Mansakna leh Hoih gamtatna (Legality and Morality) ~ Tual Khan Suan

Mansakna leh Hoih gamtatna (Legality and Morality) ~ Tual Khan Suan

Thukhun tawh mansakna kibawl thu khempeuh thuman leh thuhoih hi khin hetlo hi. Thukhun leh paizia bawl pen mihingte hi a, a kicinglo mihingte khutma pen khialhna tawh kipelh thei denlo hi. Hun masa lai in mi honpi sangin mikhat pen lianzaw den leh pil kisa zaw den a hih manin midangte zuih ding thukhun pen a mah bek in bawl ziau den hi. Mipite’n zong hoih hi, hoihlo hi ci’n dotna om sese lo in, zuih ding mah in kisang pah lel hi.

Hunthak lam ciangin mi honpi leh ngaihsutna thak hong khangkhia a hih manin mikhat sangin mi tamzaw hoihzaw hi, cih ngaihsutna bulphuh in, a tamzaw thukimna tawh thukhun kibawl a, vaihawmna kinei hi. Mikhat bek bawl tawh vaihawmna hita leh, mi a tamzaw deihna tawh vaihawmna hita leh a bawlte pen a kicinglo mihing vive a hih manin “a khut ma” pen khialhna tawh kipelh thei tuan hetlo hi.

Mikhat i bawl a hi a, mi a tamzaw bawl a hizongin mihingte nuntakna ah zuih dingin a kikipsak ciangin thuman/ thu hoih dan-in kisang hi. Tua zuih ding leh zuihlo ding thute a palsat leh a zehphi a om ciangin khialhna nei bangin kituat a, khialhna thaman kipia thei zelzel hi. Sep ding a kilawmlo pipi a sem kha mite a hi, sep loh ding pi a sem kha mite a hi zongin khialhna nei mite mah in kisang hi. Tua bang kawmkal ah, a ki khung thu a zuite pen khialhna neilo bangin kisang a, a mau gamtatna in mansakna ( legality) ngah hi.

Mansakna tawh gamtatna i neihna dingin thukhun te i zuih kul hi. Thukhun i cih pen mihingte bawl a hih manin, a zenzen in a tamzaw deihna deihna a hih hang khialhna bulphuh a kibawl thukhunte i zuih thupen thukhun huanga a gamtang (legitimate) a hih hangin, a khialna hi gige hi. A tamzaw thukimna tawh a kibawl a hih hang, a tamzaw zong thuman leh thu hoih bulphuh lo in, a khialh theih hun om veve a hih lam phawk huai hi. Tua bangin a tamzaw in zawhthawh thu tawh thukhun bawl leh, a tawmzawte a dingin hoih tuanlo veve hi. Ka sepna leh ka gamtatnate pen thukhun leh paizia tawh ki tukalh lo hi, thukhun huangsung a gamta hing ci’n kigen thei hi. A hizongin tua thukhun leh paizia pen gamtatna hoih (morality) a bulphuh hiam cih hoihtakin et kul hi.

Khat veivei a tamzaw deihan tawh vaihawmna pen thukhun leh paizia huangsung a nasepna a hi phial zonngin, hoih gamtatna (morality) tawh kituak hetlo thei hi. I Kawlgam ah zong a tamzaw thukimna tawh vaihawmna na om ngei a, a tawmzawte a dingin na hoih hetlo hi. Thu neihna nei leh mipi a tamzaw pen Buddha biakna bia mite a hih manin a tamzaw biakna a uultung sak uh pen a mau a dingin man mahmah tawh kibang hi. Tua bangin a tawmzaw deihna tawh thukhun zong hong bawlzo takpi lel uhhi. Thukhun zui in enleng a mau sepna pen khialhna om hetlo hi a, a tamzaw deihna tawh kituak a, kisem suah a hih manin thukhun huangsung a nasem uh a hihi. A hizongin vaihawmna pen mi khempeuh a dingin kitam kim hetlo a hih manin a thuak mi honkhat na om hi.

Hoih gamtatna (morality) bulphuh a kivaihawm hilo a hih manin siatna gah suak hi. Buddha biakna a bialo minam pawlkhat, a diak in Christian upna a khauh let mahmah Kachin te bangin hih bangin hoih gamtatna (morality) bulphuhlo mansakna (legality) pen deihlo uh a hih manin thau tawi in galdo kipan uhhi. Thukhun tawh kituak a mansakna pen nasepna dingin a hoih mahmah a hih mah bangin, tua thukhun pen lungsim leh gamtat hoihna bulphuh a hih ding kisam pen hi. Hoih gamtatna omlo pi in, thukhun tawh kituak leh a tamzaw in deih hi cih pen thulai ngeilo a hih manin a gualzo a om hangin, a gual lelte a dingin siatna tun thei zaw hi. Mi khempeuh santheih thu lai leh thu hoih pen na om gige den a hih manin tua pan lampialna pen mi pawlkhat a dingin siatna kipatna hi den hi.

Leitung bup ah thunei pen gam a kigen USA gam sung enkik leng; gam kiphuh khiat cil lai-in mansakna (legality) pen hoih gamtatna (morality) tungah na lamkhia uh a hih manin gamsung ah thuhoih in zui hi. Mihingte khat leh khat in hoih gamtatna (morality) tawh kizopna kibulphuh a, thukhun pen morality tung pan na kigelh khia hi. Tua a hih manin thukhun zong kippah a, mite’n nuamsa uhhi. A hizongin gamsungah vaihawmna leh thuneihna pen a tamzaw deihna tawh hoih gamtatna (morality) bulphuh lo in thukhun hong kibawl tak ciangin siatna kipan hi. Tua bang a kibawl thukhun in mansakna (legality) a ngah hangin thulai hetlo a hih manin a lungkim leh a lungkimlo kikal ah buaina om pah hi.

Mi a tamzaw deihna bulphuh in nu le nu, pa le pa kiteng ding mansakna (legality) in thukhun huang sungah a man mahmah hangin, hoih gamtatna (morality) pan in khialhna a hih manin mi khempeuh in sangzo lo hi. Hih thu hangin mite kikal kigam la suak a hih manin kitel khialhna piang hi. Thukhun huang sunga kisem khempeuh pen thutang leh thulai den hetlo bek hilo in, hoih gamtatna bulphuh den hetlo hi. A tamzaw deihna zong mansakna (legality) hi den hetlo a, a tawm zaw mite’n in hoih gamtatna a bulphuh nak leh tua mah hoih den zaw hi. A tamzaw te’n khialhna bulphuh zaw thei a hih manin a tamzawte deihna zong hoih kim denlo cih kimu thei hi.

A hunzui in hoih gamtatna (morality) a kilaih tohtoh hangin, lungsim hoih gamtat hoih pen a ma hunhun in mi khempeuh in sang thei kim hi. A beisa hun lai pek in mihingte sungah sisan kizom linlian pen nupa suah ding a kisan theih hun a om tei hangin, tuhun ciangin i hoih gamtatna (morality) in sang zo nawnlo hi. Hun khat lai a thuhoih la hoih khat pen a hun kikhekna zui in a hoih lo a suah theih bangin, hunkhat lai a thu hoihlo khat zong a hun hong kilaih leh a hoih hun hong om veve thei hi. I Zo ngeina sungah hih bang dan tawh kituak thu tampi kimu thei hi. Hoih gamtatna (morality) a thu kikhel khel ta leh, thu hoih pen mipi te in a san theihdan kikhel lo hi. A hoihlo thu pen a tamzaw deihna tawh nawk gawp ni i cih hangin mipi san theihna pen ki dodal zo tuanlo hi.

Biakna khempeuh sungah thukhun a omlo biakna omlo a, a hizongin tua thukhun le paizia khempeuh hoih gamtatna (morality) bulphuh a hih manin kilemna om hi. Morality a bulphuhlo biakna thukhun leh paizai a nei peuhmah sungah kilemna omlo in siatna piangsak hi. Biakpiak zia ding (Pasian tawh kizop zia ding), nuntak zia ding (mihing khat leh khat kizop zia ding) leh mihingte nuntakna sungah nop saktheihna ding a zuih ding thukhun leh paizia biakna khempeuh in nei hi. Tua thukhun leh paiziate pen a mihingte i sia leh pha theihna pan a kingah hoih gamtatna ( morality) bulphuh a hih ciang bek in mi khempeuh in sang thei le nopsa thei uhhi.

Morality pen mi a tawm a tam tawh vaihawm ding hilo a, hoihna leh siatna tawh bek et ding hi zaw hi. Mi hoihlo leh siatna deih a tamzawkna mun ah siatna nasep pen mansakna (legality) hi ding a, hoih gamtatna a deih mi a tawmzaw te pen thukhun tawh kituak lo mite lehsuah zawding uhhi. Thukhun tawh kituak leh kituak lo cih tawh thuhoih la hoih leh hoih gamtatna (morality) pen khensat ding hihet lo hi. Mi a tamzaw in morality bulphuh in a vaihawm leh thukhun tawh kituah ding gel ding hi bek a, moraltiy bulphuhlo thukhun kibawl pen deihlo ding a hihi. Tual Khan Suan