Malaysia ah Myanmar gammikhat kithahna hangin adang Myanmar mi 6 matthuak

Malaysia ah Myanmar gammikhat kithahna hangin adang Myanmar mi 6 matthuak

Malaysia, Port Dickson ah Myanmar gammikhat ki thahlupna hangin, adang Myanmar gammi 6 kiman cih Bernama pan kiza hi. Port Dickson, Lukut vengsung aom Shophouse sung khatah Myanmar gammi khat aki thatlum hi a, tuahangin athatding in aki ummawh ansai nasem “Restaurant Worker” mi 6 akiman ahihi.

Hihvai tawh kisai in palik makaipi ahi Port Dickson District Police Chief Supt Aidi Sham Mohamed in agenkhiatna ah athatding in aki ummawh tepen Myanmar gammi vive hi uh a, kum 20 gualpawl vive hi uhhi ci’n genkhia hi. Tuni Saturday zingsanglam 4:30am hunin akiman hi a, tuahun laitak in tua Myanmar mi 6 tepen aki hemkhiading, ataimangding in akithawi laitak in akiman ahihi.

Athu akizakna ah Port Dickson, Lukut vengsung Hong Leong Bank geinai aom inndawl 2 na ah zingsanglam 2:30am hunpawl in gamdangmi te akitawng omhi ci’n vengsung mipi te’n Lukut Police Station ah ki zasak uhhi.

Police te’n athu akan uhciangin amasa in Shophouse ii inndawl khatna aom inndeisung khatah kitotna piangmasa cihi. Tuaciangin innkongpi geinai ah pasalkhat bombi bek ateengsa in alum leulau kimu hi. Tuapa ii agilpi aveilam ah liamma zong kimukhia a, tua liamma pen temta tawh akidawt hiding in ki ummawh hi.

Tuaban ah innsung aki etcian ciangin anhuanbuk ah akizang Kitchen Knife temta khatpen sitawh akidimsa in kimu a, tua temta tawh akidawt hiding ci uhhi. Zuthawl ahawmsa honkhatzong kimu a, zukhamsul in akitawnggawp hihtuak uhhi.

Police te’nzong tua buaina apianna kuamsungteng umcihpah uh a, asawtlo in kithahna apianna munpan 1km khawngbek agamlatna ah mithatding in muanmawh te mankhiathei uhhi.

Police te kankhiatna ah tua Myanmar gammi tepen abeisa inzong innlam ah buaina neingeikhin uh a, zu akhamkhit uhciangin abeisa buaina teng hong phulkhiakik in anunung ah aki dawtlum uh hiding ci uhhi.

More: Selayang vengsung ah Malaysian gammi Grab Driver athatlum Myanmar numei khatleh pasal khat kiman

Mikhat dingin aki ummawh akimante lakah khatpa in UNHCR Card tawi a, adang khatpa in ACR Card tawi hi. Aki dawtlumpa pen amin Alliang cihciang bektawh kitheiphot a, akiman tezong amin apuam pen akician ki genkhiatna omnailo hi. Ni 7 sung Remand tawh kikemphot dinga, tuakhit ciangin thusitna kineiding cih kiza hi. Sawltak #zomidaily