Midik tang leh gupna tanlo, midik suak leh gupna tan ~ Evan. Suangh Dal

Midik tang leh gupna tanlo, midik suak leh gupna tan ~ Evan. Suangh Dal

Jesu Khrih tan pa le Topa in um-in sangin tui i kiphum ciangin midik a kitang maw? Midik a kisuak? Midik suak cih pen Mangkam in “infused righteousness” kici a, midik a kitang pen “imputed righteousness” kici hi. A nunung pen Council of Trent khawmpi ah Lang nih tuakin Diktanna (justification) pen hehpihna hanga upna bek tawh hi, cih thukim tuak uh hi.

Ahi zongin tua upna tawh dikna pen a kisuak maw, a kitang cih thu ah hong kithukim thei nawn lo hi. Protestant lamte in midik a kitang hi zaw na ci-in RCC in midik a kisuak hi zaw veh aw hong ci ta hi. (Council of Trent: Sess. 6. Ch. 8 Can.24) – upna tawh midik a kisuak hi loin, a kitang hi cih thu a hilh teiteite in hamsiatna ngah ta hen. Let him be anathema.” ci-in na tangko giap uh hi.

Midik a kitang: Martin Luther in mawhnei mi dik a tangte na ci hi. The justified sinners. Christian thu-umsa mi khat in upna tawh dik a tang hi bek a, Jesu bang lian-in midik a kisuak bak hi lo hi . Tua diktanna pen za ah za, zanni tuni zingciang kikhel ngei loin a kip ahi hi. Upna tawh na ngah Diktanna pen khua hun a sat a vot teh bangin kiam zel khang zel hi loin a kho tawntung ahi hi. Topa’ lam pan hong piak pen a kip ahi hi.

Midik suak kihi loin midik tang a kihih zawk mah bangin i pianthak ma-a mawhnate i pianthak khit ciangin khialhna ci-in laih phei theih pongmawk zong hi loin mawhna mah ahi hi. Tua ahih manin i pianthak khit ah mawhna a kibawl kha zelzel lai thei ahi hi. Tua i bawlkhak zel mawhnate in i ngahsa diktanna a hemkhia thei ngei hi nawn lo hi. A thupi pen upna tawh dikna na tang khin takpi mah hiam cih lam hizaw hi. Have you been truly justified by faith?

Justification pen 100% a kip hi-in ahi zongin sanctification ahi i Christian mimal nuntakna ah kiam thei khang thei mah hi. Tua a kiam thei a khang thei pen in gupna hong tansak ding hi nawn lo hi. Backsliding cih pen a om thei hi-a, ahi zongin ka midik mi ka phong kik ding hi Topa in ci hi. Apostasy a puk kik mi ci-a Hebrews 6na sung khawnga a gen pen diktanna a ngah ngei vet lo, a piangthak takpi ngei lo a min pua Christian te a genna hi bek hi.

Mi diktang theology le midik suak theology a kibat loh mah bangin, Backsliding le apostasy zong kibang lo hi. Christian te midik a kisuak hi loin midik a kitang bek hi-a, Christian te puk kik (apostasy) takpi ngei lo dinga, Backsliding tawmvei sung nungtolh cih bel om thei hi.

Midik suak: na upna tawh midik a suak (infused righteousness) hi mawk na hih manin na gupna tan leh tan loh ding pen nangma khut sungah a om vilvel hi ta hi cih thu hi. Midik bang a suak velval hi ta na hih manin mawhna khat na bawl leh gupna a tan hi pahpah cih thu hong suaka, tua adingin thoih kik nading zeksah sagihte tungtawnin Siampite piak theih mawhmaisakna kisam sak uh hi. Siampite in thupha a piakna tawh Nekkhawm hun bang ciangin Khomun pen a sa taktak, lenggah tui pen a si taktak hong suak kik hi cih bang pen gupna tan kikte adingin Jesu hong si kikkik a suak sak ahi hi.

Jesu Khrih in eite tang dingin a luzang pan a khetul dong mawhlawh na tawi hi. Tua hun laitakin Jesu Khrih mimawh a kitang sak hi-a mimawh a suak hi lo hi. Tua mah bangin ei Christian thu-um mite zong Jesu dikna a kitang bek hi-in midik a kisuak hi to pah lo hi.

Midik a kisuak hi mawk leh dikna kitan kik thei mah ding hi. Banghang hiam cih leh i Christian nuntakna ah mawhna kibawl lai tek lua mawk hiven, hemham geuh ve uh cin. Diktang cih pen mi mawhpi mah midikin hong ciamteh cihna hi photphot hi. Tua ahih manin mimawh mi, diktangte hi hang cih thu i tel mahmah a kul ahi hi. Mi dik i tan ma-in mawhna in hong that that-a, midik i tan khit ciangin mawhna a that that pan ihi hi. Mawhna i vui lai kul ding hi.

Pasian’ mai ah i dinmun pen midiktangte kihi-a, i mimal pen mimawhte mah kihi lai phot ahih manin, nitak i lup ding teh thu um mimal Siampi za tawh “Topa aw tuni-a ka mawhna te hong mai sakin” ci-a thu i nget zelzel laina pen gupna tan kik pak ihih manin gupna i ngah kik pak nadingin thu ngetna hi nawn lo hi. Tate in Papa tungah hong maisak in cih theihna khuan hi zaw ta hi.

Midik tang mite’ nisim mawhna pen gupna tan nading tawh kisai nawn lo hi. Midiktang mite thungetna gupna ngah kikkik nading tawh kisai sansan nawn lo hi.
Midik suak mite’ nisim mawhna pen gupna tan vai vive suak ta hi. Midik suak mite thungetna pen gupna ngah kikkik nading vive suaksuak hi.

Tua ahih manin ei Christian taktakte in midik kisuak hi loin midik a kitang hizaw hi cih thu… “Ama’ dikna puanpak silh-a ka thawh ciang…” Justification is not by infusion. Justification is by imputation. Midik suak kihi loin Midik tang kihi zaw ahi aw. Midik kisuak hileh gupna kitan thei kha mah dinga midik kitang hi zaw ahih manin Gupna kitan lo hi. Diktanna i cih cih, Evan. Suangh Dal