Malaysia sanginn tung khatah Helicopter khat kia

Malaysia sanginn tung khatah Helicopter khat kia

Malaysia gamsung Sabah aom sanginn khat ii atungah Military Helicopter khat tuni zingsang 9.11am hunin kiasuk cihthu Malay Mail Online pan kiza hi. Hih akiatna munpen Sabah State sung aom Tawau khuasung ah ahihi.

Tawau district police chief Assistant Commissoner Fadil Marcus ii genkhiatna ah hih Helicopter tungah mi 14 atuang hi a, avek un liam cihi. Ahi zongin bangciliam, liamngawh maw, huaisialua maw cih genbehlo hi.

Tuaban ah News Conference sungah agenna ah hih Helicopter akiatna hangin sangnaupang zong mi 5 in liamna ngah uh a, tuaban ah School Canteen sungah nasem mikhat zong liam cihi. Helicopter akiat ciangin sanginn tungkhuh sikkangte zong kileu gawp in, siatlawhgawp hi.

Sangnaupang aliam tepen ahuaisialua hisamlo a, ahi zongin hih amukha sangnaupang pawlkhatpen lauthawng gawp uhhi.

Helicopter sungah atuang khempeuh ki kaikhia a, ahawlpa Pilot pen anunung ah lakhiazopan uhhi. Avek un Hospital Tawau ah kipuak uh cihi.

Ihtung khawngah alengsak valval uhte zong hongkiasuk vatmawkleh aki pumthuak ziauding himawk mahhi. ZD Sawltak #zomidaily