Malaysia, Subang Jaya ah innkhat meikanggawp in mi 4 si

Malaysia, Subang Jaya ah innkhat meikanggawp in mi 4 si

Malaysia, Subang Jaya ah Monday tuzingsang in innkhat meikanggawp a, innkuanbup akigawm mi 4 kanglum cih NST pan kiza hi. Hih innpen Subang Jaya, USJ 2 aom hi a, dawlnih apha “Double-storey Class A Terrace” acihte ahihi. Meikang pen nasia mahmah ahih manin, inn pen 80% bang kangtumgawp, siacipgawp hi.

Selangor Fire and Rescue Department (Bomba) pan ulian khat ii genkhiatna ah tuzingsang 5:34am hun in patau kangmei om cih phone tawh hongki zaksak cihi. Fire & Rescue Department te’nzong delhpah uh a, meikuang pen 6am hunciangin phelhsiang zopan uhhi.

Hih meikatna innveng aom khat ii genna ah zingsangtung in huhna ngenin a awnggawp kazak uhciang in ka enkhia uh a, ahi zongin meikuang pen huaisialua khinta ahih manin bangmah ki huhtheihdan omlo hi. Tuaciang in amanlang in meiphelzum phone tawh ka sampah uhhi ci’n kum 41 aphakhin Mohd Dzamalkhan Abdullah kici aveng te khatin genkhia hi.

Meikuang aphelhzawhkhit uhciangin innsungteng avelcian uhciangin mei ii kattum siluang 4 mukhia uhhi.

Siluang 4 te lakah khatpen kisilbuk sungah mukhia uh a, adang 3 tepen lupnakhan sungah mukhia uhhi.

Asi mi 4 tengpen innkuankhat cih kiza hi. Apa pen kum 58 aphakhin Lim Ah Kok, anu pen kum 51 aphakhin Goh Bee Khim, atapa kum 20 aphakhin Lim Yong Liang leh adang atapa kum 17 aphakhin Lim Yong Wei cihte ahi uhhi.

Unaulak panin a upa penpen numei hi a, tua numeinu pen inn ah giaklo in, Cheras asangkahna College ah giak ahih manin, amah kihelkhalo cihi. Tua atanu minpen Lim Yi Jun kici khat ahihi.

Tua atanu upapen in hihthu azakciangin delhphei a, zingsang 10:30am hunpawl in a innmai atun ciangin kapgawp in ameltheih tanau te’n hehnem ngeingai uhhi.

Inn ah akhawi uh ui 2 te ahihleh silo cibilbel hi. Siluang 4 tengpen Serdang Hospital ah kipuakpah hi.

More: Malaysia, KL khuasung atai Bus khat meikang in agei aom mawtaw te lawh

Hih meikatna ah meiphelhding in Subang Jaya leh Seksyen 7 panin Firemen mi 16 in delhtheih uhhi. Fire Department panin hih meikatna vai bangcibang in kipankhia cihte kancianna neilaiding uh cih kiza hi. ZD Sawltak #zomidaily