Matutna ding a kisam kalpi sagihte ~ Dong Mung

Matutna ding a kisam kalpi sagihte ~ Dong Mung

Thupatna: Mihingte I nuntakna sungah I sepna le I bawlna khat peuhpeuh ah matut ding kilunggulh in ki ut tek hi. Lokho mipa khat in a lo ma atut ding akisap mah bangin mimal kimin I sepna khat peuhpeuh ah ma I tut ding akisam ahi hi. Lokho pa in ama tun zo kei leh a lo pan in gah gina hong piang khia zo kha ding hi. Tua mah bangin I sepna khat peuhpeuh I sum zonna, I pil sinna, I siamsinnate ah I ma I tut zawh nadingin a nuai ah thu sagihte tawh kalsuan dih ni!

Kal khatna- A Nungta Pasian tawh Kalsuan Khawm Ding:

Leitungah pasian tuamtuam om a, I biakna tawh kizui-in pasian kinei ciat hi. Hindute bangin pasian tul tampi nei uh hi. Ahi zongin eite Pasian ahih leh PA+TA+Kha Siangtho= Thumgawm Pasian KHAT ahi hi. Vantung le leitung a piangsak, vantung le leitung, tuipi sunga om nuntakna a nei khempeuhte a piangsakpa le amaute tungah thumanna tawh ukna a nei a vanglian pen Pasian-tote Topa, pasiante Pasian ahi hi. Tua bek tham loin mihingte ama lim le meel sunin a hong bawl hi-a, hong it phadiak hi. Tua ama lim le meel sunin a hong bawl mihingte adingin a sia geelna nei ngeilo a, a hoih pen ding geelna nei den hi. Tua ahih manin I ma I tut nadingin a nungta Pasian tawh kalsuan khawm ni!

Kal nihna- Tupna Nei Ding:

D. Ambani in a genna ah, “Tupna neite’n leitung khempeuh zo ding uh hi”, a ci hi. Hih kammal pen dik mahmah in maan mahmah hi. Gentehna in Indiate Prime Minister 11 na Chandra Shekhar in, “Khat vei teh India Prime Minister hih ding ka tup ahi hi” na ci a, tua a tup mah bangin India Prime Minister 11na hong suak takpi hi. Tua ahih manin I ma I tut nadingin tupna I neih ding ahi hi. Abraham Lincoln taan nga a kah lai-in, “Ni khat ni ciang America President ka hi ding hi” na ci a, a cih mah bangin hong suak takpi hi. Tua manin upna nei ni.

Kal thumna- Mitsuan Gige Ni:

Khatvei papi khat in tangvalno thumte tai kidem sak a, a khatna penpen letsong piak ding a ci hi. Ahi zongin a kidemna vuah thukham neu khat om a tua in, Tangtak in tai-a, papipa kiang atung penpen a khatna hiding cih ahi hi. Tangvalnote zong lawp mahmah in hong tai pah uh hi. Khatpa’n a tuuk khak ding launa tawh a khe en in tai hi. Anihna pan tangtak a tai theih nadingin a kim le pam en kawikawi hi. A thumna pa’n mundang en vet loin gamlapi a om papipa mitsuan tiuteu kawmsa in hong tai leh a khatna hong ngah hi. Banghang a khatna pia na hiam a kicih ciangin a dangte ahihleh a kung uh a tun nadingun lauthawng uh a, akung uh en manlo uh hi. Ahi zongin hipa ahih leh a kung bek mitsuan gige hi, a ci hi. Mit suan gige ni.

Kal lina- Thadah Lo Ding:

William Shakespears in a genna khat ah, “A neu mahmah hei khat tawh a lian mahmah singkungpi khat sat mun peuh leng a tawp ah puk veve hi”, na ci hi. I ma I tut nadingin thadah hetlo a, sep teitei ding kisam hi. Thomas Edison in ni khat in nai 3/4 sung khawng bek ihmu in na a sep manin khua phelep mei hong mu khia hi. Tua bek tham loin van thak nam 2000 val hong mu khia hi. Thadah kei ni.

Kal ngana- Hanciam Ni:

Mi lawhcingte’n a genna vuah hanciamna 99-/- hi-a, kaam 1 -/- bek hi na ci uh hi. Hanciamna om lopi in matut zawh nading lampi omlo hi. USA te President Theodore Roosevelt pen a cidam hetlo mi khat hi-a, a pa’n “Nang pen lungsim na nei a, ahi zongin thatang na kisam hi. Gualzawh nadingin lungsim bek hilo, thatang hatna zong kisam hi”, ci-in a gen hi. Amah zong hong hanciam a, boxing khawng hong kisin in a pumpi hong khauhsak hi. Hong hanciam toto a, USA te President ciang dong hong tung to hi. Hanciam ni!

Kal gukna – Lungkia Ngeilo Ding:

Leitung pen haksatna le buaina tawh kidim ahi hi. Tua haksatna le buainate hangin I lungkia in I thadah gawp thei hi. Ahi zongin leitungah a mangmawh ding tangthu gelh in a gualzo mite pen a lungkia ngeilote na hizaw hi. Gentehna Daw Aung San Suu Kyi nuntakna pen I theihsa uh ahi hi. Lungkiat huai le thadah huai mahmah tase leh lungkia het loin hong kalsuan teitei manin tu-in ama tun ta hi.

Kal Sagihna- A Hoih Lam Ngaihsun Den Ding:

Khut le khe gina neilo Australia mi Nick Vujicic in a genna khat ah, “Ka neihloh nate(khut le khe) hangin Pasian tungah ka lungkimlohna ka pulak thei hi. Ahi zongin ka neihloh nate sangin ka neih nate hangin lungdam ko zaw ing”, na ci hi. Tu laitak na nuntakna hangin na lungkia in na thanem in na heh zong suak kha mai thei ding hi. Mite in nang tunga hong bawl thute hangin nuam mawh na sakna tampi om kha ding hi. Ahi zongin a sia lam mahmah ngaihsun ngei kei inla, a hoih lam bekbek ngaihsun zaw in!

Thukhupna:

Lokho pa in a lo lai panin gah hoih gah pha a ngah theih nadingin guah tui, ni sa a pia thei leh gah pha a pia thei a nungta Pasian tungah ko in, ap a, a sep mah bangin I nuntakna ah Pasian tawh kalsuan khawm ni.

Lokho pa’n hih ka lo ka zawh masiah ci-in tupna a neih mah bangin I nuntakna ah tupna kician nei ni. Tupna nei kei leng lawhcinna zong om theilo ding hi.

I tupna mitsuan gige ni! Tua hileh gualzawhna I ngah ding hi. Na kalsuanna ah hong nawngkai sak thei thu le la tampi om kha ding hi. Bangbang hong piang zongin na tupna mitsuan gige in! Tua hileh na ma na tun ding hi.

Thadah in lumlum lecin na ma na tun zo ngei kei ding hi. Tua ahih manin thadah loin semsem lecin na ma na tun lel ding hi.

Hanciamna na neih kei leh haksatna nengno tuak kha lecin na thanem kha ding hi. Hanciamna nei lecin bangbang hong piang zongin na kalsuan teitei ding a na ma na tun ding hi.

A lungkiate gualzo ngeilo a, a lungkia ngeilo te guallel ngeilo uh hi. Tua ahih manin bangbang hong piang tase leh lungkia vet kei inla kalsuan teitei lel in, a hun a tun ciangin na ma na tun ding hi.

A piang thute khempeuh tungah a hoih lamin ngaihsun in sang lel lecin na nisim nuntakna ah maitaina le lungnopna tawh na kalsuan thei ding hi. Tua hileh na ma tut nadinga na kalsuan na ah tangtak in na kalsuan thei dinga na ma na tun ding hi.

Dong Za Mung
Mauvom