MCC Tulsa : Myanmar World Cup 2015 Noptak in Kizo

MCC Tulsa : Myanmar World Cup 2015 Noptak in Kizo

Nu leh pa, lawm leh gual akua mapeuh aw, Pasian hehpihna tawh kum sim a ii neih Myanmar World Cup 2015 pen May 23 & 25 nite ah team 12 ki dem in, May 25 nitak 5pm pawl in, nop tak in, ki zo siang hi.

Hih pawi pi sungah Texas pan leh Kansas pan team khat tuak hong pai uha, mimal in, state tuamtuam pan leh city tuamtuam pan hong ki pai hi. Mipi te’n nidang sang in ki support zaw a, hih pawipi pen mipi’n thupi ki sa ciat ahih manin KAWLGAM MI KHEM PEUH II PAWIPI khat cileng zong a kikhiallo ding hi. Ni dang sangin zong mipi tam zaw in, aki mawlte bek hilo in, a en te mahmah zongin, nuam sa leh, ki lungkim thei mahmah cih zong ki mu hi.

Hih pawipi sung, nek leh dawn zong ki zuak zihziah a, sai buuk bekbek 10 val pha a, kawlgam an nek theih tampi ki zuak hi. Pawlkhat bangin, ni nih sung pen hawm thawh phial mawk uha, hun tamla in, bawllung kimawl thei laileng a cici zong om hi.

Makai-Committee
Soccer committee te ki cian thei mahmah uha, Refree leh linemen te mi namdang te cial ngiat in, hong makaih uh a, mipi zong ki lungkim mahmah hi. Maikum teh, ki hanciam tuak mahmah mawk hi. A pai khempeuh in, hih na sepna thupi sa mahmah uh cih zong ki za hi.

Pasian hong ompihna lian hi.
Hih bawllung pawi hun sung pen, guahzu ding vive in, ki gen keei hi. Ahi zongin, pawlpi a, thu ngen makai Pa Kham, Nu Lawhte makaihna tawh guahin ki mawlna hong nawngkai sakloh nading in, nakpi in, thu nangen uhhi. Amau te thungetna te Topan hongdawn in, khuahun te’n eite lam ah hong pang hi. Hih in, Pasian eite lam hong panna hong ki lang sak mahmah hi. Ami Israel te sun in Meeikhuam tawh aom pih mah bangin eite zong hong ompih lai hi cih mu thei ii hih manin Pasian min ii phat mahmah hi.

Khuapawi pi

Bawllung pawi kum 5 a cin na pawi pen, khuazang bup in, tha kipia ciat ahih manin lungdam huai mahmah hi. Zomite khuapi Tulsa in, kum cin pawipi a masa pen aki bawlbawl suak hi mai hi.

Lungdam Kohna

Heitui Momno leh Lennu pa te final kidem uha, 3:0 tawh Heitui Momno ten zo uh ahih manun ii lungdam pih mahmah hi. A khatna te’n $1500 ngah uha, a nihna ten $700 ngah uhhi. Hih pawipi ah hong ki hel team leader leh player khempeuh leh, thapia nu leh pa, khua leh tuipih akua mapeuh tung lungdam ii pulaak phapha hi.

Aki cing zaw in, www.myanmarsoccer.us link ah ki en thei ding hi. Bawllung tawh ki sai feedback zong ki za nuam mahmah hi.

MCC Media