai a PhD tampi te in zahtak bek hilo in, amau pilna a sinkhate nangawn in pil lawh uh hi. Hih tanglai (ancient) mipil te pen laitan tanli zong onglo kici thei a, ahizong in pilna pen laitan tawh tehkak hun hilo hi.

2. Zomi/Zolai siamna: Sangmang Cope in lai hong bawlsak pan kipan in Zolai tawh thu kiciam teh in kisin theita hi (1910s). Laitan om nailo napi in, Zolai tawh laigelh thei 1960 kum hunma lai in ih pu leh pate sungah honkhat na om khin hi. 1965s nunglam ciang in ih Zolai kipuah pha toto a, Zolai thupitna leh deihna hong picing toto hi. Burmese leh English lai tawh ih Zomi/Zogam tangthute laibu ah na om tam masa zaw ahih manin ih khuamin, Zomin, mun leh mual min te pen Burmese leh English lai tawh hong kiciapteh sak ahih manin, original ei Zokam tawh a ki lamdang tampi hong om ta hi. Ih khanglui tangthute pen minamdang lai tawh ih theihbeh hon khat om in a hoihna a om zahkhat in ih lungkim zawh khitlohna mun tampi mah om veve hi. Namdang lai bangzah in ih siam phial zongin ei suahpih pau leh lai mah ih siam hamtang masak ding midangte adingin a thupi keizong in ei Zomi/Zokam zangte adingin thupi phadiak hi. Kawlgam ah Zolai tanli (four level) ciang om ahih manin, Zolai tanli ciang a sim mi khatpeuh pen Zomi a dingin neu et theih ding hingeilo hi. Kineusak ding zong hilo hi. Zomi hi in Zolai sinkha ngeilo, Zolai theilo khuapi a tansawm te sangin, Zomi/Zogam adingin tanli zote zattaak zaw hi.

3. Zogam/Zomite omna khuasakna ah mi lawhcing ahinuam khatpeuh a dingin (politic, fellowship, ministry, ism, etc) degree bangzah ngah hiam cih sangin, mi khempeuh amau kivakna ciat tawh mikim zat theih kisam zaw hi. Politician te bek in politic gen hen ih cih leh mi khempeuh politician hilo ih hih manin a ma politic/policy lawhcing ngeilo ding hi.
4. Politic campaign lawh cinna dingin, mipi ih huamsiam tawntung kisam hi. Pastor te pen morethan a politician hizaw lai hi. Ahang pen, leitung vai bek hilo in vantung gamvai nangawn a gensiamte ahi uh hi. Laphuak siamte zong morethan a politician hizaw hi. Ahang pen gamthu bek hilo in, a lungsim thu khempeuh, a lunggulh khempeuh (van leh lei thu) mikim ngaih nin ngeiloh dingin a kilawm pen “aw” tawh a gingkhia saktheite ahi uh hi. Laphuak siamna dingin pianthak kisam pahlo in, piangthak (Pasian nasem zong) sungah zong tampi mah omlua tham hi. Lasa siam leh ciamnuih siamte zong morethan politicians mah ahi uh hi. Mee (vote) kuanglui ding khat pen mi lungsim zo thei zahkhop in thugen siamkimlo thei hi, tua ahih manin mimal kivakna anei mite a zatsiam ding uh kisam zawkan hi. Zogam kepbitna ding leh khantoh sakna dingin politicians kisam, pastor kisam, degree sangpi neite kisam, sumbawl nam kisam, ciamnuih siam tampi kisam, laphuak/lasa siam tampi kisam, video/net work tampi kisam, laibu tampi kisam, laitan neilo a gam leh leitang ngakte thupizawkan lai hi.

Khupna: Israel gam tuni ciangdong a kikep zawhna, Islam (Muslim) gam leh biakna a hatna leh a lawhcinna 0maletaktak uh ih etciang in, a tunga ih gen nam khempeuh thuahkhawm siam uh hi. Gentehna: Kawlgam sunga van khempeuh tungah Muslim symbol 80% om khinta hi. Kawlgam ah Muslim guallel abat uh hangin 80% Muslim khutsungah Kawlgam a kinungta hizen hi. Zomite sung pan mipil bang in ih kingaihsut ih khialh mahmah khat pen, Pasian nasem khat in Zomi/Zogam thu a genciangin Politic gen dah hen, Pasian thu bek gen lel hen, a laitan zong tan giat onglo hi, ci in ih gam a vei mahmah te gam thu gen nawnlo ding zahkhop in a kipilsak ih om hi. Mipil cih pen a pillo teng tawh kithuahsiamna pen pilna ahi hi. BA a ong khat in bangmah theilote tawh sun leh zan in kithuahsiam in lai bek hilhlo in, a pillote kivakna nam/zawi ah a kiphonglo/khangto sakte ahi hi. Gam leh a minam a itlo mi peuhmah Pasian nasem picing hilo hi, politician belhtaak hingeilo hi. Ih siamna ciat ah, ih veina ciat ah, ih sep bang bang gam/minam, ih Pasian minthanna dingin kihual siam ding Zomite ih kideihsak hi.

Pasian nasem lampan muhzia hi,

Rev. Dr. Suan Za Khup
Yangon