Mangpha Tg. Khup Sian Lian Muang @ Khup Muang, Kum 44, (Naulak beh)

USA gam Oklahoma State, Tulsa khuapi a teng Tg. Khup Sian Lian Muang @ Khup Muang in abeisa June 24, 2017 ni zingsanglam nai 8:30AM hun-in Gilsunglam damlohna hangtawh Mual ong liapsanta cihthu i zakmanin Zomi Innkuan USA kipawlna in nakpitakin kidahpih, kilainatpih hi.

Tg. Khup Muang pen Zogam, Suanghoih khuami Naulak beh Kawlpi ateng Pa Khai Za Lian leh Nu Ciin Za Man ten Ta Pasal 6 leh Ta Numei 5 a neihna sungah amahpen a ulampanin a 9 na ahihi. Leitung Nuntakkhuasakna, sumzon paaizonna anuamzawding lunggulhnatawh abeisa July, 2008 kum in USA ongtung ahihi.

Tg. Khup Muang pen mi thanuam, mi citak mahmah, a kikhual mahmah khat hi-in Tulsa khuapi Zomi tampi nasepna IC Bus Plan ah nasemkawmin hunawng aneih kalkalin USA gam khuatuamtuamah lungdamna thu taangkoin lawptakin a zinkhiaden a piangthak mahmah ettehhuai Zomi Taang Paal khat ahihi.

Khangno lai Maban limci tampi neilaikawmkalah hicibanga ong nusiatna hangin Zomi Innkuan USA Kipawlna in lamdangsa, Pammaihsa leh Ki Khasiatpih mahmah hi. Tg. Khup Muang pen USA gamleitang pana ong nusia Zomi laizomkhat, unau sanggam khat hihnatawh dahpihna, lainatpihna lahkhiatna in Zomi Innkuan USA Kipawlna in Paakkual Khattawh Mangpha khakna kineiding hi.

I it mahmah Tg. Khup Muang tawh a nunungpen hunzatkhopdingpen ong tungding June 28, 2017 (Wednesday) Ni 1:00PM hunin Fitzgerald Funeral Home, 3612 E 91st St, Tulsa, OK 74137 ah Full Gospel Assembly International Ministry (FGAIM) Pawlpite Ngeinazui-in Senior Pastor Rev. Dr. Dam Suan Mung @ Sia Mungtawng in a nunungpen hehnep hunbawlna ong makaih dinga tua khitciangin Calvary Cemetery ah Vuina, daitansakna kinei ding hi.

I sanggampa Tg. Khup Muang ong nusiatna hanga adah akap a lungleng khuangai Pianna Nulehpa, Pianpih sanggam laizomteng, Tanau Meltheih, Khuapih tuipih, Beh leh Phung Pawlpi mi, Zomipih lawm lehgual khempeuh tungah i Biak Vaanglian Pasian Khasiangtho in a makiangpana ongpai Hehnepna Bucing ong tangsak henla a luang Khituite ong nulsakin lungnop Tawldamna ong guankimtek tahen cih Zomi Innkuan USA Kipawlna in thu kangen uhhi.

Dahpihna Lianpitawh,

Pa Tual Sawm Lian
Secretary of Genvai
Zomi Innkuan USA, Inc.

Tulsa, OK
June 26, 2017