Malaysia gamsung ah hiamgamtatna ah akihel migilo 8 kiman

Malaysia gamsung ah hiamgamtatna ah akihel migilo 8 kiman

Malaysia gamsung ah mi ommuangte a nawngkaisakding, hiamgamtat akipatsawm mi 8 kimankhia cih NST pan kiza hi. Tua migilo tepen abeisa October 30 leh November 12 kikal in Police te’n amatkhiat uh ahihi.

Palik alianpenpa ahi Inspector-General of Police Tan Sri Mohamad Fuzi Harun in agenkhiatna ah tua migilo akimankhia te lakah mi 7 tepen Philippines gampan hi uh a, adang khatpen Malaysian gammi hi ci’n pulakkhia hi. Putrajaya leh Sabah panin Federal Police Special Branch’s Counter Terrorism Division te makaihna tawh buluhna Raids tamveipi kibawlin akimankhia uh ahihi.

Philippines gammi akiman 7 tepen akum uh 27 leh 60 kikal ahi uhhi. Amau pen Southern Philippines gamsung aom gitloh ngongtatna amakai “Abu Sayyaf Group (ASG)” akici te ahi uhhi. Tuaban ah Malaysia gammipa pen kum 38 aphakhin khat hi a, IS migilo te gitloh ngongtattheih nadingin sum avaihawmsak zelzelkhat kici hi.

Tua Malaysian gammipa in suaitawn “Gold bars” kizuakna ah Agent asemkhat hi a, tuapa pen October 30 ni in Putrajaya ah kimankhia masa hi. Tuapa in Syria gamsung atungsa Malaysian gammi IS makai khattawh kizom in Terrorism Activities gitloh ngongtatna te ah zatdingin sum akhakkhiazel khat ahihi.

Tuazawh ciangin November 01 ni in Sabah panin Filipinos gammi 3 te kimankhia leuleu uhhi. Tuate pen Sabah leh Southern Philippines gamsung tengah mi mancip, Kidnap bawl uha, sum tampipi tawh aki tansakkik zelzelte ahi uhhi.

Adang akiman khatpa pen kum 34 aphakhin khat hi a, ASG kici Abu Sayyaf Group migilo te zatdingin thau abawlkhiat saktheikhat ahihi.

Tuazawh asawtlo November 08 ni in Filipono gammi 2 kimatbeh leuleu a, tuate pen Labourer khatleh Technician khat kici hi. Tuate zong ASG migilo tetawh asemkhawm hi uh a, tua migilo kipawlna sungah mithak aluttheih nadingin avaihawm, pawlzong in mikaikhawm te ahi uhhi.

More: Indonesia Police HQ asim temtawi migilo 4 kikaplum, Officer khatzong si

Tuate pen Southern Philippines lamzuanin ataikhiatsawm laitak in Malaysian Authorities te’n amatkhiat uh ahihi. Tuakhitzawh November 10 ni inzong Sabah panin kum 30 aphakhin khat kimatbeh leuleu hi.

Anunung penpen akimankhia pen November 12 ni hi a, tuapa pen kum 60 aphakhin khat ahihi. Sawltak #zomidaily