Malaysia Grab Car te hangin Taxi hawlte hehmahmah

Malaysia Grab Car te hangin Taxi hawlte hehmahmah

Malaysia gamsung ah nunglamdiak akipan aki limzat mahmah ahi Grab Car te pen adang Taxi te sangin sum tawmbei zawtham leh zatnuamzaw ahih manin adang Taxi te kizangnawn mello hi. Tua hangin adang Taxi taktak te lungkim hetlo uh a, nung Tuesday ni inzong Taxi hawl te’n lungphona nei uhhi.

Hih vai tawh kisai Malaysia Prime Minister Datuk Seri Najib Razak in asawtlo in amau ii ngaihsutna leh khentatna te hong tangko khiading cih tuzingsang in genkhia hi.

Nung Tuesday ni in lungphona te zong kathei a, Taxi hawlte ii sumzonna sumlut kiamtuam ahihna te leh amau ii lunghimawhna tezong ka theihpih hi ci’n PM Najib in ama ii Blog ah gelhkhia hi.

Nung Tuesday ni in Bukit Bintang lamzikpi tungah Taxi hawl mi 100 val in lampi khakcip in a Taxi uh khawlsak in, lungphona nei uhhi. Tua lungphona hangin Bukit Bintang sungkhempeuh mawtaw dimcip, lamzik teng pusuah nading omloliang in mawtaw dim ahih manin khuasung mipi te adingin nawngkai saktuam mahmah uhhi.

Tua hi a, Taxi hawlte ii lungphona leh lunghimawhna te zong kathei uh a, ahoihpen dingin kong hanciamding uh ci’n kumpi thunei te’n genkhia hi.

Thu khentatna aomma tukikal sungin tuabang in mipi te nawngkaisak in lampi khakcip in lungphona hong neikik nawnkei tapeuh un ci’n PM Najib in vaikhakna zong neihi. Banghanghiam cihleh tuabang gamtatna hangin kuamah in phattuam pihlo bekthamlo in, mipi te adingin supna hizaw hi cihzong genkhia hi.

Grab Car te atuanman tawmbei cihhang in khatveivei Taxi taktak te in Grab Car akizat pen thangpaih ngaihsutthei uh ahih manin, Grab Car natuanciang pilvangding, khuakhaatding kisam hi. Pawlkhat Taxi hawlte’n Grab Car te gawtbawltheih cih kiza hiauhiau hi. ZD Sawltak #zomidaily