Minam kikhenna aziak ~ Pu Zokhai

Minam kikhenna aziak ~ Pu Zokhai

Minam Kikhenna Aziak (Mimal Muhlehsaanna): Written on 27 March 2012
Hunkhat laai-in minam kikhenna aziak-pen biakna siate-hi ci-in I-minam groups te’ sung-ah kikupna leh kinialna kuppihna ka’ nei ngeikhin-a, idea leh practice ka’ bulphuh nopna-tawh, “Pastor te’ ziak-in minam kikhenna piang lo-hi” ci-in thusunna ka’ nei khin-hi.

Tu-in biakna pawlpi tuamtuam ziak-in minam kikhenthaangna piang-hi cih muhlehtuah tungtawn-in kikupna leh mimal lungsim sunkhiatna hoihkhomkhat I-mu khin-a, tua’ tung-ah keimah mimal’ muhlehsaanna ka’ hongsung nuam-hi.

Khatna: Qualified Pastor-in biakna pawlpi amakaih naakleh ama’ pawlpi mite minam sahkhua kithuahkhopna sung-ah akihel loding-in khaam loding ahihman-in minam kikhenna piangsak loding cih theihsa ahihi

Pasian’ Kumpigam’ ading taktak-a mapang Pastor khat-in (zu-ne, thaangtat, guta, misuam sumsut cihte-a kipan asia-a akiciamteh mite’ lakpan-in ahihkeibuangleh) minam kithuahkhopna pan-in ama’ pawlpi mite khenkhia tuan loding ahihman-in minam kikhenna piangsak loding-hi.

Pasian’ maaipha azong taktak Pastor te-in pawlpi mite’ lak-ah kitot kiseelna a-om ciang-in humtuam paihtuam neilo-in lemtuah tawntung-a, pawlpi sung-a nupa kitawng a-omleh lemtuah-in Pasian’ daihna maleepsak-hi

Pasian’ maaipha azong taktak Pastor te-in amau’ ngahding meetna’ sang-in apawlpi mite’ ngahding meetna zonsakna lam-ah thahaat uh-a, pawlpi mite akhasia a-omleh neem siam-in, athaneem a-omleh thapia thei-a, azawngkhaalpente thapiaknawhpen zawden-hi.

Pawlpi mite khihcip lo-in amau’ upna-tawh akip ding-in Pasian’ thuthuukpite thunsiam uh-a, thukhunte leh heencipnate-tawh kuamah thukhen lozaw-uh ahihman-in akip sunsunte naakpi-in kip-in muanhuai-hi.

Biakna sung-ah panmun tuamtuam-tawh pawlpi mite zolbawl leh khihbawllo ahihman-in panmun-tawh buaina tuak ngeilo uhhi.
Hihte-tawh akilehbulh-in minam kikhenna leh kideiidanna apiangsak pastor akici mite-pen:

Disqualified pastors te’ ngiimna-pen Pasian’ Kumpigam apauhlap-bek hi-a, amau’ mualsuang leh ankuang dingbek azongte hi taangpi uhhi

Mualsuang leh ankuang ahihman-in ama’ pawlpi mite mundang-ah apai-loh nading-in naakpi-in khaam-hi (social interaction khaaktan)

Pawlpi mite humtuam paihtuam nei-a, kitawng kiseel omleh ama’ thuthu mang ding-a a-upmawh zawkpen panpih pah-in thu langkhen ziauziau uh-a, nupa kitawng omleh azawhngaap zawkpen pumgup pah-hi. Nupa kopkhat sung-ah akhatzaw azawhngaap phatkeileh nupa kitot nading-in lamsialsak theilaai uhhi

Pasian-in mikhempeuh suahtaakna pia kimlaai tuabang pastor akici te-in amau’ pawlpi mite gaapcip-in khihcip uh-a, “hiate-tawh kiho loding, hiate’ inn-ah hawh loding., ” cihte-a kipan thukhun tampi-tawh heencip uhhi.

Pasian’ Kumpigam’ ading pauhlap bektawh amapang ahih nungsang-in amaute’ kam mahmah pan-in zuauthu leh zuau phuak-a mi gensiatna pusuak tawntung-hi.

Amau’ molhtum-a zat theihding-a akoihte ahihleh avaal akaan-in pumphat uh-a, tuate’ sumpi leh sehsuahte maantak-in la ngiatngiatlel uhhi.

Mi maaivil dingleh migensiatding olsak mahmah uh-a, Pasian’ min thaangzat mahmah ahihman-in amau’ cihbang acilo mite “dawi” bang-in mu-pah giapgiap uh-a, mihingpen vanzat bang-in seh uhhi

“Biakna bekbek” ci-kheem uh-a, amau’ thuneihna akhan nading leh akip nading-in politics kimawl uhhi. Akam uhtawh “Minam vaai leh politic-pen Pasian’ Lampi-tawh kinial-hi” cihcihleh politics kimawlzia-tawh pawlpi mite vaaivaan-in pawlzong ahihman-uh’n kidemna leh ki-elna a-omloh phamawh hongsuak-hi.

Politics kimawl-uh ahihman-in mi khatpeuh aletcip nading-in panmun tuamtuam-tawh zol uh-a, hunkhat ciang-in panmun kilaihna/kikheekna omleh thusia-in zuulzuih pahciatciat lel-hi.

Hihbang pastor te’ ziak-in minam naakpi-in kitamzaan-a, amaute’ ziak-in bangmah theilo taangpite-in “biakna leh minam-vaai akido sa” uhhi. Moses’ Laaibu 5 teng khempeuh Israel minamte’ minam kalsuanzia leh vaaihawmzia akiciaptehna ahih ziak-in hih “biakna leh minam-vaai kido” cih uplehsaanna-pen akhial-in I-ciamteh dinghi.

Asiahuai zawtham khatpen, leitung khatna atung khinsa Zomite’ lak-ah pawlpi phuhna ki-ultungsak lualiang-a, aciillam-in “tuipi gaal-ah” ci-in kikhawmkhawm liailiai saamnapi-in mualsuang-mah kiphut tangtang-hi. Khua lam-ah kuama’ theihzong hilo, bangmah hilo, gam nihna-ahzong kuama’ phawkkhaak hilo, neektawmzong leltak-mah gamthumna atun ciang-in amah apawlpihding khatle-nih atheih man-in hong kipan giapgiap pawlkhatte’ ziak-in minam naakpi-in kikhenthaang-hi.

Tuabang mite-in Laai Siangtho mahmahzong theilo, gina simngei ngaplo hong kipat ciang-in atung-a disqualified pastors I-cihte’ sang-a asiahuai zawtham politics kimawlna hong bulphuh-uh ahihman-in amau’ kiang-a kikhawmlo mi peuhmah bangmah-a simlo, langbawl, elbawl, haza cihte hongvawh uh-a, minam kikhenthaang bekthamlo ki-gaalbawlna ciangdong hongtun thei-hi.

Pastor te’ ziak-in minam kikhenthaang lo-a, pastor cinglo pastor kineih mite’ ziak-in minam kisia-hi. Keima’ mimal muhna ahihman-in thudam-in kikupding I-ki muak uhhi. Zokhai