Malaysia Tunnu No.1

Malaysia Tunnu No.1

Mi hingte pen pianna Tuunnu le pianna Zuapa gelloh pi-in a piang khavat ahi phial zongin Pasianin gelna le ngimna neihdingin a utna peuh ah mihing te piangsak thei hi. Pasian ngimna vive ahihi.

Malaysia ah Zomi tampi tak om aa, sihna manna tampi in tuak in, Malaysia gamsungah Lungtang tamsim ki phunta hi. Tuazah khopmah in Naupang tampiten Malaysia pen ka lamh kiatna ci-in a gentheih ding tampi mah omto zel hi. Zomi tampi takmah khanlam manawhna leh Pasian thu ah thuklutna laigil zong Malysia mah pan angah tampi Zomi sungah om ihih manin Malaysia Tuun Nu ci-in min kong vawh hi.

Zomite’ tampanna Malaysia ah Zomite aveile apanpih palainasem leh gamdang panin veina tawh hong paitampi om aa, tuate pahtaak huai aa, etteh tak cing kasa mahmah hi. Mi hingte in semnuamlo, vaihawm nuamlo, gelnuamlo in omnuam hileng paulap zonnang’ muntam pi om hi.

Zomite’ adingin Palai asemte lungsim puakzia hoih kasa hi. Amaute in ei mahmah adinga hun le tha ih zat zahzah leh midangte’ nasepsak nadinga ih piakkhiat zahzah hihteh Nih nikhat ni ciangin Pasian in hong tawikhai ding cih theisa in minam itna tawh na hong sep uhpen picing lungsim hi aa Pasian deihlampi totna na hi gige hi.

Zomi palai te (Zomi makai te) ka etet ciangin a Pil leh asiam pen te na hihello uh aa, ahizongin Zomite’ adingin siamna leh neihna tawh hilo in asepna tampi te ihmuh ciangin LS sungmi tetawh ki bang kasa hi. Hih mite pen Pasian in a nasepna dingin azat te ahihi.

Lai Siangtho sunga miten paulap ding neih uhleh tampi mah ki mu thei hi. Abraham teeklua aa, Jacob lung nuam neihlo aa, Leah ngaihbaanglo aa, Josef mi kiangah ki zuak aa, Rahab numei kizuak hi a, Moses pau-awk aa, Gideon mizawng hi aa, SamSon zi muangkhial hi aa, David mizitawh mawh in innkuan sung buaina hau hi aa, Elijah amah le a mah ki thatsawm pa hi aa, Jeremiah lungkia aa, Jonah tuantual aa, Naomi meigong hi aa, Tuiphumpa Johan amah le amah ki neugen mi namtuampi khat hi aa, Peter lungtom in pau vatvat theih aa, Martha in lung himawh hau aa, Samaria numei nu in pasal tampi neingei aa, Zakkhias mi’n paktak lo aa, Thomas muanlahna tawh kidim aa, Paul cidam lo aa, Timoti kamtawm hi. Hihteng pen thaneemna khat ciat aneih mihing vive mah hi napi in Pasian in amaute mah anasepna ah na zangh veve hi. Nangzong Pasian le na Minam adingin paulap zontawh nanite tumtum saknawn keilecin Pasian in hong zangh thei hi.

A taktak in midangte ih nuntak na sungah ih panpih, ih huhciangin a dim nuntakna aneih taktak ih hipan bek hi. Zomi palai te pen Zomite’ adingin a dim nuntakna tawh nungta kasa mahmah hi.

Zop lai ding…,

Thawn Tuang
Zomi Angvaan