Malaysia Zomi Khuado 2014 Ka Siimna – 3
Mi gam, mi lei ah vaihawm a haksat kawmkal ah hih zah a thupi a Khuado vaihawmzo cih ka mit mahmah tawh ka muh hampha kisa ing. A vaihawm te lah siam, lah geel zo uh, lah sem zo uh hi. ZAM President pa thugenna khat ka mangngilh theihloh, mi kim theihsa a hiphial zong gen kik loh ka sawm hang ka ip zawhloh khat pen ZAM ciamtehna Zomi Suangthu Thum lim pen hi. Zomi te in ann a huan ciangin suangthu thum na phut hamtang uh hi. Suangthu thumlo in an kihuan theilo hi. Tua mah bangin Zomite kalsuanna, vai khat peuh ah pangkhawm a kihuhtuah liliai lo in na kisem theilo hi. A kiu khat ciat pan a dom uh ciang suangthu thum tungah anbel a kisuang thei pan ahih mah bangin vai khempeuh ah a kiu khat ciat pan i dom khop, i let khop, i let khop liailiai ciangin vai thupi penpen zong a kihawmzo, a kisemzo ahi hi. Tua lungtang leh tua zia tawh tuni a Khuado zong a kibawl, a kisemkhia ahih manin a thupina lian ka sa semsem hi.
Zomi te pen nidang sangin na kidomtuah tek uh ahih manin amau kianga va gamtat limlim zong nuam hi. Zomi hih ki angtang lua mahmah, 
nuam kisa lua mahmahta ahih manin tua laka va om pen paak huan ah paak namcin a pak zihziah lak ah lawmngaihte tawh khut kilen hialhial a vakkhop sang a zah tampi in lungnuam in khamuanhuai in nuamzaw hi.
Zin leh leng a vaidawn dan uh, khua tuamtuam makaite leh nu leh pa, u liante, biakna makai siate a vaidawn dante uh leh tutna a maigual ah a koihsak uh ka muh ciang nakpi takin gelsiam ka sa hi. Sum leh pai tawh a sem khawm liailiai, a pangkhawm liailiai hi uh a, a neihval uh zong hi hetlo ding pen minam a itna uh leh a nu apa uh, a sanggam u leh nau, tate, tute a itna uh tawh a gualnop ding uh deihsakna in a piak uh zong tampi om cih ka va mu a, suangthu thum bek hilo in tampi a phut khawm uh ahi hi. Zomi khempeuh Khuado ahih mah bangin Zomi khempeuh kihel in gualnuam ziahziah a Dahpa Tong sangin zong mi tamzaw thamtham ding hi. Zomi te nakpi in kilamsang a, kimawl siamte kipahtawi a, mel leh duang hoihte kipahtawi a, lasak siamte kipahtawi in u lian leh pi leh pute kipahtawi hi. Mihing pen a gina, a kuhkal, a hanciam mu peuh leng mikim in a kipakta himawk hi.
ZOMIpa zong va mu thei ka hih manin angtang kisa ing. Amah pen a min hong gen dah mai ningin a hihna hong genzaw ning. Tukum Zomi Nam Ni in “Kei kua ka hiam?” cih limciinna ah amah a Zomipa ahi hi. Minam pen i pau i lai i ngeina i sisan in hong kiciamteh a, pau awkaih tawh hong kiciamteh hilo hi cih lak in mipi mai ah kitel sitset in Zomi i cih ciang kuate hi hiam cih hong lak ahi hi. Malaysia Zomi Nam Ni ka phawk simin tua limciinna ka phawk velval hi. Ka hihna hong kitelsak lua ahih manin ka mangngilh thei kei hi. Tutung zong Khuado innpi sungah kimu vat ka hih manin hampha ka kisa hi. Zomi a lamto mi khat ahi hi.
Zomi Khuado lahna ZAM thudotpi tengin nei:
Zomi Khuado mipi in a ciamteh ol mahmah dingin ZAM thudotpi tengin kamkupna leh limciinna hong nei uh a mipi in nuam kisa in a gen uh kitel setset mahmah hi. Zomi khat in a pau, a ngeina theih ding a thupina a lahna uh zong hipah hi. Zomite in kumkhen pawi kinei a, kumcin pawi zong kinei hi cih khawng kitel takin hong lak uh hi. Kumkhen i cih pen kum a laizang ah a kikhenna hi a, kumcin cih pen kum khat cinna genna hi ci uh hi. Khuado pen kum khen hi a, anlak pawi zong kici a, Sialsawm pen kumcin ci uh hi. [Hih lai ah kei theih dan tawh kibanglo deuh a, Khuado pen anlak khit ahih manin anlak pawi kici a, ni leh kha tawh kum kisim lo in khaici pawi leh anlak khat kikal pen kum khat in Zomi te in a kisim hilo hiam ciin ka thei hi. Hih pen khangham leh upate dot lai dingin ka lungsim ah hong lian mahmah hi.] Kumkhen la leh Kumcin la hong gen uh ciang lah hi mahmah si hi.
Kumkhen La:
(a). Kum kikhen e solkha dang e ziin in vangkhua zong hen aw,
(b). Ziin in vangkhua zong hen aw, siangsung tui bang siang hen aw.
(a). Tukawl tawi kumkhua i khenna, Ningzu khum leh aisa aw e,
(b). Ningzu khum leh aisa aw e, Khan kumsawt ciam lai leng e.
Kumcin La:
(a). Dainen a zal gual ngaihteng aw, Kumcin lenkhuang na za nam aw
(b). Kumcin lenkhuang na zak a leh, Siangsung lai hong leng ve aw.
Zomi te kha simna 12 te hong simsuk daudau uh a, nakpi in lung hong zuangsak mahmah hi. Ka pa Khup (Rev. Khup Za Go in tan 10 ka sim lai 1990 kum a Tonsim khua ah hong sinpih ngakngak lai ka phawk velval hi). Zomi te kha simnate hih bang ahi hi:
1. Theinosih (Jan)
2. Tunkha (Feb)
3. Dota (Mar)
4. Dopi (Apr)
5. Zingkha (May)
6. Gamkha (Jun)
7. Taangsihkha (Jul)
8. Tangkha (Aug)
9. Phalkha (Sep)
10. Khuadokha (Oct)
11. Nokha (Nov)
12. Kaukha (Dec)
Hih teng khempeuh kicingtak, tomkim taka upate in hong lah khit uh ciangin khut kibeng ziahziah a, Singapore pan a hong paite thugenna kipia nuam mahmah ta ahih manin, tuate sapna dingin ‘pheingo kidawk hialhial in’ Zoliate hong vak khia helhhelh phot uh hi.
Pheingo kidawk hialhial in hong vak hialhialta uh
Tangval te in a panglam tutna pan a na galet uh bek hilo a ciahpih ding uh a handphone camera uh tawh maan ana zaih ziahziah ding uh, papite leh upate in zong ‘ka tangval hilai hizen leh maw’ ci a ciltui ana valhvalh khak phial ding uh Zolia melhoihte a kiu khat pan music tawh kituak in khat khat in hong pusuak hialhial uh a, a tungsang teng ah (stage tungah) hong kivei ziahziah in mipi muh in a pheizum uh a, a tan ngo uh hong kipelh setset a, a khutvik uh leh a puansilh tung vua aksi te diamdiamte, a ngawngawh uh Zokhi leh a zungbuh uh, a bilbah uh, a sam uh a etlawm theithei dinga kibawlte hong kipho khia zihziah, hong vak hialhial, hong kising deudeu……..(ka gen dan ding bang thei kei lianging) ka et ciang Kumpi David tausang tunga galhangte galvan kikhai te diamdiam te thupi ding dan ka mitkha in hong bawltawmsak phial hi. Zolia te a banban in hong pai deudeu uh a, mipi khutbeng leh a pahtawi awging tuama kiko ziahziahte, thapia a awng zuaizuaite…nuvaw, Khuado ka zat khak hampha kisa buang sam ing ei!
Et cim theihloh ding zah a hoih leh etlawm ahih hangin, ‘a hoih a nuam na khempeuh zong a bei hun om’ a kicih bangin sawtlo sungin hong bei ziau a, a maigual a tu papi leh Zomi Lasiam Lengtong Pauno te pawl bel kam ka hehaw in sawtpi mah na khuadak ngekngawk uh hi. Amau zong Zolia hong paite tum khin phot uh cih a phawk vat uh ciang a lu uh pei in a gei vua tuithawl hongin dangkeu lopi in tui kam khat ciat a valh tek uh hi.
Thugenna kipanta ding
Tua khit ciang thugenna nasia mahmah khat kipan a, a thulu bekbek zong, “A laute ciah uh, kei laulo hi ing,” cih hi pah photphot hi. Zomi ka hi cih a zumpih leh a kigen ngamlo, a kipholak ngamlo, a nuntakpih ngamlo na om uh leh lau pipi in Zomi kicih kul tuanlo hi, nang na kicih loh hangin Zomi a kici ngam, a laulo, a lehtailo, a nungkik lo, a hangsan, a phungam tampi om lel hi, na kileh kik mai un, na ciah kik mai un…. Gideon in gal a sim dingin zong a galkap sung pan a lau dingte ‘na ciahkik mai un’ ciin a sawl mah bangin …. cih hi photphot hi… (kei zong lau hetlo in ka bil ka dawh pah teta hi)…nang zong tua thugen na za nuam hiam?
(zop lai ding)
Hau Za Cin
Phuitong Liim
www.hauzacin.blogspot.com
Comment piaknop aomleh...