Mandalay buaina hangin Kawlgam ah mi 56 kiman

Mandalay buaina hangin Kawlgam ah mi 56 kiman

July kha kipatcil lam Mandalay buaina hangin makaiding in aki ummawh mi 56 kimankhinta hi ci’n Mandalay Region palik thunei te’n genkhia uhhi.

Mithahna, meihalna leh midangte aliamsak te nasiatak in Action kilading cih thuneite’n genkhia a, phalna omlopi in thauvui thautang anei, akem, azang tezong gawtthuakding cih genkhia uhhi.

Akimansa te banah palik te’n adang mi 36 zong asulzuih laitak cih kiza hi.

Tuaban ah Curfew aki tangko hunsung azuilo mi 1400 tezong dan kipiakhin cihzong kiza hi.

Mandalay buaina pen numeikhat kibuanna hangin July 01 ni in akipan hi a, hih Mandalay Riot hangin mi 2 sihlawh a, adang mi 17 liam cihi.

Mandalay Riot hangin Mandalay Township 7 ah July 03 ni akipan Curfew aki tangko ahihi.

Khuasung Security pen hong gamdai zawdeuh ahih manin, kumpi thunei te’n Curfew pen ahun hongkhiam suksuk a, July 28 ni hongtun ciangin Curfew pen nitak 10pm pan zingsang 3am dongbek hong hita hi.

Kawlgam ah buaina khatpeuh omleh meikuang bangin kilawhpah hehu theihi. Adiakdiak in minamvai leh biaknavai te ah mipi te lungsobaih mahmah cih kilangh mahmah hi.

ZD Sawltak