Malaysia, KL khuasung atai Bus khat meikang in agei aom mawtaw te lawh

Malaysia, Kuala Lumpur khuasung atai “Rapid KL Bus” tekhat tuni meikang in agei aom mawtaw tezong lawhgawp cihthu NST pan kiza hi. Hih “Rapid KL Bus” meikatna pen Wangsa Maju, Section 5 sung aom Aeon Big Shopping Mall geinai ah hi a, tuni nitaklam in thupiang ahihi.

Hih “Rapid KL Bus” pen nitaklam 4pm hunpawl in Passengers mi 6 puakawm in, atailaitak Bus Driver pa in meikhu gimnam za ahih manin, Bus khawlsak in Checking bawlpah hi. Tua meikhu pen Bus Engine sungpan in apusuak hiding in ummawh a, a etcian ciangin meikuang mu ahih manin Bus sung aom Passenger teng khempeuh amanlang in tuakkhiasak pahhi.

Passenger tengzong amanlang in tuakkhiaman uh a, ahi zongin hih Bus meikatna hangin Bus gei aom mawtaw tezong mei in lawhphei in siatlawhgawp uhhi.

More: Malaysia, PJ sung aom EPF Building meikang, innsung ah nasem mi 527 te ahunlap in ki honkhia

City Fire and Rescue Department pan makaipi Chief Operations Officer khat ii genkhiatna ah tuni nitak 4pm hunpawl in Bus meikatvai hongki zasak cihi. Tuapan in Keramat, Setapak, Wangsa Maju cih munte panin Fire & Rescue Department pan meiphelhding in Firemen te taipha ziahziah uhhi.

Chief Operations Officer pa ii genna ah hih aphual atun uhciang in meiphelh nading in ahun Minute 20 bang buaipih uh a, tuakhit ciangin phelhsiangzo uh cih kiza hi. ZD Sawltak #zomidaily