Mi hong muan theihna dingin ~ Hau Za Cin

Mi hong muan theihna dingin ~ Hau Za Cin

Mi khat peuhpeuh tawh ka kituah ciang ka phawkden khat pen mite in hong muang ding hiam cih ahi hi. Ka tuah mipa ka muang ding hiam, hihpa, hihnu mi muanhuai ahi hiam ka cih mah bangin ka tuahpa, ka tuahnu in zong kei pen ‘mi muanhuai’ ahi diam ciin hong sit ciauciau hi. Tua ahih leh i kigen hetloh, i pulak khiat hetloh hangin mihing i kimuh, i kiho, i kinaih ciangin i muanhuai ding leh muanhuailoh ding pen kisit, kientel ihi hi. Lungsim puakzia kitheihsawm cihna hi.

Mi pawlkhat pen i muh cilin hong liak phial ding banga, hong mangngilh ngei nawn kei leh kilawm liang hi. Ahi zongin a taktak in a kilimneih, a kineih, a kibawltawm pak na hi thei hi. Mi pawlkhat pen hong ngailo, hong hopih ngaplo, hong mudah hiphial hiam i cih om a, a lungsim takpi vuah hong it mahmah, hong khual mahmah, hong ngai mahmah na hithei kik bilbel hi. Tua ahih manin mihing lungsim tawng pen tel cihtaka tel dinga kisam thu hi a, a tel theite mipil hi a, a tel theite mi hampha zong ahi uh hi.

Mi lungsim puakzia theihna dingin a mittang et kilkel kul thei a, a gamtatzia pan zong hong kilangkhia thei in, a thugen pan zong kimankhia thei hi. Nang zong mite muan ding, mite hong muan nahih theihna dingin na kilakkhia thei a, mite hong itna dingin na lungsim tawng na pulakkhia thei hi. Hun tampi ah kam tawh kigen khempeuh lungsim puakzia na hikhinlo hi!

Gamtatsiam leh lahkhiat siamdan kibanglo a, lungsim hoihna zong kibawlpha thei hi. Zomi Paunak ah, “Melhoih kibawlpha theilo a, lungsim bel kikhel thei hi” ci hi. Mite hong muanna dingin kuamah ciat nisim, naisim, hun simin i lungsim i puah tohtoh a kisam ahi hi. “Kua mah a siamsa, a pilsa, a cinghsa a piang/suak omlo hi,” cih Zomi Paunak dang zong i nei hi.

Tua ahih leh mite hong muan theihna dingin:

1. Thumaan ding: Thudik, thumaan gen ding. A dik a maan in gamta ding. Kawi kaihkaihlo ding. Thugen khawng ciang zuau gen selna dinga thu kawi kaihkaih om thei hi, tua bang mite thumaanlo cihna hi. Zuau om kei leh thu tangtakin kigen suak thei a, zuau themkhat a kihel leh melhmelh, thoihthoih, zemzem kul hi.

Ahi bangbang gen suak pahpah leng thu nengkailo hi. Tua manin na kihopihte, na kikholhpihte in hong tel baihna dingin thudik, thumaan mah tawh hopih pah lel in. Na kikholhpihpa in thumaanlo hi cih hong theih khit ciang hong muhna khat kiamsuk pah a, bangzahta in na puahphat sawm hangin hong muhna na bawlphat taktak ding baihlo, hun sawtpi la hi. Tua manin thumaan pah lel in. ‘Khemna’ leh ‘zuau’ kibanglo hi cih phawk tawntung in.

2. Zahtak bawl ding: Mi khempeuh i hihna ciangciangah kithupisim, kizahtak bawl leng ki ut ciat hi. Kuamah kithuneu bawl, kisimmawh, kineu bawl cih bang ki ut lo hi. Nang na utloh mah bangin mite zong na ut hetlo uh hi. Zawhthawh thu tawh na bawl hangin mangngilh hetlo uh a, amau hun hong tun ciang nang zong hong simmawh kik lel ding uh hi.

A haute hau denlo, a zawngte zawngdenlo, a liante lian den lo, a niamte niam denlo cih mah bangin leitung pen a kilumletlet hilel hi. Tuni a na tungah guah a zuk loh hang ni khat ni ciang na tunga nisa meipi in liah in guahzu meikai in hong tuamcip veve ding hi.

Tua manin, ‘nang tungah hong kihih ding na ut mah bangin mi tungah zong na hih in’ cih pen mangngilh ngeiloh ding ahi hi. Mite hong hong thukkik loh hang ‘KEN ka thei hi’ a ci vangtunga Pa Pasian om ahi hi. Tua manin mite zahtakbawl, thupibawl, it bawl, ngaihbawl in.

3. Theisiam ding: Mite lungsim theilopi in ‘tua bang hi inteh’ ci ziau kei in. Nang upmawh banga a ngaihsun dingin tuat ziau kei in. Mihing khat leh khat ngaihsutzia kibang ngeilo hi. Midangte ngaihsutna na theihnop leh amau dot ding ahi hi. Na dot theih kei leh zong a gamtat dan hoihtak in en in, kan in thei in – a mizia na thei ding hi.

A kamgen, mite a hopih dan, midang tawh a kikholh dan pan en in a mizia na thei ding hi. Midang a gensiasia khat pen nang hong phatphat ding cih um kei in. Midang a phatphat khat in nang hong ko, gensia den dingin ngaihsun kei in. Na ngaihsutna bang hiam ciin tang dot veva pah ding bel hisamlo a, holim in thu tuamtuam genkhawm le uh cin a mizia na thei ding hi.

Tua manin mihing pen kihopih ding, kikhawl ding, holimlim ding – tua hileh kitheihsiamna, kitelsiamna om a, ki itna, kingaihna leh kideihsakna piang pan hi. Vang kingai lia leh taang zong Zophualva bang tutkhawl honuam zaicin a suut khit uh ciang Zodamtui bang gawm ding a leel thei pan uh ahi hi.

4. Semkhawm ding: Mihing kuamah khattanga nungta thei i om kei hi. A kisamtuahlo kuamah kiomlo hi. Nopni dahni in i kisam tuah ciat hi. No man is an island cih bangin kuamah amah guaka tang teen, ngalkhaat banga tol teen cih bang a om kei hi. Tua manin sepkhop, hihkhop liailiai ding ahi hi. Mite a kisap ciang na huh ding ahi hi. Nang zong na kisap ciang hong kihuh ding hi.

Na meltheihte bek na huh sawm leh na meltheih omlohna ah nang zong hong huh ding omlo thei hi. ‘Veng leh paam pen gamlapi ah om sanggam u leh nau sangin manphazaw hi’ kici hi. Na veng na paam na huh lecin nang zong na veng na paam in hong huh ding hi. Khual gamlapi ah om na sanggam u leh nau huh ding na ngak leh hong hitheikhinlo thei hi.

Nang zong na sanggam u leh nau bek huh nuam in na veng na paam khual kei lecin, khual gamlapi ah om na sanggam u leh nau in zong amau omna mun ah amau huh ding neilo in singkung bangin khattang na ding ngekngawk kha ding uh hi. Tua manin kikhop ciang sumpi i khiat pen biakinn nei pawlpi te kiangah i piak hilo in Pasian kiangah i piak ahih mah bangin i inn kiim veng leh paam i huh pen mun gamlapi ah om i sanggam u leh naute amau kiim leh kiangate in ana huh theihna dinga lampi a sial ihi hi.

Mihing angsung i theihluat leh eitungah zong mite in angsung hong thei leh nuntak gimhuai mahmah hi. Tua ahih manin kim leh kiang, veng leh paam tawh semkhawm ding, hih khawm ding, kihuhtuah ding, nopna dahna ah kidelh ding, kinusialo ding. Leitungah nopna a tuaklo ding omlo, dahna a tuaklo ding omlo hi hang.

5. Lungdam ding: Mite hong it hong muan theihna dingin a kisam penpen lakah khat pen lungdam theih ding ahi hi. Lungdam cihcih mai ding ahi hi. Lungdam cih ciang vaki banga mi gensa gengen ding cihna hilo in mite hong huhna khat, mite hong pahtakna khat, mite hong deihsakna khat pen lungdam kohkoh mai ding ahi hi. Lungdam khiallo ding cihna hi.

Acknowledge, theihpih, phawkpih ding cihna hi. Mite hong sepsak pen theihpih ding, hong deihsakna phawklo a om melmul ding cihbang hilo hi. Tua pen lungdamna hi a, lung dam leh lungsim zong cidam pah hi. Kam tawh pulak ding, gamtatna ah zong lak ding, van leh na tawh genkul ahih leh zong van leh nate zong pia ngam ding.

Nungak melhoih mahmah nih om hi, a khatna nu kiangah, “Na melhoih si e,” a cih leh, “Nong simmawhna hi,” ciin hapkik gawp; a nihna nu kianga, “Na mel hoih hiveh aw,” a kicih leh, “Na takpi maw, lungdam si e” ciziau lel hi! A lungdam zaw nu pen in lungsim bunzaw pah hi. A lungsim hoihzaw ding cih kitheipah a, zong kimuangngampah hi. Lungdam siam ding, acknowledge with a thankful heart hih ding mihing in kisam mahmah hi.

Thukhupna:

Tua ahih manin mihing pen i kikholh, kimuh, kiho ciangin thudik thumaan tawh kiho in, kizahtak bawl in, itna deihsakna tawh i thanemna khat peuh a om zong kitheisiam in, kihuhtuah in, sepna bawlna khat peuhpeuh ah lungdam kiko tangtang leng i nuntakna hong kilamdang ding hi. Tua hileh ‘zingciang’ pen ‘zanni’ tawh hong kibang nawnlo dinga, kimuanna, kithupibawlna, kihuhtuahnopna, kideihsakna cihte hong khang hiaihiai ding hi.

Kimuang in ki it in kikhual tuah peuh leng leitung tomcik nuntak kuamah kienglo ding hi. Sum zongin nek ding dawn ding tawh i buai kha phial zongin i kimuh ikituah khak ni ciang i maitang sunni taang bang dinga, i kimuh kiho nuam in i naak nuam ding hi. Leitung nuntak nuam dinga nuntak man om bek hilo in manpha mahmah ding hi. Tua zong eite hong bawlpa deihna khat na hi gige hi. Hau Za Cin