Mi manpha Rev. Khen Za Sian

Mi manpha Rev. Khen Za Sian, DMin (Kum 67: Sih ni March 17, 2022)

Apa ahi Pu Vai Za Dal pen Pasian a zahtak, Pasian lampi azui, Pasian thu gen siam mahmah khat hi in ahizongin sia hihna leh zaa hihna a ngaihsun ngeilo khat hi a, tapa 4 leh tanu thum a neihna sungpan Sia Khen ka phawkna thu tawm ka gelhnuam hi. 1997 kum pan amah tawh ka kithei a, naupang, uham, mipil leh ulian kuapeuh tawh kikhawlh siam mi hi ci in ka ngaihsun hi.

Thuman gen ngam mi:

Thutang mi khat hi a, Kawlgam politic siacimit gamah amah dan thu tang a gen ngam ding haksa mahmah a, amah danin thu tangtakin a gen ngamte pen mite pahtawina sangin muhkhialhna tam ngahzaw hi. Pasian thu, gam thu, minam thute ah tangtakin thu gen mi hi ci in ka ciamteh hi.

Jesu min hangin bawlsiatna a thuak ngeipa:

Sawltakte upna bangin upna nei in kingaihsun ahihmanin hangsantakin Pasian na asepna mun tuamtuam ah mi khutlum/vuakna cihte zong thuak ngei himah leh khasiatna in a kampan gen ngeilo in teci apan hunah zong thuum ngeilo hi. A genna ah “ei zong ih hai gamtat hun omngei ahihmanin ih thuak ding zong Pasian in ong phal hi” cihsan lel hi.

UPC ut tinten hi:

Ze-etna leh thu tuamtuam hangin makai bullamte tawh nasep nopzia thu kituakloh hun khat ong nei a, makaite in UPC pan paikhia in a cih leh a dawnna thupi ka sa mahmah hi “UPC pen no ah dan in ngaihsun na hi uh hiam, no maimai hawlkhiat theih mi ka hingeikei hi” cihsan ziau hi. A nunung pen hu asan dongin pawlpi leh Pasian adingin mi citak hi ci in ka ciamteh hi.

Mipil omzia nei sa ing:

Yangon ah kum 7 val bang ka kikhawl kha ngei hi. Amah tawh kikhawl in vakna/hawhna khat peuh hun ah mi lamdang ka sak mahmah khatah mi thupi khempeuh tawh kilawmta mahmah hi. Gtn tuni vai na nei hiam ci in ph set bang hileng, tuni pen Israel ambassador pa in a birthday ah ong sam, French counselor tawh kimu ding, Siapi Hau Go zi Nu Luan Za Cing kiangah hawh ni, Sitnipa Pu Chin Sian Thang tawh vai nei ung cihdan mi thupi vive tawh a kilawmta mahmah mi thupi mahmah hi ci in ka ngaihsun hi.

Board chairman:

2011 kumin Zomi Bible Correspondence Course (ZBCC) ci in ih pastor honkhat LST sangkah manlote bulphuh in Zolai tawh BMin leh MMin degree pia in kum 3 course ka pankhia khawm uh a, Board Chairman hi in, course material dingin contributions tampi ong piakhia hi.

Founder and Editor:

Zomite thu cin thutang ih mit ong vaksak mahmah a minthang mahmah ahi “Zo Aw” news ong pankhia in amahmah in editor sem in nakpitakin mipi in ki hamphat lawh mahmah hi.

Khristian Labu:

Kum sawtpi Zomite in ZBC labu ci in ih theih pen Zomi Khristian khempeuh in ihsak khop English te in Hymns a cih uh hi a, pawlpi khatbek labu hilo in laphuak tuamtuam tampite ah a kikaikhawm hih Labu pen Khristian Labu cih tawh ong hawmkhia in solfa tawh ong thuah in, Zomi Khristian khempeuh ong gawmkhawm nahoih mahmah ong semkhia hi ci in ka ciamteh hi.

Lai Siangtho Bu Zomi Version:

2006 pan a kipat Lai Siangtho Bu First and Second Edition cih bangin ong hawmkhia zo a, a sep khat peuhpeuh a tangtun zo khat hi ci in ka ciamteh hi.

Principal lungsim zo:

Philippine ah M.Div leh DMin a sinlai in a siapipa (principal)lungsim a zawh theihna dingin library sungpan in a siapipa laibu gelh hoihtakin comment a bawlna tungtawnin tua laibu eipau tawh ong letkhia a, a siappipa lungsim khempeuh zothei hi.

Thu muhzia ciim:

Pasian thu bek hilo in ZOMI INNKUAN cih laibu ong gelhkhia a, Zomite tangthu, pau tuamtuam, beh min tuamtuam, namke tuamtuamte ih kizopzia ama chart tungtawnin Zomi sungah innkuan kizopzia ih mit ong vaksakin thu telsiam huaite ong lamlak khat hi ci in ka ciamteh hi.

Sihnuam Sihdan hampha:

2012 kum lai in zong Pansudan, Yangon niangtui sai khat ah a si khang in sibup ngei hi, tualai in a innkuanpihte Kawlpi ah om hi. Lamka lamah 2021 va zinto in gospel tawh thuahkawm hi Yangon a innlum a tun ciangin kuama kepkep khoikhoi kisamlo in ihmu ziau in a bawl ana asepsak Pasian angah ong tawlngak san ahihmanin mi hampha mahmah hi ci in ka ngaihsun hi. Topa Kha Siangtho in a zi leh tate, pawlpi mite leh akuamaciat ong hehnem ta hen. Amen.

More: Zomi Nam Ni ~ Rev. Dr. Khen Za Sian

Ka suunna:

Leitung ahihmanin dahna ih pulak hi, lung ong len mahmah hi. Ahzongin hih leitung nuntakna bangzah in haksa taleh tuate a thuak khanawnlo Sia Khen aw, ko a damlai Khazih sungah na sanggamten nong nutsiat Khazih nasep maban gupna ni a tumma hu ka sanlaiteng un maban na zom ding hi ung, lung nuamin na pai in. Jesu Khazih a muak dingin vankim lai ah kituahkik ni. Mangpha kimuhkik mateng, mangpha. Phawkna tawh laigelh, Rev. Dr. Suan Za Khup (Nashville, TN USA)