Malaysia Sentul KTM meileng lampi gei ah Bomb kimu

Malaysia Sentul KTM meileng lampi gei ah Bomb kimu

Malaysia gamsung Sentul veng aom KTM meileng lampi siktawn gei ah Wednesday ni in Bomb khat kimu cih Malays Mail Online pan kizasawn hi. Hih akimu Bomb pen tuithawlsung khatah aki tamthei thauvan te kikoih in Plastic tawh akituamcip ci a, meileng nasem te’n amuhphet in Police te zasakpah uh cihi.

Police te ummawhna ah mipi bawlsiat nading in akipatsawm hiding ci uh a, hih akibawltawm thawlsung ah thauvui, siktang leh akitamthei honkhat Cardboard Paper tawh kitun masa in, apualam ah Plastic tawh ki tuamcip hi. KTMB (Keretapi Tanah Melayu Berhad) te’n amuhkhiat hunpen nitaklam 4.35pm pawl hi a, Sentul Police te aphual atunkhit ciangin akitamthei Bomb namkhat ahihlam atheih uh ciangin Special Branch te zasaksawnpah uhhi.

Bukit Aman Special Branch director Datuk Seri Fuzi Harun in agenkhiatna ah hihpen aki tamthei Bomb namkhat hi a, athu ki kancianding cihi. IS tetawh kizopna omding cihzong upmawhna nei uhhi.

Hih Bomb aki muhkhiatmadeuh Minute 10 sungin hihmunsan pen meileng in 2 vei peuhmah nawkkhading ci uh a, ahi zongin hih Bomb aki koihzawh bangtanvei sawtkhin cihpen ki gencianthei lianlo hi.

KTMB spokesman te genkhiatna ah hihvai tawh kisai Police tetawh ka kankhiading uh cihciang genkhia uhhi. Police te lampan in amuhkhiatna uh bangmah honggenkiklo uh a, ahi zongin kolampan ka panpihtheih bangbang un ka panpihnuam uhhi cihzong genbeh hi.

Malay te pawipi ahi Hari Raya kipatmapek in Police te’n kidopding a taangko khiatkhiatsa uh hi a, adiakdiak in Public Transport Services te ah IS migilo te’n bawlsiatsawm uh cihi. Tua ahih manin Hari Raya hunsung pen Police te kuamah innlam ciahkhuan (Leave, Day Off) ngahsaklo uh a, avekpi un suntawh zantawh na asem uh ahihi.

Puchong Night Club sung Bomb kitapvai khitciang in hih meileng Bomb kisiahvai hongpiang leuleu hi a, Police te’n tulaitak Malaysia gamsung ah ngongtatna aomloh nading in ahanciam mahmah laitak uh hihtuak hi. ZD Sawltak #zomidaily