Malaysia kumpi thunei te’n Refugee te honghua mahmahta

Malaysia kumpi thunei te’n Refugee te honghua mahmahta

Malaysia kumpi zumpi omna ahi Putrajaya panin thunei te’n United Nations Refugee Agency te kiangah na gambel mite uh mundang ah hemkhia mengmeng un ci’n a lunggulhna uh genkhiagiap cih Malaysian Insider pan kiza hi.

“Deputy Home Minister Datuk Seri Dr Wan Junaidi Tuanku Jaafar” in agenna ah Malaysai pen UNHCR United Nations High Commissioner for Refugees Convention ah suaikailo, letmat thuhlo hi. Ahi zongin Malaysia gamsung ah UNHCR Card atawi mi 150,00 bang ki buaipih hi ci’n genkhia hi. Tualak ah atawmzaw pen Kawlgam pan ahihi.

Deputy Home Minister papen Goerge Town aom Penang Police Headquarter ah apailaitak in agenkhiat hi a, Penang ahzong Kawlgam mite kithahna vai mahtawh apai ahihi. “Malaysia gampen UNHCR Convention ah suaikailo gamkhat ahihlam pulakkhia kulta hi” ci’n Penang Police Chief Datuk Abdul Rahim Hanafi tawh akimuhna ah genkhia hi.

Penang sungah Kawlgammi luang 18 bang kithat a, kithat ciangbek hilo in akhut akhe te sasem bangin ki tangtonggawp a, muntuamtuam ah kipai kawikawi hi. Tuabang in thah athuak leh athat tepen Kawlgammi ahih banah pawlkhat pen UN Card atawite hisawnsawn hi.

Malaysia gamsung aom Migrant leh Refugee te’n Malaysia kumpi thukhun azuih kul hi cihzong pulak khia hi. Cimawh galtai in migam ah pemta in omlailai, gammi te nawngkaisak lailai cihpen hongkideih masa hetloding mah ahihi.

Nung Wednesday ni in mithat Kawlgammi 9 tezong Penang sung aom thukhenzum tuamtuam ah thusitna kineikhin hi. Tua mithat Myanmar National tepen kum 20 leh kum 40 kikal vive ahi uhhi.

“Malaysia gamsung ah Refugee te aki omsak pen mihing ciatciat ahihna tawh hehpihhuai kisa (Humanitarian and Compassionate Ground) in aki omsakbek hi a, hihbang in UN Card tawi in utbang in gamtatding hilo hi. Malaysia gamsung ah om uh ahih mahbang in “Malaysia Law” azuih kul hi cihzong “Deputy Home Minister Datuk Seri Dr Wan Junaidi Tuanku Jaafar” in genkhia hi.

UN Agency te’n amineih te uh Malaysia gampan in paikhiasak mengmeng hen. UNHCR Convention ah suaikai gamte’n Refugee te lunggulh uh ahih manin tua gamte ah puak uhhen ci’n genkhiata hi.

Thuhoih in ngaihsun leng…
Hihthu pen thuhoih in ngaihsunleng gamthumna kipuak mengmeng dingin Malaysia kumpi in UN Agency te kiangah hong ngeksak hi cihtheihtawh kibang hi.

Thuhoihlo in ngaihsun leng…
Thuhoihlo dingin ngaihsunleng Malaysia panin UN Signatory gam te ah puakkhiatding cih himawk a, gentehna in India, Thailand, Indonesia, Nauru, Papua New Guinea, etc… cih gamte khawngah hongkipuak mawkleh lungdamhuai masa khollo khading hi. ZD Sawltak