Mihau te thusim ~ Saimon Timothy

Mihau te thusim ~ Saimon Timothy

Mihau te ahauh theih na bulpi – Mihau te ahauhna leh mizawng te tawh hong kikhensak na pen namkhat in genni cileng pawlkhat ten akamphat man uh hi e cimai thei ding hihang, go luahsuk ahih kei leh thanop man hi zong cithei tek ding uhhi. Hih te hang hilozaw in ahang taktak genni cileng pen uk siamna zatsiam na (leverage) hi aa lever cihpen suangtumpi kalh na ciangcihna hi lel in, suangkalh na lozong adang kalhna tuamtuam zong om thei ding a tuabang aa kalhna ciang zat ciang in ih khuttawh suang ih domtoh sang in akalhna ciang tawh kalkhia to leng ih tha hongdawnzaw bek hi lo huntomno sung in ih kalhnop suang kikal khia zoziau thei hi. Tua hi aa Leverage cih pen suangkalh khiat ol na ding aa ciang zatsiam cih na himai hi.

Lehlam pan in genni cileng Leverage cih pen Mankang ten (Maximum productivity with minimum effort) ci in atawmthei pen zang in atamthei muhkik na cih na hi lel hi. Na khatpeuhpeuh zatsiam na leh muhkhiat tam theithei a sepkhiat theih na kici thei ding hi. Gentehna genpak le hang Suangtum khat pen ih khuttawh kalhkhiat sawm le hang kitawl baih in zong kigim in kikalkhia zo lo lai ding hi.

Tua hi lo a siktawn hiam ciangtawn hiam khat peuhpeuh zang in kalkhia leng ih tawlzong dam zaw in olno tak leh hun tawmno khat sung in ki kalkhia zo ziau thei hi. Tua ih vanzat ahi Ciangtawn ahih kei leh Siktawn pen lever cih na hi lel a akalhkhiat pen leverage cih hilel aa azatkhiat siam na cihna ahihi. Tua hi a mihau ten leverage azangsiam lo omlo ding uhhi. Ei mimal kim in zong leverage ih zangsiam hiam, ihzatsiam loh manin zawnna guam sung ah om ih hihiam cih kidong le hang.

1. Mihau ten a khat na ah nasep (work) na tawhkisai en leng, midang te tha pen zatsiamsak (leverage) mahmah uhhi. Genteh na in ah niangtuisai nih om hi. Niangtuisai khat zaw ah pen amah in sepding teng sem in niangtui dawn hongtam bangciang buaithei mahmah hi. Niangtui hongdawn te na ngawn hopih hithiat na ding hun neivet lo hi. Pawlkhat ten ngak zo lo, pawlkhat alungkim bangtaktak zo lo cih bang in aleiding te hong om uh aa aciahsanzong hongom ciang hong buaihuai mahmah ta hi.

Hi bang aa amau leh amau bek mah buaicihtak abuai te pen bottleneck of business kici hi. Niangtui sai akhat leuleu in nasem cial in aman hoihtak in uk hi. Tuabang ciang in mi lungdam sak in alei atam nak leh meet mahmah ding cihna hi mai hi. Hihpen midang tha zatsiam uksiam(leverage) na ih cih ahihi. Company mihau te leh sumbawl mihau ih cih tenpen akhutnuai ah nasem hau thei mahmah uhhi. Banghang hiamcih leh midang te tha leverage dan siam uh a, amawk na in mi nasemsak cih na hituan lo in, sum leh pai mahtawh nasepsak dan siamcih na ahihi.

2. Anih anih leh Hun (Time) tawhkisai hi a, hizong pen midang tha ih zatbangdan mah hi a, mi hunneih zatsak siam na hihi. Gentehna in ah nikhat in ihnasep na pan sum 1000 ngah ih hihleh, ih innkuan pih ten daivat ding kisam, vokinn bawl ding kisam hongcih ciang in, nikhat 1000 sang atawmzaw in mi ih cial zawh ding leh mi kicialsak thei hi. Tua mi ih cial hunsung in ameet zaw ding nasep kisepsan thei hi. Tua pen midang te hun leverage sak cih na hi in, ih nasepding pen nuamsa ih hihkei leh seplohpha mawh cihbang ahih kei nak leh midangkicialsawn thei lelhi. Tua pen delegate zong kici hi. Tua hang in mihau ten innsung puah, mawtaw hawl ding mi alak na uh pen athadah man uhzong hi pah sam lo uh aa tuasang in nitha tamzaw theiding asep nopman un midang te tha leh a hun uh a leverage sak uh na hi zaw uhhi.

3. A thum na ah siamna theih na ( Knowledge) tawhkisai hi a, midang te siamna theih na te zong kizang thei hi. Mihing te pen kiciangtan thei mahmah in mikhat in na khempeuh kisiamkim gai thei hetlo hi. Hun in zong hong daih lo thei in tuahun tak ah mipil ten midang te pilna theih na siamna te zangthei uhhi. Robert Kiyosaki in “ Mipil ten amasang in apilzaw te sawl den” ci in, Elon Musk in “ Kei bel Harvard Universty sang ah kakah loh hang in kanuai aa nasem te bel kahkim uh aive” acih na zong hih hang mah ahihi.

Amau sang aa pilsin na tungtuang te khawng zangthei mahmah uh hi. Ih khutnuai ah nasem in ih koihzawhkei le zong amaukiang pan kisin behthei in, huntomno sung in honghilhthei ding ahih nak leh hun tampi ki meet ding a huntampi bei lo ding a kimeet zaw ding cihna ahihi. Mi lawhcing te in kizop na (Network) hoih nei uh a, meltheih cih bang, a team in cih bang, nasem cih bang in mimawkmawk hi lo in mipil, misiam ten alawhcin na dingtampi tak in huhthei hi. Tuapen misiamna mitheih na uh a leverage sak siam cih na ahihi.

4. A li na ah sum (Money) tawh kisai hi aa, sum pen ahoih lam leh ahoih lo lam in sum leitawi ki la thei hi. Mipawlkhat in sum leitawi la in Mawtaw, cycle cih bang kumkhua sawtkidaih lo ding sawt kikhawm lo ding leina in azatlai tak in, mihau te ahih leh amau ading in phattuam na apia thei beklian ading in sum leitawi la uhhi. Nasep kipat na ding in aneihsa sum kidaih zo lo ahih man in sumleitawi suk diap thei veve uhhi cih na ahihi.

Leiba zong ahoih leh ahoih lo na om veve in ih leibat sum bang ah, koi ah zang ih hihiam cih en leng, Mihau ten asum uh peipungsiam meetsak dan siam mahmah uh a, tua ding in aneihsa sum kidaih zo lo ahih man in tua hang in sum leitawi la uh a, tuapen amau hamphat na ding meet nading bek in peipungthei meetsak thei uh a % ameet tampipi tawh asum bat uh loh zo lel uhhi. Tua pen midang te sum a zatsiam leverage sak dan ahihi.

5. A nga na ahih leh Technology tawh kisai hi a, Technology cihciang in phone, email, facebook, youtube, website cih akipan genna hi a, tuakhempeuh leitung khantoh tawhkizui aa hongpiang kizop na tuamtuam te zatsiam mahmah uhhi. A hunhun in technology tuamtuam hongpiang toto in ahunzui aa hongpiang te azangsiamkhempeuh pen mihau te hipah lel uhhi.

Tuhun laitak bangin genleng thuthak tadensa(News) leh Redio cih te pen tawmbang in khanglui vai hongsuak kik pian nuam in, digital leh video te hipian ta hi. Genteh na in ah mikhat in apualam ah ataktak in mi(50) bang (tentan) thusinna apiaktheih lai takin , Zoom video pan hiam, video khat peuhpeuh pan piathei khat in tampipi pia thei zaw aa, a en thei khempeuh in aettheih ding in zong koih thei hi.

Vanzuak na akipan ei ading in ahoih lam in kizang thei in, tuapen mihau ten azatdan na siam mahmah uhhi. Tulaitak bang pen email pan ahizong blog pan ahizong thuthak kizakna tadensa( news paper) bek hi lo in, thuthak tuamtuam sim theihna hongbawlkhia in kizang ta hi. Applicition khat peuhpeuh ei ading in ihzatsiam kei leh midang ading in akizatsak tangtang hongsuak thei hi. Mikhat in aseptheih pen tawm mahmah in ki ciangtan (limit) a, hun inzong hong daih lo hi.

Tua hi a midang leh van na tuamtuam ih zat siam theih na te in hauh na ding leh khantoh na ding bek hi lo in, tua tak ah akinga hi zaw hi. John D.Rockefelle in “ Ka siam na 100% za ah za kazat theih sang in midang 100 te siam na 1% za ah khat zatsiam ding tel zaw ingh” ci hi. Cihnop na ah midang te siamna theih na te leverage siam ding telzaw ingh cih na a hihi. Tua hi aa mihau te ahauh na pen kammal khat in genni ci leng Leverage zatsiam hang ahihi. Saimon Timothy