Mihing khat ii man (manphatna) ~ Dong Mung

Mihing khat ii man (manphatna) ~ Dong Mung

Hun khat lai-in tangvalno khat in pilna tawh kidim puteek khat kiangah mihing khat ii man(manphatna) bangzah hiding hiam, ci-in a dong hi. Puteekpa in tangvalno pa dotna dawng loin suangtum (khuttum cia/suang manpha) khat pia a, bangzah man ding hiam cih a theihna dingin mun tuamtuam a va dong kawikawi dingin a sawl hi. Tangvalno pa in zong phunlo paulo in tua suangtum la-in a paikhia hi.

Vanzuakna pi(Bazaar) ah hong pai-a, Seekkhum(Orange) kizuakna ah a dong hi. Seekkhum zuakna aa te in Seekkhum pum 12 tawh khek dingin a gen uh hi. Tua ciangin tangvalno pa in a zuak taktak ahihlohna le a man zah a thei nuam bek ahihna thu genin a paisan hi.

Tua khit ciangin Singgah-Theipuam zuakna khat ah a dong leuleu hi. Tua aa te in Aluu ip khat tawh khek dingin a gen uh hi. A tung a a gensa mah bangin a zuak taktak ahihlohna le a man zah a thei nuam bek ahihna thu genin a paisan leuleu hi.

Tua vanzuakna pi (Bazaar) sungpan a gamla lo mun khat ah Kham le Ngun kizuak kileina mun khat ah a tung hi. Tua mun ah a dot ciangin tua mun aa te’n sum teng 50 in lei ding a gen uh hi. Tangvalno pa in a phallo danin a lu a pei mawkmawk leh teng 100 a lei dingin a gen uh hi. A tunga a gensa mah bangin a zuak taktak ahihlohna thu le a man zah a thei nuam bek a hihna thu genin a paisan hi.

Tua bangin damdam in a man a khan semsemna thu a muh ciangin tangvalno pa lawp mahmahna tawh hong pai leuleu a, Suang manpha le Ngun le Kham kizuakna phualpi khat a tung hi. Tua takah a lah ciangin tua mun a nasempa in tangvalno pa suang tawi pen puansan tung khat ah koih in kimvel kawmkawm in enen mai a, a khut a kawngah koih kawmin, “Hih na suang koipan a a ngah himawk hiam?

Leitungbup phial zuakin lei ding hileng zong kilei zolo ding hi. A man kiciangtan zolo hi,” ci-in lamdang sakna tawh a gen hi. Tangvalno pa in bel a tunga a gensate mah bangin a zuak taktak ahihlohna thu le a man zah a thei nuam bek ahihna thu limtak genin a paisan hi.

A sawt loin pilna tawh kidim puteekpa kiang hong tung kik hi. Tua ciangin suangtum tawh kimemat in a paina mun tuamtuamte Seekkhum zuakna, Singgah-Theipuam zuakna mun, kham le ngun zuakna mun, Suang manpha le ngun le kham zuakna phualpite a a tuah thu piangte a gen khit ciangin mihing khat ii man bangzah hiding hiam, cih puteekpa a dong kik hi. Puteekpa in, “Na dotna ii a dawnna na muh, na tuah thute in hong gen mang khin hi,” a ci hi.

Ahi zongin tangvalno pa in telcian zo taktak lo ahih manin puteekpa in hibang in a genbeh hi.

“Nang pen hih suangtum bangin man kiciangtan zolo khat na hiding hi. Ahi zongin mihingte in amau sum le pai zonzia; pil le siamzia; theihna le muhna zia; a thuak a phut khak uh nuntak zia; ngaihsut zia le thupom zia cih bangin amau muhna le khensatna ciang tawh kituakin na man hong seh/ciangtan kha ding uh hi. Kammal dangin gen leng, a kibanglo amau tawi khaina tawh tawi hong teh ding uh-a, tua tungtawn in na man hong seh ding uh hi.

Ahi zongin lunghimawh ken! Suang manpha le ngun le kham zuakna phualpi mah bangin nang ii a kiciang theilo na man hong theisiam mite tawh na kituah khak hun hong tung ding hi. Mihing khempeuh eimau mun ciat ah a kiciangtan theilo man kinei ciat hi. Tua ahih manin nang ii man phatna hong theihpih lo, hong thusimsak lo mite kiangah man tawm takin kizuak kha kei in.

Nang le nang na man khangsak semsem kawmsa in na mainawt den in. Ni khat hun khat ciang nang ii manphatna, nang ii thupitna hong theician, hong theisiam mite tawh na kituak dinga na nuntakna hong nuam ding hi,” ci-in a hilhcian hi.

Tua ciangin tangvalno pa in zong telcian mahmah ta ahih manin ama manphatna a theihsiam saklo mite, amah a awlmawh lo mite kiang pan paikhia in, ama manphatna le thupitna a thei mite tawh kithuah kikhawl dingin a khensat hi. Tua pan kipan in a nuntakna sungah lungnopna, maitaina, nuamna le gualzawhna tawh a maban a zomto ta hi.

Thapiakna

• Na manphatna kitelcian inla, lawhcinna lam ah kalsuan in!
• Na manphatna kitelcian inla, thu nengnote hangin thanem kha kei in!
• Na manphatna kitelcian inla, na lianpi sepsawm in!
• Na manphatna kitelcian inla, gualzawhna lianpi ngah sawm in!
• Na manphatna kitelcian inla, lawhcinna bucing ngah sawm in!
• Midangte in amau tawi khaina tawh hong teh in hong neumuh kha phial zongin nang in a kiciangtan theilo man tampi a man a thupi mahmah a manpha mahmah mihing khat na hi hi.
• Thanem kenla, mainawt in…

Lungdam, Dong Mung (4 September 2018)