Mi’ muan nam 3

Mi’ muan nam 3

Hihna sepna khatpeuh ahi zong in, ommuan mahmah ahi zong in midangte in amuan’ amuanhuai hih ding thupi leh uthuai mahmah hi.

Muanhuai hihna ding leh mi’ muanna ngahna ding pen hihna mah tawh hanciam ding kisam ahi hi.

Ahi zong in mite in bangci dan a ong muang uh hiam cih zong thupi zawlai hi. Muanna veve ahih hang muandan kibang lo leh a kikhai mahmah nam 3 om hi.

1) Amau hihna khempeuh ah a dinpih a panpih ding, amau a tawisang a domsang den ding, a deihbang uh a zattheih ding, sawltheih ding leh thumang ding a ong muan’ ihi hiam?

2) Amau tawh nasem khawm, khut kilen a mapang khawm, dingkhawm, khat le khat tha kipia tuah, kipanpih, nop leh haksat hun a ki-nusia lo ding a muan’ ihi hiam?

3) Amau a makaih ding, a kingak ngam nading, a nungzuih ngam ding, amau ahuu acing akem ding, amau haksatna leh thanemna ah akem ahuai avaan zo ding leh akem ahuai avaan takpi ding a muan’ ihi hiam?

“Mite’ muan’ mikhat hi” cih ciang lel tawh hihna taktak kitel lo hi.

• 1) “Sila muan”,
• 2) “Lawm muan”,
• 3) “To muan”

cih om a koipen dinmun ah om ihi hiam? ki-ngaihsut ding in lunggulh huai hi.

Tu ciangciang Zomite “midang namdangte in ong muang” icih ciang a tamzaw 1na hizaw a, 2na pen pawlkhat a omtei hang tam nailo in, 3na bel a om nailo hipian mai hihang.

Zomite midang namdangte in “To muan” a a muantheih i hih ding lunggulh huai, hanciam huai, kipattah kilapsang huai mahmah hi. Pau Khat Suan