Minam itna ~ Lian Tuang

Minam itna ~ Lian Tuang

Zomi it le Zomi langpang, Utong kineih va-ak cih kammal pen tu lam ciangin kigen zelzel ahih manin minam itna tawh kisai ka ngaihsutzia tawm ong sung nuam ing.

Minam itna cih pen lungsim nasepna ahih manin kimu theilo hi. Ahi zongin mi pawlkhatte in gamtatna tungtawnin itna kiteh ahih manin I minam itzia khat le khat kibangkim theilo suak hi.

Minam itzia namnih

a ) Tangval Moses

Aminamte a it luat manin Moses in mi nangawn that kha zezen hi.

Kam dang khat in genleng a minam a it manin midangte mudah lawh liang hi. Gal neihlawh hi.

Thatang suangin minam ading gamh tat mahmah hi. Thangpaihna khasiatnate bulphuh in a minamte lainat mahmah hi. Minam itlua kisa in kuakua tungah khutkhialh bankhialh ding nangawn kizo mahmah hi.

Hih pen Khangno lai Moses minam itzia I ci nuam hi.

b) Khangcing Moses

Moses ong khangcin ciangin a minam itna kikhel tuan lo a, ahi zongin a itzia kikhel hi.

A mipite suahtakna dingin midangte tawh kiho kizop ding hamciam zaw hi. Minam itna hangin kuamah muhdah sawm lo hi Thatang suang masa loin thu le la tawh pang zaw hi.

Hih pen Khangcingkhin Moses minam itzia I la nuam hi.

Nam tampi om

Ami kibangin kalsuanzia namnih azang pen Moses ahi hi. Minam itna pen mi khempeuh in I neihloh a phamawh thu hi a, ahi zongin I itzia pen nam nih bek hi loin namtampi a om thei dingin a lamen ka hi hi. Lian Tuang