Minam kemcing Upadi (Law – Dan, Ngeina) – 2

Minam kemcing Upadi (Law – Dan, Ngeina) – 2

Kipi kitenna tawh kisaiin Kawlgam ngeina sung ah ngeina leh biakna in ukgawplo-in aki-it akingai theite mimal bulphuhin biakna vai kihel lo-in zong kiteng thei a, maanlo hi kici tuanlo-in Kawl ngeina, Zo Ngeina tawh kibawlin kibawl kei taleh ngeina tawh kituaklo hi, kiteng theilo ding cih omlo hi. Akiteng dingte phuggyi gawm, Pastor deihsak, biakna ngeina upadi (law) tawh kituakding,mihaute vaihawnsak ciangbek a akiteng hilo hi. Zineih taneih pen biakna ngeina upadi tawh kituak bek kiteng thei ding cih hituanlo a, akingai akiitte kiteng hilel hi.

Biakna neih man a zi leh pasal nei hilo-in mihing hihna hang a zinei pasal nei kihizaw hi. Khan khat sungin zi khat, pasal khat bek kinei hileh hoihpen hi. Kawlte in pasal 2/3 neih ding phallo napi zi 2/3 neihkhawm thei hi. Tua bang veve, Muslimte in zi 2/3 aneih banghangin khaktan sawm ahiam? Zomite zong Malay, Delhi, USA, Singapone paiin Living Together-Inn khat ah tengkhawm, zilehpasal bangin omkhawmsa hinapi Kawlgam hong ciah leh zi leh pasal nei nailo bangdanin om khem tampi om hi. Zomite in zi 2/3 neih genloh, papi lawmngai khate zong kimuneu a, kamsiatna hi, misiatna leh neihlehlam kiam kipatna hi kici hi.

Atawpna ah Minam Kemcing upadi (law) pen Kawlgam buaina kipatna hithei kha dinga, U Nu hunlai bangin Tualsak mite in Kawlte muanlahna hangin gal kihona om thei ding hi kici hi. Kawlgam sungah minam leh biakna ah suakta hi kicipen tu-in Buddha biakna leh Kawlte simloh, adang minamte aa dingin lungmuanna omlo tawh kibang hi.

Lang Khan Khai
Editorial
Zomi Times