Mangpha Nu Ciang Lun Cing, Kum 41 (Suum Kip Beh)

Mangpha Nu Ciang Lun Cing, Kum 41 (Suum Kip Beh)

Date : 11/03/2016 :: USA gam, Maryland State, Laurel khuapi a teng Pa Simon Thang Pum Khai (Niang Tawng Beh) ii a it mahmah azi Nu Ciang Lun Cing, (Suum Kip Beh) abeisa October 29, 2016 ni nai 4:57 PM hunin Washington Adventist Hospital, Takoma Park, MD Zatopi panin Breast (Nawi) Cancer tawh mual ong liamsanta cihthu izakmanin Zomi Innkuan USA kipawlna in nakpitakin kidahpih, ki lainatpih hi.

Nu Ciang Lun Cing pen Zogam, Tedim uksung, Thuklai khuami, Yangon a teng Pa En Cin Thang leh Nu Cing Zam ten ta numei 3 leh Ta Pasal 2 a neihna sungah a nautumpenzom hi-in, April 12, 1975 kumin Tedim khuapi ah suak hi. Tedim sangpi panin Tan 10 zo in 2004 kum in Kalay College pan B.Sc, Batany tawh gualzawhna ongngah hi. a it mahmah a Pasal Pa Simon Thang Pum Khai tawh abeisa May 25, 2005 kumin Pum khat suahna nei in nuntakhuasakna anuamzawding lunggulhna tawh abeisa July 31,2009 kumin USA ongtung uh ahihi.

Nu Ciang Lun Cing te nupa pen Washington DC Area bulphuh Zomite kipawlkhopna Zomi Innkuan Washington DC Area ah pawlmi kiciankhat leh USA gambup Zomite sihnavaiah luangkiphamnadinga kiphuankhia ZIUSA Genvai kipawlnaah Active member khat ahihna uhtawh kizui-in ZIUSA Genvai thukhun ombangin Pa Nu Ciang Lun Cing pen Zomi Innkuan USA kipawlna in USD 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi.

Hih sum leh Paakkualte pen ZIUSA kipawlna taang’in ZIDC Area Makai lamten ongpiaksak ding uhhi. Hih akipiakkhia luangphamna sumtepen USA gamsung muntuamtuampana ZIUSA Genvai thukhunpom pawlmi 8,000 valtekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.

I it mahmah Nu Ciang Lun Cing tawh a nunungpen hunzatkhopding pen ongtungding November 5, 2016 (Saturday) ni zingsang nai 10:30 AM ~ 11:00 AM kikal hunin Bethel AG Church 9001 Vollmerhausen Rd, Jessup, MD 20794 ah luangetna/Viewing/Visiting hun hidinga 11:00 AM ~ 1:00 PM kikal hunin tuamun mahah SBMC Pawlpi Rev. Cin Do Thawng makaihna tawh a nunungpen hehnep hunbawlna kineiding hi. tuamanciang Maryland National Memorial Park Cemetery, 13300 Baltimore Ave, Laurel, MD 20707 ah daitansakna/Vuina kineidinghi.

I it mahmah Nu Lun Cing ongnusiatna hanga adah akap, alunglengkhuangai pianna Nu leh Pa sanggam laizomteng leh khuapihtuipih tanaumeltheih akuamapeuh adiakin a nusiat a itmahmah a pasal Pa Pum Khai te tungah ibiak Vanglian Pasianin a makiangpana ongpai a khasiangtho hehnepna bucing ongpiaksak henla, aluang khituite ong nulsakin lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi. Dahpihna lianpitawh, Executive Committee, Zomi Innkuan USA, Inc. November 03, 2016