Myanmar, Mawlamyine ah guahtui tamluatna hangin leitolh in Pagoda kisia

Myanmar, Mawlamyine ah guahtui tamluatna hangin leitolh in Pagoda kisia

Myanmar, Mon State huamsung leh Southern Myanmar kuamsungteng ah huihpi leh guahpi in nawkgawp in mencim leitolh honkhat om cih AFP pan kiza hi. Tualak ah Mon State, Mawlamyine khuapisung aom aminthang mahmah Buddhist te biakna Pagoda khatzong kisiagawp cihi.

Abeisa Weekend sungteng akipan Southern Mon State sungteng ah guahtui tamlua mahmah ahih manin tuikhawnggawp hi ci’n Global New Light of Myanmar te’nzong pulakkhia uhhi.

Tuabangin guahtui atamluatna hangin Kawlbiakna, Buddhist te ii tattung minthangkhat ahi mualdawn aom Kyeik Than Lan Pagoda zong kisiagawp hi.

AFP Correspondent te’n agenkhiatna ah Monday ni in tua tattung “Buddha Statue” akisia te apuahkik dingin nasem honkhat kipan uh a, Kawlbiakna “Novice Monks” honkhat inzong huhngeingai uhhi. Mualdawn khat aom Buddha Statue khatpen mencim leitolh tawh tolhsuak dektak ahih manin, khautawh kikhih in ki lehkaihkik hi ci’n genkhia hi.

Mawlamyine kuamsung tengah guahtui tamluatna, khuahun siatluatna hangin cimawh dongtuak bekbek pen mi 1000 valbang omkhinta hi ci’n cimawh dongtuakte ahuhkhat ahi Bo Win in genkhia hi.

Adang khuasungmi Local Resident khat ahi Nyan Soe inzong agenkhiatna ah hizahliang in tuicin ahuaisia pen kamukha ngeinaikei hi ci’n genkhia hi.

South Mawlamyine kuamsungteng ah khuasung mite inn leh lei “Bridge” honkhat tui in tumcip ahih manin, cimawh dongtuak mi 150 bang kumpi sangin “Government School” ah ki omsakphot hi. Luidung aom Buddhist sanginn Monastery tezong tui in anawkna in kisiagawp ahih manin belhtheihding omlo hi ci’n New Light te’n pulakkhia uhhi.

Tuciangciang hih guahtui tamluatna hangin asi cihbang kuamah akipulak omnai samlo a, ahi zongin Myanmar gambupphial ah guahtui luanhun, tuk hun ahih manin, khuahun pen siatlam manawhzaw khatheiding in ki ummawh hi.

More: Myanmar gamsung ah Cyclone huihpi hangin asi mi 5 pha, inn 1400 kisia

Nungkalsung inzong Mogok suangkhuk omna ah guahtui tamluatna hangin leisai tolhgawp in mi 5 in sihlawh kici hi. Myanmar gampen guahtui luanhun ciangin cimawh dongtuak kitamthei mahmah hi.

Adiakdiak in 2008 kumsung Cyclone Nargis kici huihpi leh guahpi in anawkgawp hun laitak in Myanmar gamin nakthuak mahmah a, misi bekbek akigawm in 138,000 bang phading kiciliang hi. Sawltak #zomidaily