Malaysia, Penang ah naupang kum 3 aphapan khat Escalator tungpan kia

Malaysia, Penang ah naupang kum 3 aphapan khat Escalator tungpan kia

Malaysia, Penang khuapisung aom Shopping Mall khat ii Escalator kahlei tungpan numeino kiasuk cihthu theSun Daily pan kiza hi. Hih thupiang pen nung Sunday nitaklam in thupiang ahihi. Papi khatin kum 3 bek aphapan atanu pen aliangko ah liangkolokhak in puavouvou a, azi leh atapa tawh Shopping Mall sungah avakkhawm liailiai uh ahihi.

Dawlkhatna panin atungdawl ah kahtoding in Escalator atuan uhciang in atapa ii khutme pen Escalator Rubber Rail kawmkal ah awkcitciat hi. Apa zong atapa akhutme Escalator kawm ah a awklam atheih ciangin lunghimawhlua vatin aliangko tungah apuak atanu phawkkha vatnawnlo in, kunsuk in atapa khutme abuaipih laitak, aliangko tungpan atanu kiasuk in anuaidawl ah ki densuknapah hi.

Atungdawl pan akiatna hangin hih naupangno pen asunglam nimcip in siluang ci a, aluguh zong khangkham cihi. Penang Hospital te Intensive Care Unit (ICU) ah kikem in gimmahmah cihi.

Hih Accident piandan pen CCTV sungah zong ki Record kha ahih manin, YouTube ah kikoihto a, mi tampi in enkhin uhhi. Tua Video Clip tomno pen anuai ahzong ki entheiding hi.

Toddler in ICU after falling from escalator

Hih setkahlei ihcidiam Escalator te tungpan in naupangkia cih Accident pen kizaknawh mahmah hi. Kuala Lumpur khuasung ao Kenanga Shopping Mall ahzong naupang kum 5 aphapan khat kia ngei in, sipah hi.

Escalator tepen atawldam mahmahtawh akibat hangin, set ahih mahbang in siat hunzong neizel uh a, buaina tuamtuam piangsakthei hi. Adiakdiak in naupang neulai te tawh akithuah nulepa te’n kidop mahmahding thupi dinghi. ZD Sawltak #zomidaily