Mi Minthang vs Mi Huzap ~ Pu Thangboi

Mi Minthang vs Mi Huzap ~ Pu Thangboi

Ka khangno lai in mi minthang (famous person) hih ding ka ut mahmah hi. Kei’ thu bekbek aciang aciang ah mite’n agen ding khawng ka ut mahmah hi.

Ka kum hong tampian ciang in mi huzap (influential person) hih ding athupit zawkna ka theita hi. Minthanna ih cih pen meikhu bang hilel a, theng baih mahmah hi. Ka khangno lai a ka een mahmah mi minthang tampite tu in atun abanna uh kithei nawnlo hi. Amin apuam uh zong ki zakha nawnlo hi.

Mi huzapte leuleu pen minthang vanghvangh khollo uh hi. Asih khit ciang bang un kiphawk semsem hi. Amau’ hang in mi tampi in nuntak lawh hi. Mi tampi in lampi man atot theihna ding in lamlak uh hi.

Mi minthang atamzaw in ngia lungsim nei lel hi. (Pasian’ nasem nangawn pawlkhat kihel hi). Mi minthang te’n mite’ mailam ding sang in ama’ mailam mah khualzaw lel hi. Mite’ gualzawh leh gualleh thupi masalo in amah agualzawh ding thupi masa sakpen hi.

Mi huzapte leuleu in mi’ gualzawh matut ding deihsak ngiat hi. Anngawl liang mah in mite huh nuam uh hi. Ahuh mite lawhcing peuh leh alung uh kim mahmah hi. Kuamah in zong akhan sung un phawkkha khollo hi. Asih khawng uh ciang amanphatna uh kiphawk sansan pan hi.

Zan ni (February 24) a hong nusia Siapi Thang Suan Dal kaphawkna in hih lai kagelh ahi hi. Mung Laan Thang (Tawmvei, Zangkong)