Mangpha Tg. Thang Baan Kim (Mang Khan Gin) Kum 31, (Gualnam beh)

USA gam Oklahoma State, Tulsa khuapi a teng Tg. Thang Baan Kim @ Baan Kim in abeisa June 23, 2017 ni zingsanglam nai 1:20AM hun-in  Gilsunglam damlohna hangtawh Mual ong liapsanta cihthu i zakmanin Zomi Innkuan USA kipawlna in nakpitakin kidahpih, kilainatpih hi.

Tg. Baan Kim pen Zogam, Lailo khuami, Pa Khup Cin Thang, (Gualnam) leh Nu Dim San Vung, (Buansing) ten Ta Pasal 5 leh Ta Numei 4 a neihna sungah amahpen a ulampanin a 5 na ahihi.

Leitung Nuntakkhuasakna, sumzon paaizonna anuamzawding lunggulhnatawh abeisa April, 2013 kum in USA ongtung ahihi. Tg. Baan Kim pen mi thanuam, mi citak mahmah, a kikhual mahmah khat hi-in Tulsa khuapi ah Sushi sai hoih mahmah khatzong nei a, adamlohkhit nangawnin angap khopkhop in a sai avil tangtang, nasep hanciam a ettehhuai Zo Taang Paal khat ahihi.

Khangdawng Melhoih lai, Maban limci tampi neilaikawmkalah hicibanga ong nusiatna hangin Zomi Innkuan USA Kipawlna in lamdangsa, Pammaihsa leh Ki Khasiatpih  mahmah hi.

Tg. Baan Kim pen Tulsa Khuapi bulphuh Zomite Kipawlkhopna Zomi Innkuan Oklahoma Kipawlna ah Pawllut Member Kician khat leh USA gamsung Zomite Sihna vaiah Zomi khat leh khat luang kipham nadinga Kiphuankhia ZIUSA Genvai ah Pawlmi/ Active Member khat ahihna tawh kizui-in Zomi Innkuan USA Kipawlna in Thukhun ombangin Zomi Innkuan Oklahoma Kipawlna tungtawnin Luangphamna sum ki piakhia dinga, Paakkual Khattawhzong Mangpha khakna kineiding hi.

I it mahmah Tg. Baan Kim tawh a nunungpen hunzatkhopdingpen ong tungding June 27, 2017 (Tuesday) Ni 1:00PM hunin Fitzgerald Funeral Home, 3612 E 91st St, Tulsa, OK 74137 ah Full Gospel Assembly International Ministry (FGAIM) Pawlpite Ngeinazui-in Senior Pastor Rev. Dr. Dam Suan Mung @ Sia Mungtawng in a nunungpen hehnep hun ong neihpih dinga tua khitciangin a geimaha Hanmual ahi  Calvary Cemetery ah Vuina, daitansakna kinei ding hi.

I sanggampa Tg. Baan Kim ong nusiatna hanga adah akap a lungleng khuangai Pianna Nulehpa, Pianpih sanggam laizomteng, Tanau Meltheih, Khuapih tuipih, Beh leh Phung Pawlpi mi, Zomipih lawm lehgual khempeuh tungah i Biak Vaanglian Pasian Khasiangtho in a makiangpana ongpai Hehnepna Bucing ongpiaksak henla a luang Khituite ong nulsakin lungnop Tawldamna ong guankimtek tahen cih Zomi Innkuan USA Kipawlna in Thu kongngetpih uhhi.

Dahpihna Lianpitawh,

Pa Tual Sawm Lian
Secretary of Genvai
Zomi Innkuan USA, Inc.
Tulsa, OK
June 25, 2017