Nuclear galvan tawh kisai thu tomkim

Nuclear galvan tawh kisai thu tomkim

January 6, 2016: Leitungah Nuclear Weapons Club kici nuclear galvan nei gam kua om a, nuclear galvan zat theih ding 15, 000 bang om ta zen hi. Nuclear Weapons Club sunga kihelte pen China, France, Russia, United Kingdom, United States, India, North Korea, Pakistan ahi hi. Nuclear a neih zah uh pen source tuamtuam in a gen dan uh tuam tek a, ahih hangin leitungah Russia in haupen hi. Stockholm International Peace Research Institute leh Business Insider in a ciahtehna ah US (1945) in 7,300, Russia (1949) in 8,000, UK (1960) in 225, France in 300, China (1964) in 250, India (1974) in 90 – 110 kiim, Pakistan in 100 – 120 kiim, North Korea (2006) in 6 – 8 kiim nei hi ci hi (a neih kum dan uh tawh kituak-a a gam uh kigen ahi hi).

Hih nuclear galvan neite lak panin gamdang tungah nuclear galvan zuaksawn lohna ding thukhun non-prolifiration treaty (NPT) kici om a, China, France, Russia, United Kingdom, United States in zuih dingin letmat thuh/suaikai uh a, NPT signatory ci-in kiciamteh a, gamdang ten nuclear galvan a neih theih lohna dingun nakpi takin hanciam uh hi. India, North Korea, Pakistan in NPT pen nuclear nei sa gamte in a nei nai lote dalna ngian in a bawl uh ci-in NPT signatory lakah kihel nuam lo uh hi.

Gam kua in nuclear galvan nei hi ci-in Nuclear Weapons Club sungah a kihel hangin Israel in zong nuclear sim neih dingin ki-um a, a sit leh sit loh uh a pulak khiat loh hangun nuclear galvan 80 kiim nei dingin ki-ummawh hi. NATO member sungah zong nuclear weapons nei “nuclear sharing states” kicite pen Belgium, Germany, Italy, Netherlands, Turkey ahi hi. A beisa hunin Belarus, Kazakhstan, South Africa leh Ukraine in zong nei ngei uh a, “States formerly possessing nuclear weapons” ci-in kiciamteh hi. Tu-in a nuclear galvan uh susia (dismantled) uh ahih manin nuclear galvan nei nawn lo uh hi ci-in kiciamteh ta hi.

The Statistics Portal in bel Russia in 7,500, US in 7,200, France in 300, China in 250, Pakistan in 100-120, India in 90-110, Israel in 80, North Korea in 10 nuai nuclear galvan nei dingin ciamteh hi. Wikipedia in bel US in 1,750-6,970, Ruusia in 1,790-7,300, UK in 150 – 215, France in 290-300, China in 260, India in 110-120, Pakistan in 120-130, North Korea in 10 nuai leh Israel in 60-400 kiim nei dingin ummawh a, Israel in 1960–1979 kiim in Vela sit dingin ummawh hi. Israel pen nuclear galvan nei-in a kiciamteh loh hangin NPT signatory lakah kihel a, China leh US zong NPT signatory (a suai kai bek) hi a, NPT signatory ahih banah NPT ratify (namkip) pen Russia, UK leh France bek ahi hi.

Hih nuclear galvante lak panin zong tuipi, huih leh lei panin nuclear galvan kap theihna ding a nei “Nuclear Triads” kici na om sawnsawn lai a, tuate lakah Russia, US, India bek kihel pan hi. Israel leh China in zong tua bang nei dingin ki-ummawh ahih manin “Suspected Nuclear Triad” ci-in kiciamteh khawm hi. UK in sea-based nuclear bek nei a, France in sea and air-based nuclear nei a, Pakistan in Land and air-based nuclear nei a, North Korea in zong lei leh huih panin kap theihna ding nei dingin ki-ummawh ahih manin “Suspected Land and air-based” nuclear country ci-in kiciamteh hi.

More: Malaysia KL Airport ah Saihapaak RM7.2 Million manneiding kiman

Source: Business Insider, The Statistical Portal, Stockholm International Peace Research Institute and Wikipedia Photo: Kidopi Khatna lai-in US ten Hiroshima ah August 6, 1945 leh Nagasaki ah 9th August 1945 in nuclear (atom bomb) galvan a khiatna (mi 129,000–246,000+ kiim si hi). Thang Khan Lian