A khangto zaw nuntakna ~ Rev. Langh Za Kap

A khangto zaw nuntakna ~ Rev. Langh Za Kap

Thumasa: Pasian in a tate a khangto zaw, amuibun zaw, apicing zaw nuntakna anei dingin hong deihsak hi. I gankhawite khang ding, itate mite sang gualzo zaw, hau zaw, daupai zaw dingin kideihsak  ciat hi. Pate khang sangin thupha ngah zaw, khangto zaw dingin hong deihsak hi. Mi mawkmawk dingin Topan hong deih loin mi thupi mi manpha dingin hong deih hi. Zomite kum 50 cing peuh leng, sih ding bek ngakin ki-om a, mikangte asih dong uh pilna sin uh hi.

Dawimangpa’n hong nengniam nuam, hong sikcip nuam, hong susia nuam hi. Hong zawngsak nuam, hong nasak nuam hi, hong haisak nuam, hong hehsak, hong kikhensak, hong kitawngsak nuam, hong kaisuk nuam den hi.  Ahih hangin Topa Jesuh in dawi mangpa nasepna teng asusia dingin hong pai hi (1 Joh 3:8).  Jesuh in acingtaak nuntakna pia dingin hong pai hi (John 10:10).  Mawhnei mite, pampaih mite honkhia-in alaamto dingin hong pai Jesuh hi (Mat 9:13). Mawhna gitlohna hoihlohnate singlamteh tung ah kilhcip-in beisak ta hi (Kol 2:14).  Hamsiatna khempeuh panin hong tankhia khin hi. Bang hang hiam cih leh,  Abraham thupha ingah theih nading ahi hi (Gal 3:13-14).

Mawhnateng hong maisakin mawhnei pi mah Jesuh hangin midik hong tangsak Pasian hi. Hoih lopi mah midik mihoihin hong sang hi (2Kor 5:21, Rom 4:3,5).  Pasian tate cihna thu hong pia, gamh luahte hong suaksak lai hi. Jesuh hehpihna leh singlamteh thu in sihna hell pan hong honkhia vantung gam hong tunpih ding ciang bekin um nawn ken. Akhangto zaw upna nei-in leitung ah zong, ahau zaw, apil zaw, akhangto zaw, amanpha zaw nuntakna pia dingin Jesuh hong pai hi cih na upna na theihna khangtosak zaw ta in (2 Pet 3:18).  Samuel ahih leh, Topa omna ah akhang hi (1 Sam 2:21)

Na upna khelin na ngaihsutna khelin khangtosak in. Vantung tunna ding ciang bekin Jesuh um ken, leitung ah zong hauhna nopna damna laptohna hong pia dingin um inla, upna tawh la in.  Akhangto zaw nuntakna ingah theih nadingin:

1. Na ngimna liansak inla, Tangzai sak in. Kei hih ciang bek atung ding hi ta, bangmah sem thei nawn lo ding, sem zo nawn lo ding, lametna bangmah om nawn kei cih ngimna ngaihsutnate paikhia in. Neucik, toicik bek ngim ken. Tangzai takin ngim in.  Alianpi mah ngim in. Fullstop kikoih ken. Savun um lui sung ah lenggah tui thak thun leng tamkham ding hi. Savun um thak ahi ngimna thak sung ah lenggahtui thak thun in (Mat 9:17).  Ngaihsutna toite paikhia ni. Hizo takpi ding maw cihna umluite, up zawhlohna umluite paikhia in. Ngimna thak, ngimna tangzai nei ni.  William Carey in Pasian kiang pan na lianpi lam-en inla, Pasian aa ding na lianpi sem in.

Jabez in,”Topa aw, ka gamgi hong keksak in,” ci’n thungen hi.  Isai 54:2 ah Na bukmun khan inla, na tenna puanbukte kizalsak in. Cilbawl kei in. Na khaute sausak inla, na khetphimte khenkip in acih bangin ingimna sangsak, atangzaiin ngim photphot ding hi hang. Ngimna pen tuilam tawhna tawh kibang hi. Tui luanna dingin lampi isial ciangin agol azaiin itawh leh tui tampi mah luang pah a, tui lam aneu-in itawh leh tawm bekmah hong luang pah hi. Ngimna lianpi ineih leh alianpi mah ingah ding a, ingimna aneu leh aneuno bek mah ingah ding hi. Ih ngimna liansakin tangzaisak photphot ni.

2.  Na lam-etna sangtosak lai in. Lametna in mite nuntakna ah thukhenin thupi mahmah hi. Lam-etna bei mite nuntakna siatna tawh kizom hi. Lametna in hong thahatsakin hong hanciamsak hi. Na lam-etna aniam leh aniam mah hong piang hipah hi. I lametna bang bangin hong piang takpi hi. Na lianpipite anei zolo dingin kilam-en ken, innhoih nono, motor hoihte kei tawh kisai kei ci ken. Topa’n hong pia thei lua hi.  Topa aa ding na khempeuh piang thei hi cih upna tawh na lam-etna sangtosak in. Tua bang naseppipite ngahzo kei ning cih lam-etna niamte paikhia in. Na nuntakna kikhelna dingin na ngaihsutna khel masak kul ding hi. Na ngaihsutna na khel theih teh, Pasian in nang hong khel thei pan ding hi. Pasian in na lamet ngam tantan hong pia thei hi.

Upna cihpen akimu nailote ngah takpi ding cih lam-etna hi, (Heb 11:1). Na upna bangin note tung ah hong piang tahen (Mat 9:29). Lam-etna omlo nuntakna ngei lel tawh Pasian thupha hong tung thei lo ding hi. Na ngaihsutna in Pasian thupha sanna dingin gamgi hi a, na honkhiat ding ahi hi. Pasian thupha lam-en khol lecin Pasian in hong sem thei pan ding hi. Mi pawlkhat asia bekbek ngaihsunsunin Pasian tung ah khasia uh hi. Angaihsutna bangin piang takpi hi. Mi pawlkhatte nuntakna lunghimawhna ki-uksak uh hi. Thongkia abang na nuntakna pan pusuak khia in.

3. Upna lianpi nei in. Topa Jesuh in; “A ummite aa ding na khempeuh piang thei hi,” (Mk 9:23)ci hi. Na nuntakna ah lungkiat huai thute hong om ding a, upna mit tawh acidam alungnuam mahmah danin na ki-et hun om ding hi. Tuni pen kei aa dingin na lamdang ka muh ni hong hi ding hi cih um in. Lungsim mitkha tawh mu thei in. Elijah in Elisha aw,  nong muh leh nong nget azahnih thupha ngah ding ci hi. Muh kei leh ngah loding cihna hi. Upna mit tawh muh theih ding kisam hi. Jabez in amin hoihlohna thuphain hong kihei ding cih um ngiat hi. Nang leh nang kiciangtan ken. Pasian thupha leh anasepna ciangtan ken. Ciangtanna tawh Pasian um kha kei in. Ciangtan omlo in nasem thei i Pasian hi.

4. Thungetna lianpi nei in. Jabez in miten adinmun uh tawh alungkim laitakin Pasian ompih ding, Pasian vangliatnate amah tawh om khawm ding, Pasian kep ding lunggulh mahmah hi. Nakpi takin thungen pah hi. Thungetna vanglianin na lianpi sem zo hi (Jame 5:16).  Mipilpa khat in, “ Nang nasep leh nang bek in nasem a, thu na nget leh Pasian in sem hi”, ci hi. ( If you work you work, if you pray God works). Pahtawina leh liatnate ama mai ah om hi. Hatna leh hoihnate ama omna mun siangtho ah om hi, (Late 96:6). Topa omna ah hun tampi a omte vanglian hi. Mose ni 40 Pasian tawh kilawmta a, amaitaang hi.   Kei nongsap leh kong dawng kik ding a, na theih ngei nailoh aki-imcip thulianpite kong gen ding hi (Jer 33:3).

5. Siangtho nuntakna nei in. Paul in nuntakna asiangtho in a kikep leh aneipa in amanpha zaw, athupi diakte ah zang ding hi (2Tim 2:21).  Daniel siangtho nuntakna aneih manin alawmdangte sangin azah sawmin pil zaw hi. Laptohna, zakhanna ngah toto hi (Dan 1:20).  Pasian in laitheih siamna leh pilna thukte pia hi (Dan 1:17). Daniel mangmuhna leh mangkhiat siamna pia hi.  Zomite atam zaw pate khang sangin khangto zolo zaw hi hang. Bang hang hiam cih leh, guihtheih khamtheih in hong susia hi.

Khuapi khat ukzawhna sangin eima pumpi kiuk zawhna manpha zaw hi (Pau 16:32).  Pasian deihna tawh kituak nuntak zawh nadingin na kisin in (1 Tim4:7b).  I siantho zawh nadingin pumpi, lungsim, kha abuppi-in Topa tung ah ap ding kisam hi (Rom 12:1-2)

Pumpi tung nate Topa tung ah ap ding hi (Rom 6:13). Eite athaanghuai gamtat dingin Pasian in hong sam loin asiangtho-in, anungta dingin ahong sam hi. Hih thu adon lo mi in mite athudon lo hiloin Kha Siangtho ahong pia Pasian athusim lo ahi hi (1 Thes 4:3-8).

6. Kha thu ah nakpitakin kisinna nei in (1 Tim 4:7-9).:   Piakkhiatna kisin in. Ngah ding bekin thungen ken, pia khia dingin thungen in. Nupi khat thungetna: “Topa aw tu kum mite’ huhna tampi hong ngahsak in”, ci-in thungen a, tua kum cina-in zato tung a, mi vehna huhna ngah takpi hi. Akum kik teh, mite ahuh zo dingin thupha hong pia in ci-in athungetna khel a, Topa’n mite huh zo dingin thupha pia hi. Thungetna, antanna, Lai Siangtho simna, lungdamna thugenna, zindona, anvakna cihte nakpi takin kisin ding ahi hi. Bawlung siamte,  music siamte, mi minthangte akinaksin mahmahte hi. Siam napi’n kisin lote leh kisin thadahte lawhcing lo hi. Gualzo lo uh hi. Na khempeuh citaktak in kisin kul hi.

Thukhupna: I nuntakna itunna ciang tawh lungdamin, lungkim nai kei ni. I tunna ciang tawh khawl kei ni. Topa’n akhangto zaw lai dingin thupha hong pia nuam hi. I khantoh semsem theih nadingin; ngimna lianpi nei-in ngimna tangzaisak ni. I lametna sangtosak lai ding hi hang. I ngimna leh ilametnate Pasian in hong tangtungsak zo ding hi ci-in upna lianpi nei ni. I ngimnate ei hatna ei tha bek tawh piang zo lo ding ahih manin hong gualzawhpih ding Pasian kiang ah nakpi takin thungen ni. Akhephung zuan den ni. Akhangto zaw, athupi zaw ah hong zat theih nadingin siangtho takin nuntak ding hanciam ni. Kha thu ah nakpi takin kisinna nei ni. Tua hileh i Topa’n idinmun lui sangin hong khangtosak zaw-in athupi zaw leh amanpha zaw ah hong zang zaw ding hi. Topa’n akhangto zaw nuntakna hong neisak kimciat ta hen. Amen – Rev. Langh Za Kap (GS, ZBCM)