Ka mipih Zomi khempeuh tungah hopihna lai ~ Rev. Dr. Thang Cin Lian

Ka mipih Zomi khempeuh tungah hopihna lai ~ Rev. Dr. Thang Cin Lian

Topa Pasian min tawh kong hopih kim hi. Leitung gam tuamtuam a om Zomi khempeuh Topa Pasian in thupha tawh hong ompih kimciat tahen.

Tu laitak leitungbup in ih tuahkhak Covid-19 Natna hangin leitungbup kilinglawng in, natna leh sihna tampi ih tuak hi. Kawlgam ah Tedim pan in Natna kimukhia masa penpen a, mihing ngaihsutna ah lamdang ih sa ciat hi. Tua bek thamlo-in midangte in hong ngimneih in hong lipkhap liang uh hi. Hong it dingin ih lamette in zong hong itlo, hong huai dingin ih lamet e in zong hong huailo uh hi.

Leitung lungsim tawh ih ngaihsut ciangin ih dipngek na in, ih khasiat suak a, ih khitui luang hi. Dah in,kap in, ih thuum hi. Ahizongin Pasian theihloh in apiang thu khat zong omlo a, Ama theihna nuai a thu piang vive hi ci-in eite upna leh muanna ahihi. Tua ahih manin hih Covid-19 in ei Zomite aadingin mawh kimai sakna, ki-itna, kipum khatna ahi dingin ka lamen hi. A kithehthaang, akikhenthaang Unau khat teng nulepa innpi ah ih kigawmtuah kikna hidingin ka lamen hi. Pasian Aminthang tahen.

Tua hi a, hih Natna tungtawn in Zomi khempeuhte tungah Philip Schaff ii gen kammal(3) tawh tha la khawm dingin kong zawn hi.

1. In Essentials Unity: Zomite masuan maban ah vailian tampi masuan hihang. Tua ahih manin Vailian/vai thupite ah kipum khat ding hihang. Biakna(Denomination) bulphuh keini, Behlephung bulphuh keini, munlemual bulphuh keini, khualetui bulphuh keini. Ih vekpi in awkhat-lawngkhat, khutkhat tawi-khekhat khai bangin, pang khawm ding hihang.

2. In Non-Essentials Liberty/Freedom: Zomi bup tawh akisai ahilo, Pawlpi vai,…etc. vai tuamtuamte ah amun amual zui in suahtakna ih kipiak ding zong thupi hi. A munmun aphualphual ah suahtakna kipia in, kithupi sim in, zahtakna kipia ding hihang.

3. In All Things Charity/Love: Bangbang ih sem ih bawl zongin Itna, thuman cihtakna,sianthona te bulphuh in ih sep ding, ih vaihawm ding, kal ih suankhop ding thupi ka sa hi. Na khempeuh ah Itna, hehpihna, thukhualnate bulphuh in mapangin nasemkhawm ding hihang.

“Topa in note thupha hong pia in hong kem tahen. Topa in note tungah amaitang hong taang sak in note hong ompih tahen. Topa in note tungah amaipha hong pia henla, note tungah nopsakna hong pia tahen.

Topa Zeisu Khazih hong hehpihna, Pasian hong itna, leh Khasiangtho kilawmtatna te in, Note khempeuh tawh hong omkhawm tahen.” Amen. Rev. Dr. Thang Cin Lian (General Secretary, Myanmar Baptist Convention)