Malaysia gamsung aom North Korea gammi nasem 50 ki hawlkhiading

Malaysia gamsung aom North Korea gammi nasem 50 ki hawlkhiading

Malaysia gamsungah Visa Expired khinnapi in aomcip teitei North Korea gammi 50 te Overstay Case tawh Malaysia gampan in ki hawlkhiading ci’n Malaysia Deputy Prime Minister in tuni Tuesday (Mar 14) ni in genkhia cih CNA pan kiza hi. KLIA2 sungah Kim Jong Nam ki suamlup khitzawh thubuai tuamtuam hangin Malaysia leh North Korea gamnih pen hongki hehsuah mahmah uhhi.

Agamsung tuak uhah aom Ambassador te ki hawlkhiat saktuak uh a, agamsung tuak uh ah aomlai agammi te uh ahihleh aciah khiatding phallo, khakcip tuak uhhi. Akisapleh kikheknading Hostage cihbangdan in akikemtuak khikhe phot uh ahihi. Ahi zongin agamsung aom mite uh aciahkhiatding aki khakcip kawmkal himahleh Malaysia kumpi in agamsung ah North Korea gammi Overstay in aom honpikhat mukhia uh ahih manin, mi 50 te ahawlkhiading Deportation abawlding uh ahihi.

Malaysia, Borneo Island tung aom Sarawak State ah suangmelhol kitawhna Coal Mines tampi nei uhhi. Tualai ah nasemte pen gamdangmi vive hizaw uh a, tualak ah North Korea gammi zong tampi kihel cihi. Tuasung panin North Korea gammi 50 te ki hawlkhiading, Deportation kibawlding ci’n Malaysia Deputy Prime Minister Ahmad Zahid Hamidi in tuni in Reporters te tungah agenkhia ahihi.

Sarawak State sung aom North Korea gammi nasem te lakah Visa Expired khin khempeuh amanlang in Pyongyang ah ki ciahkhia sakding hi ci’n genkhia hi.

Agamsung aom mite ciahkhiatding aki khakciptuak laitak in banghang in tua mi 50 te ciahkhiat saksawm ahiam cihpen bangmah gencianna neilo hi.

North Korea gamsung ah Malaysia Citizens pen mi 9 bang omlaiding in kigen a, tualak ah Embassy Staff pen mi 3 kihel in, adangte pen a innkuanpih te ahi uhhi.

North Korea inzong Kim Jong Nam ii aluanghawm pen ciahkhiat pihnuam in ngenngen uh himahleh Malaysia kumpi in asipa ii innkuanpih te khatpeuhpeuh tawh DNA sittuahna aomkhit mateng in misiluang ki piakhia theilo hi ci’n kinialnial uhhi.

Aluanghawm pen tunidong Hospital Kuala Lumpur ah aki kemciplai hi a, khakhatbang phakhinta ahih manin migi koihziauna Morgue sungah kikem suaksuakleh siacip khading ahih manin asiatloh nadingin Embalm kibawlsak ci’n Deputy Prime Minister in genkhia hi.

More: Twitter tungtawn in Malaysia gammakai agensiapa in RM9500 liautuak

North Korea gampen leitungah atuamtatdiak gamkhat hi a, gamdang sumlut kicianzong neikhollo uhhi. North Korea gammi 100,000 bang gampualam ah nasem in zinkhiading in ki ummawh a, tuate ii innlam akhakkik Remittances tengpeuh gamdang sumlut “Source of Foreign Currency” kicimawk hi. ZD Sawltak #zomidaily