Hong Kong meileng lampi tungah numei khat asawnkhiapa kimanta

Hong Kong meileng lampi tungah numei khat asawnkhiapa kimanta

Hong Kong meileng Station khatah pasal khatin numei khat meileng lampi, sikzawn tungah asawnkhiat lianlaitak CCTV panin ki Record kha citciat hi. Tua Video Clip pen Social Media tungah ki thehzak in, hihpa gitloh gamtatzia pen lamdang kisa mahmah hi.

Hong Kong, Yuen Long khuasung aom Train Station khatah thupiang kici a, tua agitloh gamtatpa pen Saturday zingsanglam in Hong Kong Police te’n mankhia theita uhhi.

Meileng sikzawn tungah sawnkhiat athuak numeinu pen kum 59 aphakhin khat hi a, amahpen tua Train Station ah Cleaner nasep asemkhat kici hi. CCTV sungah tua numeinu pen meileng lampi gei ah adinlaitak, anung panin pasal khat paiphei hiathiat in, agei atunlian ciangin tua numei adingpen anung panin sawnsuk citciat sese hi.

Midang aomlo cihzong hipeuhmahlo, tua Cleaner numeinu bangpen agal ah anaseppih khattawh aki galhoho laitak hi a, tuabek thamlo, ageinai ahzong mi tampi aom zihziah ahihi.

Tua asawnkhiapa pen Hong Kong ID Card atawi khat kici a, bang gammi taktak cih akigelh khiatloh hangin Southeast Asia gammi kici hi.

Tua numeinu asawnkhiat khitciangin thudonlo, enzong enseselo in paikhiasuak hiathiat hi. Police Spokeswoman khat ii agenkhiatna ah tuapa pen Train Station geinai mahah Police Officer te’n namantheipah uh cihi.

Related: Kuala Lumpur, Monorail meileng Station tungpan in numeikhat kiasuk in sipah

Sawnkhiat athuaknu pen akhaguh liamin, Pok Oi Hospital ah zatui kibawlding in kipuak cihi. Yuen Long Criminal Investigation Division panin Officers te’n hihpa pen hoihtak thusitna abawllaitak cih kiza hi. Gitlohdan zong atuamtuam himai ei. Sawltak #zomidaily