Maria le Mazih bang kilamdang, kua thupi zaw ~ Rev. Fr. Damian Dal

Maria le Mazih bang kilamdang, kua thupi zaw ~ Rev. Fr. Damian Dal

Dotna: Tonu pen Maria aci tawh, Mazih aci tawh koi zaw taktak aman hi dinga, Tonu pen banghang zahtak pia cih atom in thei nuam ung. (Sakollam le Lailui Inter-Parish Nupi te thusin na pan thudotna khat, Tualzangkhua, St Peter Biakinn).

Siampi pa: Tonu ii min taktak pen Maria hi. Banghang Mazih aci om hiam cih leh, Kawllaisiangtho pan in, ei Lai a, aletkhia pawlkhat te in, kawl laimal pen, ei Tedim kam in honglet uh ciang, tua dan hongpiang hi. Kawl te in “R” aw nei lo in, “yakauh” tawh gelh hi. Ahih hang asim uh ciang in, “R” aw tawh nasim uh hi. Deek te pen Kazin kici lo in, Karen ci in, nasim hi.

Tua dan in, Maria pen kawllai in, “Yakauh” tawh kigelh a, tua pen, lailetpawl khat te’n, kawllai simdan aman lian kankha lo in, “r” tawh aletkhiat dinguh pen, “z” hongzang kha uh hi. Tua hangin, Maria ding pen, Mazih hongsuak hi. Mazih cih pen lai thei lo te simdan ci mai ni. Engkei ni.

Nupi te: Hi lua ei. Kopawlpawl tuadan mah a, nonggen kei uh leh atel thei mahmah lo hi mah ung ei (Teklui Nupi makai nu).

Siampipa: Anih na thupi sa ing. Atom theipen in, honggen leng;

Tonu Maria pen, banghang zahtak a, kithupi bawlhiam ihcih ciangin,

1. Atapa Jesu zom ah, aki niamkhiat penpen ‘Numei” ahi hi. Hih thu i tel nadingin, Topa Jesu ii kiniamkhiat na la…Philipians 2: 6-11 na enkak leng, kitel pah ding hi. Topa in akiniamkhiat manin, minlianpen leh ukna aana anei ahi hi.

2. Pasian deihna banga, agamta “Numei” ahi hi. Topa Jesu in, a Nu tawhkisai athu dawnna te, i et ciangin,

(a) Lk 11: 27-28 na ah, numei khatin, “Natepnawi le nang hongpai gil in thupha ngah ta hen,“ acih ciangin, Topa in, “Pasian thu za a, angai mi in, thupha angah zaw hi,” ci in, na dawng hi. Maria in, Jesu Topa apaai man leh anawi tuitawh avak manin, avangnei hilo zaw in, Pasian thu za a, angai Nu ahih manin, Pasian tapa agil ah paai in, anawitui tawh avakthei ahi bek hi.

(b) Matthew 12: 47-50…na sungah, mikhat in Topa Jesu kiangah na Nu le nasanggam te in, nang hong munuam in, apualamah hongngak hi, ci in agen ciangin, vantunga ka Pa deihna banga agam ta mi in, kei ma Nu, Kasanggam te ahi hi, ci in na dawngkik hi. Amah le a Nu bangci kizopna neihiam cih mipite ahilhna ahi hi. Vantunga om Pa Pasian thu za in, amang Nu ahih manin, Maria in thupha ngahnu, ama “Nu” asuak ahi hi.

(c) Topa Jesu in, kami aneupen khat tungah nabawlte keitung nongbawl khinzo hi ci hi (Mt 25:40). Tua hi a, Maria i phat na in, thupha apia, alamsang, Topa i phatna mah ahi hi.

Atom in theinuam ung hongci na hih uh cianga, atom theipen a ivai hawmhi mai ei.. Asenpyi hia leh? Rev. Fr. Damian Dal