Malaysia ah Methanol tawh akibawl zu atuh dawnkha in asihlawh mi 6 phakhin

Malaysia ah Methanol tawh akibawl zu atuh dawnkha in asihlawh mi 6 phakhin

Malaysia gamsung ah Methanol tawh akibawl zu atuh adawnkha in asihlawh mi 6 phakhinta hi ci’n theStar te’n thuthang suahkhia uhhi. Tuapen kha 2 hunsung bekbek in mi 6 takin asihlawh uh hi a, atawmman mahmah in akibawl “Cheap Liquor” hangin asihlawh uh ahihi.

Tua zu atuh tepen gu namkhat suak a, tuapen Methanol Poisoning ci’n guza nekha in asihlawh uh himawk hi. Hihvai tawh kisai in kumpi thunei ahi George Town OCPD Asst Comm Che Zaimani Che Awang in agenna ah zu akihuantawm, atuh aki bawltawm tepen Methanol Level tamlua ahih manin, tua zu tepen gusuak in asihlawh uh cihi.

Penang khuapisung aom Penang Hospital ah zu atuh adawnkha zato atunlawh mi 7 phakhin uh a, tuatepen Construction Worker vive ahi uhhi. Azu dawnte uh aki sitcian ciangin zutuh akibawltawm, aki huantawm hi a, tuakhit ciangin zusit taktak bangin athawlhawm sungah kikoihkik in akizuak te adawnkha kici hi.

Tuabangin zato atunlawh Construction Worker mi 7 tepen Myanmar gammi vive kici sawnsawn hi. Tuabangin zato atunlawh mi 7 te lakpanin Myanmar gammi 2 in sihlawh uhhi.

Tuabangin zutuh adawnkha te akidot ciangin azu aleina uhpen Myanmar gammi te tungpan mahin alei uh cisawnsawn uhhi. Zutuh limlim tawh asi mi 6 phakhin in, tualak ah Myanmar gammi 3, Malaysian gammi 2 leh India gammi 1 kihel uhhi.

Hihvai hangin Police te’nzong Komtar vengsung ah June 15 ni in zutuh tampi mankhia uhhi. Tualak ah Whisky atamman mahmah pawlkhat zong kihel a, ahi zongin atuh akibawltawm kici hi. High Class Whisky thawl 600, El Diablo Super Strong Brew bung 312 leh Martens Extra Strong bung 24 cihte kimankhia hi.

Tuaban ah Plastic thawlhawm sungah akithuntawm zutuh zong thawlneu 240 leh agolpi 8 cihtezong ki mankhia hi.

Malaysia UNHCR paninzong hihvai tawh kisai in zutuh kidopding pulakna neikhia uhhi. Adiakdiak in Miludeer Beer, Martens Extra Strong Beer, King Priest, Myanmar Whiskey cihte dawnvetvet kei un ci’n UNHCR te’n pulakna neikhin uhhi.

Methanol akici zutuh tepen Methyl Alcohol ci’nzong kithei a, Chemical vive ahih manin, mihing te nektheihnam hihetlo (Non-edible) hi. Tua Methanol tawh akibawl zutuh adawnkha tepen naklahgawp, agil nagawp, amit mialgawp, aluatsuakgawp, asung paigawp, alutang nagawp in alung amgawp, khua phawklo, sibup cihbang in omthei uhhi.

Zusit pen ahoih hetloh banah zutuh pen hoihlozaw thamtham ahih manin Malaysia gamsung aom Zomi te’n ki dopsiamding thupi mahmah hi. Penang bek ah hilo, adang khuapisung muntuamtuam ahzong summet bawlna in zu ahuantawm, abawltawm leh lenggahzu ci’n lenggahbek ahilo atuamtuam ahel tawmtawmzong tammahmah kici hi. Penang ah Myanmar gammi te bawltawm Myanmar Whisky zutuh dawnkha in asi mi 3 bang phakhin hi. Zomi te bawltawm zutuh tawh bangzah in asihlawh khindiam? Malaysia gamsung aom Zomi sungpan zu tawh asi kitawmkhin mahmah hi, tua zu te koipan? Sawltak #zomidaily