Mipi mai ah Thugensiamna (Part 1) ~ AS Thangbawk

Mipi mai ah Thugensiamna (Part 1) ~ AS Thangbawk

Mikhempeuh kam tawh i kihopih hi. I lungsim sungaa om khempeuh i ki gentheihna ding kambek om hi. Kampauna bek a hihi. Tua ahihmanin kampauna pen nakpitak thupi hi. A pau maimai bek hilo in kampau a siamte mite in ki it, ki ngai in, a thugen ki zanuam deuh hi. Kampau a siamte mah in lawm hau in, itna ngah a, zong minthangzaw uh hi.

Kampau siamkeileng mi’n a heh peuh hongsa in, hong lau in, hong limho nuamlo uh hi. Tua ahihmanin thugen siam mi i suahding thupi hi. Thugen siam suahtheihna ding a bulpi zawdeuh teng gelh ding hihang. Mipi mai ah thugen a siam mikhat na suahtheih nadingin:

1. Na thugen a ngai ding mite dinmun telsawm in.

Mipil te mai ah thu khempeuh ki genthei napi laitan neilo leh muhna toi te mai ah thutampi na gen hangin telzolo ding uh hi. Na thu a ngai ding mite’n bangthu zanuam cih leh a mau bangte lunglut cih kansim in. A upna uh leh a ngeina te uh theihsawm photphot inla tua te tawh kituaklo thute gen kei in. A deihloh ding ciamnuih na genkhakloh ding kingaihsun in.

2. Na thugen nading a mun theician in.

Na thugen laitak guahzu maw, nitang, sunmaw zan cihte tawh a kituak ding gamtat kampau leh awsuah zatsawm in. Sun in na aw a sanglua in na genleh mite ihmutsuaksak aa zanin damtak thu na genleh mite’n ihmu ding hi. Inn sungaa thugen maw, tualpi cihdan (mun awngpi) khat peuh ah thu gen dingmaw, sang ah maw, biakinn ah maw cihte na theih ding kisam hi. Tuate tawh kituak in na gentheih ding kisam hi.

3. Thu na genciangin thungai mite kiangpan thuhkikna la hamtang in.

Kampausakna tawh ahiaa gamtatsakna tawh ahizongin thukimpihna la in. Khutbetna bek a hiaa, otna bek a hiaa, dotna dawna tomno te ahizongin nei hamtang lecin thungai te lungsim bunzaw hamtang hi.

4. Na deihna a tunna dingin mipil te thugente zong helzel in.

Tua in mite lungsim bunzawdeuh se hi. Na tuahkhaksa thute zong tawh mite thapia thei in. A piangtakpi tangthu tomte genthei lecin zaknop kisa, ciaptehnop zong kisa aa, thugenna in muibun hi.

5. Na ciamnuihte zong mannei tak in zangin.

Ciamnuih na gente a piangtaktak leh na tuahkhak taktak, midangte in a tuahkhak taktak te gentheilecin mite lungsim khempeuh na ngahding aa nui na cihleh hong nuipah ziahzaih thei ta ding hi. A siangtholo ciamnuih leh midangte a sukha ding ciamnuihte tamzat kei in. A zadah om thei hi.

6. A telnop kammal te zangin.

Gtn: Zomi te lakah a hihleh Kawlpau, Mangpau te hel bualbual kul masa lo hi. Mikim in a theih kammal mah zat ding a hihi. Kampau nawhlua kei in. Mite in na thugen a ngaihsut man dingin khat veivei dinkhawl in. Na mipi te tungah tangtak in thugen in. Midangte in a zaknop phatloh leh a ginalo kammal na zathetloh ding kisin ngiat in. Mite in a zatzat, a zakzak kammal mahtawh a lungsim uh kitam zo pen hi.

7. Na deihna bulpi genkik zel in.

Na thupatna ah, na thugen a lai ah, a tawpna ah na deihna, na gennop bulpi genkikzel in. Mipi te hong thuhkikna tawh kizui in na thugen a tom a sau khentat in.

8. Na mipi te zahtak bawl mahmah lel in.

Tuapen vallua theilo hi. Thugensiam minthangte in mite neumuh ngeilo aa mithupi a hihna, a pil a hihna, a semthei te a hihna a kitelsak te hizaw hi. Mipi te na haibawl leh na kammal sungah ki langlua a hihmanin na thugen hong sangzolo ompah lel ding hi.

9. Thungai te tawh a kibang in omthei in.

Tuabang mite’ thugen mite in zanuam deuh se hi. Thugensiam cihpen thungaisiam suakmasa hamtang ding hi. Thugensiam bektawh mipi maiah kilawhcing zolo aa thungaisiam in mite’ lungsim hupzaw thei hi.

10. A neuno zong thupi ngaihsutsak in.

Mite hong dotnate a neupen nangawn thupi bawl inla na dawntheihleh dawngtangtang lel in. Na theihpak kei leh dam in hong dawngkik ning ci veve in. Dotna pawlkhatpen theikhin pipi a hong ki dongzong omthei a hihmanin na theihkeileh na upmawh mawk gen kei inla ‘telcian kei tak ing ei, hong kan lai ning maw’, cilel in. ‘Theikeng’ na cihna tawh na vangkiamlo dingaa, upmawh manlo genna in mihai hong tangsak hi. (azom Part 2 zong nasimsak inmaw) AS Thangbawk