Malaysia Zomi te tung theihsakna

Malaysia Zomi te tung theihsakna

August 29-31 kikal Malaysia gamah Bersih 4.0 Movement te makaihna tawh lungphona om ding hi. Hih lungphotna pen nidang a te danin deihngetna maimai hilozaw in gam makai uh Prime Mister Najib Tun Razak deihlohna hang a kibawlna lungphona ahi hi. Kumpi galkapte leh Police te in maban hongkhak in hong buaisak uh hangin maban pen kinung tolh kiklo in, ki zomsuak ding ahi hi ci-in Bersih 4.0 Movement makai pipa in tangkona nei hi.

Hih thu hangin Malaysia Police te in Security nasia takin kiging kholhna neita uh a, tua khit banah Malaysia Police pawlkhat te in hih buaina hangin hunhoihla in summet bawlna in zang sawnsawn in mun pawlkhat te ah Police leh Damiah zong telmel om nawmlo in sumgen in om cih thu zong kiza hi. Hih lungphona hangin KL huam sung lampi 18 te kikhak ding hi. Tua ahih manin Malaysia gamsung a om Zomi khempeuh vaksuk, vaktoh nate leh nasepna ciah leh kuannate ah khua heksiam in pilvang ciat ni cih thu deihsakna lianpi tawh ZAM zumpi panin i kiza sak hi.

Tua ahih manin deihloh penin buaina, nawngkaaina, neek le dawn kisapna a om khak le a kinai penpen le amun a hoih pen a hi, St. John Biakinn, St. Anthony Biakinn le Fatima Biakinn te ah neek le dawn ahi zongin tawlngak theihna mun ahih theih nangin Kuala Lumpur Archdiocese innteekpipa a Archbishop Julian in a kisam bangbang in zattheih ding hi ci in phalna pia hi.

Theihding : Tusung teng puansan (red) leh puannaipak (yellow) limlim silhloh ding hoihpen hi. Deihloh penin hih vai ah hamsatna leh dongtuakna neih NGO khat ahi Health Equity Initiatives (HEI) 016 211 5738 ah huhna kigen thei hi.
ZAM iNFO