Mawhnei Mi Diktangte (Justification a zom)

Mawhnei mi diktangte (Both Just and Sinner)

Khai leh sanggam nu le pa, Pasian in mimawh nang le kei midik ih tan theih nadingin koici bangin ih thu hong khen sak ding ahi hiam? Lai Siangtho ih sim ciangin Pasian in a Tapa Jesuh’ dikna tungtawn in thu ong khen sak khin zo hi, cih kimu thei hi. Lai Siangtho sungah hih a lian mahmah hotkhiatna thu don loin om lehang bangci bangin suahtakna ngah thei ding ih hi hiam? Na ci hi (Heb 2: 3). Topa’n na upna tawh thu ong khen ta hi. Ih up ding thu in, Jesuh ong sihna pen Pasian mai-ah mawhneite tangding a ong piak sak biakna hi. Khatvei biak a tawntunga kimang ding ahi hi. Dawimangpa tungah biakna dingin a sisan a taak sak hi loin Pasian hehna a dam sak ding eite’ tang dingin a sisan a va buakhia ahi hi (Atoning death to God, not to Satan). Eite tang dingin thukhamzuihna tawh a genbang lo zuihna pen a nuntak hun kim 33 sung khempeuh ong piak sak hi. Eite’ tang dingin a kisam thuakna gen banna khat zong om loin ong thuak sak khin zo hi. Hih bangin tangmi Jesuh Khrih in dikna ih ngah theih nadingin a genbanglo zuihna (active obedience) le a genbanglo a thuakna (passive obedience) tawh Pasian thukhenna (the penalty) hong na thuak sak khin zo ahi hi. Jesuh Khrih pen eite’ kilawmna hi. Pasian in eite’ tangdingin Jesuh Khrih ong piakna tawh thu ong khen sak khin zo hi. Jesuh Khrih pen tangmi in a nei peuhmah upna tawh nungta ding uh hi. Tua upna hangin Jesuh’ zuih, Jesuh’ thuak, Jesuh’ thumanna le a dikna pen eite’ zuih eite’ thuak, eite’ thumanna le eite’ dikna bangin Pasian in ong ciamteh hi.

Hih diktanna pen a kingah (imputed) hi beka, a kisuak (infused) hi lo hi. Imputation pen kibawlna cih ding hi a, infusion pen suahsakna cih ding hi. Eite pen midik dingin hong kibawl hi a, midik a suak kihi lo hi. Imputation cih pen khat hanga diktang cihna hi. Tangmi khat hangin midikin hong kiciamteh, tua tangmi pa’ hangin Pasian tawh hong kipawl sak thei cihna hi. Khat hanga suahtakna nam hi. Paul in Philimon tungah Onesimas adingin hih bangin na thum sak hi. Nang tungah ong khialh a, leiba thangba hong neih leh zong keima khialh, keima batin na seh in. Keimah Paul in ka hong loh ding hi (Philemon 18, 19), a cih mah bangin Khrih pen eite’ hong kitatkhiatna Thu, eite hong kilohsakna Thu, eite’ kilawmna, ih diktanna le midik a hong kisanna Tanpa Khrih ahi hi. Hih ih ngah Khrih dikna pen sepna hang tawh hi loin Pasian in midikin ahong sanna Thu khat hang ahi hi. Tua thu in Jesuh Khrih hi a, tua Jesuh pen Lungdamna Thu ahi hi. Lai siangtho sungah, Khrih tawh kiptakin kipawl khin ka hih manin Thukham zuihna tawh a kingah thei keima hanciamna tawh dik ngahna cihte ka nei nawn kei hi. Tu-in, Jesuh Khrih upna hangin Pasian in ahong piak diksakna pen upna siksan in ahong kipia ahi hi (Phil. 3: 9). Tua hi a, eite pen midik a suak pah hi lozawin midiktangte ih hi phot hi. Hih thu Lai Siangtho in diktanna thu na ci hi.

Eite diktan nadingin Pasian in Khrih pen mawhnei in bawl hi. Mawhneite’ tangmi dingin thumaan thutak tawh kituakin mawhna a lutungah kibuak hi. Ahi zongin Jesuh mawhnei mi suak lo hi. Tua kibawlna in tangmi tawh kisai kibawlna hi bek ahih manin Jesuh’ lungsim mawhnei mi suah lo hi. Mihingte’ tangdingin mawhlawhtawi dinmun ong lak sak hi bek hi. Tua thu hangin thu-ummite pen Jesuh sungah midikte ci-in Pasian in hong mu thei pan hi. Thu-ummite’ dikna pen dinmun tawh kisai dikna hi-in diktang mi kihi beka, midik Jesuh Khrih a kisuak hi lo hi. Pasian in dik hi ci-a a ciaptehte pen a sepna le a thalawhnate hang hi loin Pasian in a Tapa Khrih tungtawn a thu ong khensakna hang hi zaw hi. Mawhna tawh kisai ah thukhen nadingin a kizang Khrih sih ngamna pen mawhnei mite’ sih ngamna tawh kibang lo hi. Mawhnei mite’ sih ngamna pen sihloh phamawh sih ngamna hi bek hi. Jesuh Khrih ong sihna thu a nial zo ding sih ngamna om lo hi. Dikna pen Khrih sungah upna tawh ih ngah hi bek hi. Upna pen dikna ih ngah theih nadingin Pasian zat van khat tawh a kibang ahi hi. Faith is the instrumentality in obtaining this righteousness.

Ngaihsut dingin a kisam thu in, a dang khat’ dikna pen a ummipa adingin kisan sak hi. Mite’ mawhna Khrih tungah kibuakin mawhlawh tawi hi. Tua mawhlawhtawina in Khrih pen mawhnei mi a suak sak hi ngei lo hi. Khrih in eite’ tang dingin Singlamteh tungah a thuak ahi hi. Tangmi nasep tawh kisai ah dinmun kilaihna piang hi. Midik pa in thuak a, migilopa suakta hi. Tangmi ahih kei leh Palai nasep a kici tua mawhlawhtawi nasep ong sep manin Jesuh in mawhna daantatna thuaka, migilo nang le kei in diktanna ih ngah lawh mikmek hi. Midik Khrih hoihna le dikna pen a ummipa/nu tungah kibuak hi, kisilh sak hi. Midik in kibawl hi. Hih diktanna pen suahna tawh hi loin Khrih dikna upna tawh a ngah dingin hong kibawl ahi hi. Tua pen thu-ummite’ dinmun ahi hi. Dinmun tawh kisai in, a tawmzaw tamzaw a ngah, a nei tuam ih om kei hi. Dinmun tawh kisai in za ah za a kibangin ih ngah a, sepna le thalawhna, hoih kisakzawkna, siangtho kisakzawknate hangin kiam ngei loin khang ngei lo hi. Ih vekpi in ih ngah dikna pen diktanna hi a, tangmi hong sepsak Khrih tung bekah kinga hi. Eite pen mawhnei midik tangte ih hi hi. Luther in “simul Justus et peccator” na ci hi. (Both just and sinner).

Evan. Suang Dal