Michael Jackson tung panin Thalakna

Kum 50 bang a nungta Michael Jackson mi khempeuh in a minthanna Lasiam Lamsiam cih in i thei hi. USA gam Indiana ah August 19,1958 in suak aa, June 25,2009 in si hi. Unau pasal 3 leh numei 5 pha uhhi. A pianna inn uh pen lupna munnih( two-bedroom) nei uhhi. A nu leh pate pen Sila nam, pemta mi ahi uhhi. A pa in Setzung( Factory) khat ah na sem hi. Inn neuno khat sung pan a khang khia mikhat ahihi.Pasian thu um mah ahi uhhi.

“King of Pop” cih min kipia liangin, leitung ah pop culture a minthangsak leh entertainer, artist khat ahihi. Tua bek zong hilo in hip hop culture, contemporary R&B leh rock cihte zong lawhzo mawk hi. Lamdan ‘robot’ leh ‘moonwalk’ kici te ama patkhiat ahi hi. Leitungah mi lamdangpi khat ahihi.

Michael Jackson tung panin Zomi khempeuh in thalakna lamin ngaihsun leng pawl khat om kha ding hi. Tu tadih in Zomite dinmun zong Michael Jackson nu leh pa te dan mah bangin pemta dinmun ah i om laitak ahihi. A pa pen pilna nei khollo Setzung ah na sem leltak i tapa pen Leitungbup minthang mawk hi. Pasian thu um ahih mah bangin a nu leh pa Pasian tungah citak thuman khat hi kha ding hi.

Leitungbup ah amin thanna dingin a pa in limtak in pahtah theilo himah leh Michael Jackson in ukna neih hi. USA gam sungah ukna, siamna, ki vak’na nei…cih bang ki thupisak mahmah hi. Lunglutna anei ukna anei cihpen mikhempeuh in nei na pi-in tupna taktak a nei ki tamlo hi. Inn neuno khat panin leitungbup ah amin thang mahmah hi-ing cih geel kholhna nei masa zong hi kha kei unteh. A hi zongin a uk khat uh limtak in zuihto ngiatngiat uh ahih manin matun uh hi.

Na uk bang hiam? Bang ut na hiam? I mailam hun-ah mi taktak i suak nuam hiam? Hanciamna, cihtakna neilo peuhmah matun cih om ngeilo hi. Leitungbup ah amin thang icih Michael Jackson a ki pan mihau mahmah sung panin a khangkhia tamlo hi. Nu leh Pa haukei, pilkei…cih bang paulam zong sese lo in ahanciam mi khempeuh adingin lampi tampi om hi. A diakdiak in Khangno laisin laiten bang tan ciang hiam na lungtup pi uh ki sit huaizel hi. Na nu leh pa tezong bangmahlo hi mah hi. Bang mahlo panin a khangkhia mipil mihau mi minthang leitungah tampi om hi. Tuate tangthu leh matut zia zong kanhuai hi. Mitung panin thalakna neihthei pah cih pen thupi mahmah hi. I phut khakna tung panin thala pan leng bang hun cih ki ngen theilo hi. Bang hi nuam na hiam?

Zomite hong Angvaan Pasian in Khangnote tungah Tupna ki cian hong guan zelzel hen. Lungdam.

Thawn Tuang
May 26,2015
Ka laigelh khempeuh>>www.zomi-angvaan.blogspot.com