Minam vai ah Pasian ~ Pau Khat Suan

Minam vai ah Pasian ~ Pau Khat Suan

Pasian’ thu ki umsak mahmah Zomite in Minam itna thu i gen sim a Kawl leh Vaite a kipan namdangte tung ah hehna leh thangpaihna, muhdahna leh etsatna, langbawlna leh gal a neihna thu le late bekbek tawh minam ki-itsakna, motivation dan a thu i gengen mawk pen ahi ding mah ahi diam, ngaihsut phat huai mahmah kasa hi.

Namdangte muhdah etsatna pen minam itna hi mawk ding ahiam? A taktak in innkuan itna pen vengte muhdahna ahih loh bang in, Minam itna pen namdang muhdahna hi hetlo ding hi.

Bangmah theilo, khuaphawk keeilo khat namdangte muhdah sak gawp pongna ding a ki-hanthotna ( hate message, hate motivation ) tawh minam itna, political motivation i masuat laiteng i ma zanglo ding hi. Kuama’ phinloh, hehsakloh pi in mite’ mazanna tung ah ei le ei kihehsak tawm in tuangkhawng niloh lel ding hang a, kalsuan lopi khetul na in i khetaw kheng lel ding hi.

I limlang zutsiang ni. Limtak ki-enpha mahmah leng deihhuai kasa hi. I it zawhkei leh zong muhdah ding in ki-hanthawn kei beek leng hoih ding hi. I Pasian upna kiptak len in, ong ki-sukkhak loh ding leh ong ki-nawngkaisak loh ding daltheih humtheih zah a i dal, i hum ding thupi a, Pasian itna tawh midangte i zawh ding kisam hi.

Politics zang a Pasian’ itna, thu umlote’ tung ah i tangko ding hibek a, Pasian zang (or) paulap a politics sepding hilo hi. Politics tung ah Pasian tuansak ding hi a, Pasian’ tung ah politics tuansak ding hilo hi.

More: A kibang lo Zomi & Zogam ~ Pau Khat Suan

Pasian um, Pasian’ thuzui Minam in Pasian’ zia tawh i Minam i it ding ki-hanthawn, ki-makaih, tha ki-pia leng cih lunggulh huai mahmah kasa hi. Pau Khat Suan