Malaysia leh North Korea kizopna siasemsem, Free Visa phiatta

Malaysia leh North Korea kizopna siasemsem, Free Visa phiatta

Malaysia gamsung ah ahawhding North Korea Citizens khempeuh hongtungding Monday ni akipan Visa ngekciatciat kulsak tading ci’n Malaysia Deputy Prime Minister Datuk Seri Ahmad Zahid Hamidi in genkhia cih theSun pan kiza hi.

Kuala Lumpur International Airport 2 (KLIA2) sungah Kim Jong Nam akithah khitzawh Malaysia kumpi thunei te’n gamdang bitna leh daihna aomnading ngaihsun uh a, Public Security thupi ahih manin, hihbang in khentatna akinei cihi. Public Safety ding ahihnakleh Malaysia kumpi in sepding akisam peuhpeuh kisemngam dinghi ci’n genbeh hi.

Malaysia Home Ministry in khasim abawlzel Assembly ah Deputy Prime Minister in agenkhia hi a, “Malaysia honghawhsawm North Korea gammi khempeuh hongtungding Monday ni akipan Visa angetphot uh kisam tading hi” ci’n genkhia hi.

Malaysia leh North Korea gamnih pen abeisa in aki hawhnop uhciang in Visa lakkulsaklo uh a, Free Visa Travel Policy azang uh ahihi. Ahi zongin Kim Jong Nam aki suamlup khitzawh North Korea leh Malaysia gamnih kikal kizopna honglemnawnlo in, kimuh khialhna, kitel khialhna hong gingkhia kiaukiau hi.

Tulaitak North Korea gamsungah makaipi asemlaitak ahi Kim Jong Un in asanggampa Kim Jong Nam pen abeisa 2011 kum inzong Macau khuasung ah suamlup saksawm ngei cih Media te’n pulak khia ngei uhhi. Tuahunlai in kisuamlum theilo uh himahleh tu in Malaysia gamsung ah aki suamlupna pen North Korea ii vaihawm hiding hi ci’n South Korea leh US in genkhiakhin uhhi.

Malaysia gamsung ah hihbangin amauvai Personal Agenda te hongsep, hong gamtat uhpen dik kisa hetlo hi ci’n Deputy Prime Minister in genkhia hi. Malaysia gampen naupang lim kimawlna bangin zatding hizenzenlo a, leitung leizang ah mindaisak suak ahih manin Malaysia kumpi thunei te nuamhetlo uhhi.

Khatlehkhat ki galbawlding aci hikhang, ahi zongin Malaysia gamsung ah navai uh nasepnop uhleh leitung laizang ah kagam uh hong sukhasakkei tapeuh un” ci’n Datuk Seri Ahmad Zahid Hamidi in genkhia hi.

“We are not trying to create enemies, but if they want to use Malaysia as a platform to initiate their agenda, our country’s image should not be damaged at the international level.”

Malaysia kumpi in Kim Jong Nam pen “VX nerve agent” tawh ki suamlum acihvai pen North Korea te lungkim hetlo uh a, asihna ahang “Cause of Death” pen hong laihsak un cipongmawk uhhi.

Ahi zongin Malaysia Health Minister Datuk Seri Dr S. Subramaniam in ki laih zenzenloding hi ci’n genkhia hi. “His death was due to a nerve poison. We will not change that.”

Behlapna: North Korea Leader Kim Jong Un pen milauhuai mahmahkhat ahih main aheh phangphang zelding lauhuai hi. Malaysia gamsung ah akisuamlum Kim Jong Nam zong asanggam (pakibang nukibanglo) ahihi. Kim Jong Nam pen ama Uncle khat ahi Jang Song Thaek acihpa tawh kilimthuah mahmah uh kici hi.

Tua Jang Song Thaek pen North Korea ah athuneipen nihna in aki ciamteh hi a, ahi zongin 2013 kumin Kim Jong Un ii sawlnatawh ki thatlum mawk hi. Ama pianpih sanggampa athat ngam, apiana apa tawh unau apaneu khatzong athat ngampa in midang kua thahngamloh neimawkding hiam? 🙂 ZD Sawltak #zomidaily