Malaysia gamsung migilo te ngongtat ding ki patau semsem

Malaysia gamsung ah migilo te’n ngongtatding gelna nei cih kiza ahih manin, National Security Council (NSC) in gamsung ah Security khansemsem cih New Straits Times pan tuni Tuesday ni in kiza leuleu hi. Gamdangmi Foreigner leh Tourists te painopdiakna mun thupi te leh Public Area te ah Security dingin Police tampi koihbeh khin uhhi.

Malaysia Prime Minister Datuk Seri Najib Razak inzong tuni NSC Meeting ah hihvai mah limgen mahmah cih kiza hi.

“NSC in mipi te lungmuanna aneihding un ki lunggulh mahmah ahih manin palik leh galkap (Police & Military) te mun thupi teng ah kikoih kawikawi hi” cihzong genkhia hi.

Prime Minister Najib in agenbehna ah Malaysia gamsung ah mipi te lungmuanna aomnading leh daihna aom nading ki lunggulh ahih manin, Security tawh kisai nidang in aki zangngeilo Department dangte zong hongki helding uh ki lunggulh hi cita hi. Tuahi a, Police, Armed Forces cihte banah Customs Department, Immigration Department, Civil Servant, Village Security, Development Committee Members cihte zong Prime Minister Najib in Security semkhawmding in lunggulh ahih manin, hong semkhawm totoding uhhi.

Security tawh kisai ahih nakleh Malaysia gamsung mipi khempeuh in pilvang takin ih sepkhopding cih alunggulhna te pulak khiata hi.

Adiakdiak in migilo te’n amitsuan Target in aneih phadiak uh ahi Kuala Lumpur City Centre, Bukit Bintang, Publika, Solaris, Hartamas, Bangsar, The Curve cih munte lauhuai cih ki limgen phadiak hi. Tua hi a, hih munte ah vai thupi mahmah aomkei nakleh nawkkhak lohding thupi pen hi. Ahi zongin hih munte ah pelhtheihloh nasem in aomte ahihleh gamtatna peuhah pilvangtak leh mite mit hek et giaugiau zelding thupi dinghi.

Ahuampi in cileng tusung pen Malaysia gamsung muntuamtuam ah Security nasiatak in kikoih kawikawiding hi. UN Card neilo te’n Palik leh kumpi thunei te namuh ciangin lauluatding zong hipah masa samlo hi. UN Card neilo te manding in hongkuankhia uh himasalo a, Malaysia gambup mipi lungmuan nading in Security asem uh ahihi. Ahi zongin tuabang kawmkal ah Ngia honkhat omveveding ahih manin, ahun leh amun alemnak leh sum ngahtheihtheih nadingin hong sitsit veve khading uhhi. Pelhtheih laiteng pelhsawm ni. ZD Sawltak #zomidaily