Melbourne khuapisung akizuak lenggah sungah phim kimu

Melbourne khuapisung akizuak lenggah sungah phim kimu

Australia, Melbourne khuapisung aom nupa kopkhat in Supermarket panin lenggah “Grape” alei uhle asungah phim akiphum, akisiat mukhia uh cih Straits Times pan kiza hi. Tua lenggah alei nupa tepen Skender Hasa leh azi Shams Alsubaiy kici a, nung Tuesday ni in Supermarket pan alei uh lenggah sungah phim 2 tak amukhia uh ahihi.

9 News Melbourne te’nzong hih thupiang pen pulakkhia uh a, tua lenggah pen asungah atang aomlo “Seedless Grape” namte ahihi. Tua lenggah pen Victoria, Melbourne huamsung Craigieburn Suburb aom Australian Supermarket Woolsworths panin akizuak cisawnsawn hi.

Tua lenggah sungah phim aom aleikha nupa te lakah azi pen naupaai laitak hisawnsawn hi. Azi in nitak an anekkhit ciangin lenggah neksawm a, akhut tawh lenggah khat alaksawm laitak in akhut phim in dawtkha hi. Tuaciang in tua lenggah te phelkhap uh a, asungah phim akiphuhlam mukhia uhhi.

Seedless Green Grapes kici asungah atang apalo te Bag khat alei uh hi a, lenggah khempeuh avek in aphelkhap uhciangin lenggah tangnih sungah phim khattuak aomlam ka mukhia uhhi ci’n apapi in 9 News Melbourne te kiangah genkhia hi.

Azi pen naupaai laitak ahih manin hih phim akikoih lenggah anekkhakloh bilbel pen Pasian tungah ka lungdam mahmah uhhi. Naupaai laitak ahih manin bangmah tuahsiatna aomding ka ngaihsutthei kei hi ci’n azi in genkhia hi.

Hihvai tawh kisai in Australian Police te’nzong thuman mahhhi ci’n pulakkhia uh a, athupen limtak in aki kanciansan laitak hi ci’n genkhia uhhi.

Khuasung mipi te ii Safety leh Well-being pen athupi penpen ahih manin hihvai limtak in ki kankhiading hi ci’n Police te’n Statement ahzong tangkokhia uhhi.

Tuaban ah hihbangdan singgah limcilo, buaina khatpeuh aomleh amanlang in hong Report hamtang un ci’n Police te’n zaksakna neihbeh hi.

Tuabang in nektheih te sungah nekdingin ahoihlo akoih, gamtatsia tezong limtak kikanding a, aki theihkhiatleh kum 10 ciangbang thongsung ah ki koihcipding hi ci’nzong Police te’n mipi tungah zaksakna nei uhhi.

Woolsworths Supermarket thunei te’nzong hih buaina vaitawh kisai in Customer Report akibawl pen kathei uh a, kumpi thunei tetawh kipawlkhawm in limtak in ka kankhiading uhhi ci’n pulakkhia uhhi.

More: Malaysia Marigold bawngnawi te ki dop huai [Recall Product] ~ ZD

Abeisa kumsung inzong Australia gamsung ah akizuak Strawberry singgah sungah phim kimu cih thuthang tamveipitak kiza zelzel hi. Tuabangin Strawberry sungah phim akisiat akimuh ciangin Australia leh New Zealand gamsung aom Supermarket ah zuakdingin akipuaksa Strawberry tampitak ki zuakngam nawnlo in ki paikhiakik hi. Sawltak #zomidaily